Yezgani Achimi—Habakuku
1. Nchifukwa wuli nasi tingakamba mazu ngo Habakuku wangukamba?
1 Asani tikumana ndi masuzu mu charu chiheni ichi tingayamba kuvwa nge mo Habakuku wavwiyanga. Iyu wangufumba Yehova kuti: “Nchifukwa wuli mutindilongo mauheni? Nchifukwa wuli mulekere jalidu liheni?” (Hab. 1:3; 2 Tim. 3:1, 13) Kuŵanaŵaniya vo Habakuku wangulemba kweniso chivwanu chaki kungatiwovya kukunthiyapu pa nyengu yo tilindiza zuŵa laku Yehova la cheruzu.—2 Pet. 3:7
2. Kumbi tingalongo wuli kuti te ndi chivwanu?
2 Jani ndi Chivwanu: M’malu mwakutimbanyizgika ndi masuzu ngo wakumananga nangu Habakuku wangulutiriza kuteŵete Yehova mwakugomezeka. (Hab. 2:1) Yehova wangusimikiziya mchimi mwenuyu kuti mazu Ngaki ngafiskikengi pa nyengu yakwenere ndipuso kuti “murunji walutirizengi kuja wakugomezeka.” (Hab. 2:2-4) Kumbi Akhristu mazuŵa nganu asambiranji pa vo Yehova wangukambiya Habakuku? Chakukhumbika ukongwa nkhugomeza kuti umaliru uzengi nadi m’malu mwa kuŵanaŵaniya kuti uzengi zuŵanji. Chivwanu chititiwovya kuja masu ndipuso kuteŵete Yehova ndi mtima wosi.—Ŵah. 10:38, 39.
3. Nchifukwa wuli tikhumbika kulutiliza kuteŵete Yehova mwakukondwa?
3 Teŵetiyani Yehova Mwakukondwa: Chivwanu chidu chazamuyeseka ukongwa pa nyengu yo Gogi wa ku Magogi wazamuyukiya ŵanthu aku Yehova. (Ezek. 38:2, 10-12) Chinanga kuti tazamutaskika pa chisuzu chikulu kweni tazamukumana mbwenu ndi masuzu ngakulu. Chakurya chingazisoŵa. Katundu wangazinangika kweniso tingazija mwakusuzikiya. Kumbi tazamuchita wuli asani tazikumana ndi masuzu ngenanga? Habakuku wangungaziŵiya limu masuzu ngo wangukumana nangu ndipu wangusimikiza mtima kulutiliza kuteŵete Yehova mwakukondwa. (Hab. 3:16-19) Kuteŵete Yehova mwakukondwa kungazitiwovya kuti tizikunthiyepu masuzu ngo tazamukumana nangu.—Neh. 8:10; Ŵah. 12:2.
4. Kumbi ndi vinthu vakukondwesa nivi vo vichitika sonu kweniso vo vazamuchitika kunthazi?
4 Ŵanthu wo Yehova wazakuŵataska pa zuŵa laki azamulutiriza kusambizika nthowa zamampha zaku Chiuta. (Hab. 2:14) Ŵanthu wo azamuyusika nawuso azamusambira vaku Yehova. Tikhumbika kugwiriskiya ntchitu mpata wewosi wo tasaniya kukambiya ŵanthu vaku Yehova kweniso vakuziziswa vo wachita.—Sumu 34:1; 71:17.