Yezgani Achimi—Nahumu
1. Kumbi tisambiranji m’buku laku Nahumu?
1 Kubwangandulika kwa msumba wa Nineve kulongo kuti vo Nahumu wanguchima vingufiskika nadi. Yehova wanguwezge arwani ŵaki ndipu chinanga kuti ŵenga akofya ukongwa angumikana nayu cha. (Nah. 1:2, 6) Asani tingasanda uchimi waku Nahumu, utiwovyengi kuziŵa vo tingachita mu uteŵeti.
2. Kumbi tingachita wuli kuti uthenga widu uŵengi wakuchiska?
2 Uthenga Wakuchiska Kweniso Wakupaska Chilindizga: Asani taliŵerenga kakwamba buku laku Nahumu, tingawona ŵaka nge kuti le ndi uthenga wacheruzgu wakukwaskana ndi kubwangandulika kwa msumba wa Nineve, likulu la charu chakali cha Asiriya mo mwenga ŵanthu akujikuzga. (Nah. 1:1; 3:7) Kweni uthenga wacheruzgu wenuwu, wenga uthenga wamampha ku ŵanthu aku Yehova. Nahumu yo zina laki ling’anamuwa “Wakupembuzga,” wangusimikizgiya Ayuda anyaki kuti murwani wawu watuzgikengepu pambula kuswera! Iyu wanguŵakambiya so kuti Yehova ndi “linga lakukho mu zuŵa la suzgu.” (Nah. 1:7) Po tipharazga, nasi tikambiya ŵanthu uthenga wamampha ndipu titiŵachiska kuti abisami kwaku Yehova.—Nah. 1:15.
3. Kumbi tingamuyezga wuli Nahumu pakugwiriskiya nchitu vakuwoniyapu pamwenga vakuyeruzgiyapu?
3 Mugwiriskiyengi Nchitu Vakuwoniyapu ndi Vakuyeruzgiyapu: Mwakukambirika ndi Yehova, Nahumu wanguchima kuti msumba wa Nineve wazamubwangandulika nge mo unguchitiya msumba wa ku Egipiti wa Tebesi (No-amon) wo ungubwangandulika ndi ufumu wa Asiriya. (Nah. 3:8-10) Asani tikambiskana ndi ŵanthu za umali wa charu chiheni ichi, tingakonkhoska mauchimi nga m’Bayibolo ngo ngalongo kuti Yehova wafiska vosi vo wakamba. Mwakuyeruzgiyapu, pa nyengu yo Ababiloni ndi Amede anguza kuziyukiya msumba wa Nineve mu 632 B.C.E., vuwa yinandi yo yingunya yinguchitiska kuti Msinji wa Tigirisi usapaliyi, vo vinguchitiska kuti mpanda wakukho wa Nineve ugumuki kurwandi. Mwaviyo, Nineve wangubwangandulika mwaliŵi nge mo Yehova wangukambiya.—Nah. 1:8; 2:6.
4. Kumbi tingachita wuli kuti tiŵakonkhoskiyengi umampha ŵanthu fundu mu uteŵeti?
4 Mukonkhoskengi Mwakuvwika Umampha: Vo Nahumu wangulemba wanguvikonkhoska umampha ndipu vavwikanga nge kuti vichitika penipo. Fundu zaki zenga zambula kusuzga kuzivwa. (Nah. 1:14; 3:1) Mwakuyanana ŵaka, nasi tigwiriskiyengi nchitu mazu ngo ŵanthu angasuzgika cha kungavwa. (1 Ŵakor. 14:9) Asani mwakumana ndi munthu kakwamba, mumukonkhoskiyengi mwakuvwika umampha chifukwa cho mwaziya. Asani musambira ndi ŵanthu Bayibolo, awovyeni kuti ayambi kugomezga Yehova ndi Mazu ngaki kweniso kuziŵa mo angagwiriskiya nchitu vo asambira pa umoyu wawu.—Ŵar. 10:14.
5. Kumbi mu uchimi waku Nahumu tisaniyamu fundu wuli yakuchiska?
5 Nahumu wangugomezga kuti Yehova wafiska vosi vo wakamba. Tiziŵa umampha venivi kuziya m’buku lo liziŵika ndi zina laki. Po umali wa charu chaku Satana we pafupi, tichiskika ndi mazu ngaku Chiuta ngakuti: “Chifukwa nchine cho mumikiyana ndi Ambuya? Amaliyengi limu; kuti awezgiyengi thayu kaŵi cha pa ŵamawongu ŵawu.”—Nah. 1:9.