Sukulu ya Uteŵeti Waku Chiuta ya mu 2015 Yitiwovyengi Kupharazga Mwalusu

¹ Wakulemba sumu Davidi wangulemba kuti: ‘Mazu nga mlomu wangu ndi marunguruku nga mtima wangu ngaŵi nga marondeka pa masu pinu, Ambuya, Jarawi langu ndi Mpozomoski wangu.’ (Sumu 19:14) Nasi tikhumba kuti mazu ngidu ngakondweskengi Yehova chifukwa tiwona kuti ndi mwaŵi wapade kukamba uneneska mu mpingu ndipuso mu uteŵeti. Sukulu ya Uteŵeti Waku Chiuta ndi nthowa yimoza yo Yehova watitisambiziya kuti tipharazgengi umampha. Sukulu iyi, yichitika sabata yeyosi mu mipingu yakujumpha 111,000 pacharu chosi chapasi. Yawovya abali ndi azichi akupambanapambana pacharu chosi kuti aje akwenere kupharazga uthenga wamampha mwakufika ŵanthu pa mtima, mwalusu ndipuso mwachiganga.​—Mac. 19:8; Ŵakol. 4:6.

² Nkhani zinyaki zo ze mundondomeku ya sukulu ya chaka cha 2015 zatuliya m’kabuku kakuti, “Kumbi M’Mazu Ngaku Chiuta mwe Nkhani Nizi?” Kusazgiyapu pa fundu yeniyi, asintha nyengu ya fundu zikulu zakutuliya M’Bayibolo ndipuso Nkhani Na. 1. Kusintha kwenuku ndipuso ulongozgi wakukwaskana ndi mo nkhani za mu sukulu zitenere kukambikiya, zakonkhoskeka mu ndimi zo ze m’mphata umu.

³ Fundu Zikulu Zakutuliya M’Bayibolo: Abali wo apaskikengi nkhani yeniyi ayikambengi kwa maminiti ngaŵi ndipu atenere kukonkhoska fundu yimoza yakukondweska kweniso yakovya yo asaniya pakuŵerenga Bayibolo mu sabata yo. Yiwu atenere kunozgeke umampha kuti pa nyengu yo apaskika akonkhoski fundu yakovya mpingu. Pavuli paki, nge mwa nyengu zosi abali ndi azichi akambengi kwa maminiti 6 fundu zakukondweska zo angusaniya po aŵerenganga Bayibolo sabata yo. Weyosi watenere kukamba fundu yaki kwa masekondi 30, pamwenga kusikiya pasi. Kuti mubali pamwenga mzichi wakambi fundu yakuchiska kwa masekondi 30, wakhumbika kunozgeke umampha ndipuso kuziŵa kuti anyaki akhumbika kumukapu. Venivi vingawovya so kuti anyidu nawu akambi vo angusaniya pa nyengu yo afufuzanga pakuŵija.

⁴ Nkhani Na. 1: Mubali yo wazamupaskika nkhani yeniyi wazamuŵerenga Bayibolo kwa maminiti 3 pamwenga kusikiya pasi ndipu wazamuŵerenga mavesi ngamanavi. Wo apaskika nkhani yakuŵerenga Bayibolo, akhumbika kuyesere kanandi. Angachita viyo mwakuŵerenga mwakukweza, kuzumbuwa umampha mazu ndipuso kwambula kugotagota kuti fundu zo aŵerenga zivwikengi umampha. Ateŵeti wosi aku Yehova atenere kwesesa kuŵerenga umampha chifukwa chakuti kuŵerenga kutitiwovya ukongwa pa kusopa kwidu. Tikondwa ukongwa kuti ŵana ŵidu anandi aŵerenga umampha. Apapi awongeka chifukwa achita phamphu pakovya ŵana ŵawu kuti aŵerengengi umampha.

⁵ Nkhani Na. 2: Nkhani yeniyi yikambikengi ndi mzichi kwa maminiti 5. Iyu watenere kugwiriskiya nchitu mutu wa nkhani yo wapaskika. Asani yatuliya m’kabuku ka mutu wakuti, Kumbi M’Mazu Ngaku Chiuta mwe Nkhani Nizi? watenere kuyikamba nge kuti we mu uteŵeti kweniso mwakukoliyana ndi vo vichitika m’chigaŵa cha mpingu wo. Wangagwiriskiya so nchitu malemba nganyaki ngo ngakoliyana ndi mutu wa nkhani. Wakuwonere sukulu wasankhengi munthu wakuti wamuwovyi.

⁶ Nkhani Na. 3: Nkhani iyi yiŵengi ya maminiti 5 ndipu yikambikengi ndi mubali pamwenga muchizi. Asani mzichi ndiyu wakambengi, watenere kuyikamba nge Nkhani Na. 2, kweni asani ndi mubali, wayikambi nge nkhani yakukambiya mpingu. Iyu watenere kukonkhoska mutu wa nkhani, kusankha malemba ngakukoliyana ndi nkhani ndipuso watenere kulongo vo abali ndi azichi angasambira mu nkhani yaki.

⁷ Fundu Yifya pa Nkhani Na. 3 Asani Yikambikengi ndi Abali: Asani nkhani iyi yatuliya m’kabuku kamutu wakuti, Kumbi M’Mazu Ngaku Chiuta mwe Nkhani Nizi? yikambiki nge chakuyeruzgiyapu cha kusopa kwa pabanja pamwenga upharazgi. Wakuwonere sukulu ndiyu wasankhengi munthu wakovya kweniso wakambengi mo yitenere kukambikiya. Munthu yo wasankhika kuti wawovyi watenere kuja wa m’banja laku yo wakambengi nkhani pamwenga mubali munyaki mu mpingu. Yo wakambengi nkhani yeniyi, wangagwiriskiya nchitu malemba nganyaki ngo ngalongo fundu za m’Bayibolo zo zikoliyana ndi mutu wa nkhani. Nyengu zinyaki, mura wangapaskika nkhani yeniyi. Asani ndi mura, wangasankha yija wakumovya ndipuso wangaziŵa mo nkhani yo yitenere kukambikiya. Mwambula kukayika, mpingu wazamuchiskika ukongwa kuwona ŵara achilongo mo asambiziya mwalusu munthu wa m’banja lawu pamwenga mubali munyaki.

⁸ Kupereka Ulongozgi: Pakumaliya pa nkhani yeyosi, wakuwonere sukulu wagwiriskiyengi nchitu maminiti ngaŵi kuwonga ndi kupereka ulongozgi wakuchiska wakutuliya m’buku la Pindulani ndi Sukulu ya Utumiki wa Mulungu. Asani wakuwonere sukulu wadana wakukamba nkhani, wangakambanga cha ulongozgi wo wangupangana nayu. Wakuwonere sukulu watenere kuwonga ndi mtima wosi asani wakusambira wamala kukamba nkhani, watenere kuzumbuwa ulongozgi wo wangupangana nayu ndipu wakambi chifukwa cho wakambiya kuti wakusambira wachita umampha pamwenga wakonkhoski chifukwa cho kungaŵiya umampha kuti walutirizgi kugwiriyapu nchitu pa ulongozgi wo wangupangana nayu.

⁹ Fomu ya ulongozgi yisanirika papeji 79 mpaka 81, m’buku la Sukulu ya Utumiki. Asani wakusambira wakamba nkhani yaki, wakuwonere sukulu walembengi ulongozgi m’buku la wakusambira ndipu wamufumbengi pakuyija asani wanguyesa kugwiriskiya nchitu vakuchita va pa ulongozgi wo wangupaskika. Pavuli pa maunganu pamwenga nyengu yinyaki, wakuwonere sukulu wangawonga wakusambira ndipuso kumukambiya masachizgu nganyaki ngakovya. Asani wakusambira weyosi pakuyija watovyeka, vingachitiska kuti waluti panthazi.​—1 Tim. 4:15.

¹⁰ Asani yo wakamba nkhani wajumpha nyengu, wakuwonere sukulu pamwenga wakovya watenere kumuziŵiska mwakuphwere kuti nyengu yaki yamala pakumba belu pamwenga kugong’oska. Asani wavwa vinthu venivi, wakusambira watenere kumaliza ŵaka chiganizu cho wakambanga ndi kutuwapu papulatifomu.​—Wonani m’buku la Sukulu ya Utumiki papeji 282, ndimi 4.

¹¹ Ŵanthu wosi wo afiska fundu zo zikhumbika, achiskika kuti alembesi mu Sukulu ya Uteŵeti Waku Chiuta. (Wonani m’buku la Sukulu ya Utumiki papeji 282, ndimi 6.) Masambiru ngo ŵanthu aku Yehova alonde mu sukulu yeniyi ngatiŵawovya kuti apharazgengi ndipuso kusambiza uthenga wamampha wa Ufumu ndi mtima wosi, mwaulemu kweniso mwachanju. Mwambula kukayika, Yehova wakondwa ukongwa asani ŵanthu wosi wo ayanduwa ndi masambiru ngenanga, atimuthamika!​—Sumu 148:12, 13; Yes. 50:4.