Sumu Zifya zo Timbengi Pakusopa!
1 Pa unganu wa pachaka wa pambula kuswera yapa wa Watch Tower Bible and Tract Society of Pennsylvania, wo unguchitika pa October 4, 2014, angupharazga kuti anozgengi so buku lidu la sumu. Iyi yenga nkhani yakukondweska ukongwa! Ŵanthu wosi wo ŵengapu, anguŵakumbuska kuti sumu zidu za Ufumu zakukhumbika ukongwa pa kusopa kwidu.—Sumu 96:2.
2 Mungazizwa kuti, ‘Nchifukwa wuli nkhwakukhumbika kunozga so buku la sumu?’ Pe vifukwa vinandi. Chakwamba, nchifukwa chakuti fundu za m’Malemba zisintha mo tazivwiyanga kali ndipu venivi vingachitiska kuti mazu nga sumu zidu ngasinthi. (Nthanthi 4:18) Chifukwa chinyaki nchakuti: Fundu zinandi kweniso mazu ngo ngagwiriskikiya nchitu m’buku la sumu lo tigwiriskiya nchitu sonu, ngangutuliya m’Bayibolo lakali la Chingelezi la New World Translation. Mwaviyo, mazu nga sumu zo ze m’buku lo tigwiriskiya nchitu sonu, ngatenere kusinthika kuti ngakoliyani ndi mazu ngo nge m’Bayibolo lasonu. Chifukwa chakuti paŵengi nchitu yikulu yakunozga so sumu zo te nazu, akuŵanaŵana kuti asazgiyeku sumu zinyaki zimanavi.
3 Kumbi titenere kulindizga mpaka po asindikiziya buku lifya kuti tiyambi kugwiriskiya nchitu sumu zenizi? Awa. Te akukondwa kukuziŵiskani kuti myezi yo yituza, pa Webusayiti yidu ya jw.org paŵengi sumu zifya. Asani sumu yifya yatuwa, ayiŵikengi pa ndondomeku kuti yizimbiki pakumaliya pa Unganu wa Uteŵeti ndipu alembengepu kuti, “sumu yifya.”
4 Mo Tingasambiriya Sumu Zifya: Kungaŵa kwakusuzga kusambira sumu yifya. Kweni nge mo wakulemba sumu wangukambiya, tikhumba kuti timbengi pa maunganu nga mpingu, ‘tireki kuja cheti.’ (Sumu 30:12) Kuti musambiri kumba sumu yifya, londoni nthowa zambula kusuzga zo ze mumphata umu.
Vwisiyani mwakuwerezgawerezga sumu zambula mazu zo ziŵikikengi pa Webusayiti yidu. Asani mulutirizga kuvwisiya mo ambiya, musuzgikengi cha kuzikumbuka.
Ŵerengani ndi kusunga pa mtima mazu ngaki.
Mbani mazu ngaki mwakulondo sumu yambula mazu. Chitani venivi mpaka muyiziŵi.
Mbani mwakuwerezgawerezga sumu zasonu pa nyengu ya Kusopa kwa pa Banja mpaka po banja linu laziziŵa.
5 Mu myezi yo yituza, asani sumu yasonu yimbikengi pakumaliya pa Unganu wa Uteŵeti, abali ndi azichi avwisiyengi dankha kamoza sumu yambula mazu ŵechendayambi kumba. Pavuli paki, ambengi mwakulondo sumu zambula mazu, nge mo tichitiya ndi sumu zinyaki.
6 Kuŵanaŵaniya nkhani yeniyi kutiwovyengi kuziŵa kuti kumba sumu pa maunganu ngidu, kutitikondweska chifukwa timbiya pamoza pakutumbika Yehova. Mwaviyo, asani akamba kuti timbi sumu pa maunganu ngidu ngachikhristu, tikhumbika cha kutuwapu po taja pambula chifukwa chakuvwika.
7 Pe nthowa yinyaki yo tingalongole kuti titumbika sumu zidu zakupaturika. Pa maunganu nga dera ndi nga chigaŵa, sumu zambula mazu zimbika chigaŵa chechosi cha unganu chechendayambi. Abali ndi azichi akujipereka atuliya mu vyaru vakupambanapambana, kuluta ku Patterson, New York, kaŵi pa chaka. Yiwu agwiriskiya nchitu ndalama zawu kulipiriya ulendu wenuwu, kuti akanozgi sumu zamampha zenizi kuti tizigwiriskiyengi nchitu pa kusopa kwidu. Mwaviyo, asani cheyamani watitipempha kuti tije pasi ndi kuvwisiya sumu zo abali ndi azichi ŵenaŵa akutinozge, titenere kuvwiya. Kuchita viyo, kutitiwovya kuti tinozgekereski mtima widu kuti tivwisiyi nkhani zo zikambikengi.—Ezra 7:10.
8 Pakumaliya pa unganu widu msanawale, timbengi sumu yasonu yimoza ya mutu wakuti, “Ufumu wo Uwusa Kuchanya Uzi.” Sumu iyi, yo yingumbika pa unganu wa pachaka wo unguchitika pambula kuswera yapa, yingunozgeke kuti yimbiki panyengu yo tikumbuka kuti vakwana vyaka 100 kutuliya po Ufumu ungujalikiskikiya.
9 Kukamba uneneska, sumu zifya ndi ‘vinthu vamampha’ nadi vakutuliya kwaku Yehova. (Mat. 12:35a) Tiyeni tiyesesi kusambira sumu zifya zenizi kweniso tizimbengi ndi mtima wosi, vo vitichitiskengi kuthamika kweniso kupereka ulemu wakwenere kwaku Chiuta widu!—Sumu 147:1.