Kumbi Mazu Ngaku Chiuta Ngakusinthika?

Ŵanthu anyaki awona nge kuti Mazu ngaku Chiuta ngakusinthika. Kweni mchimi Yesaya wangukambiya limu kuti Mazu ngaku Chiuta “ngaŵengeku mpaka muyaya.” (Yesaya 40:8) Kumbi tingasimikiza wuli kuti malayizgu ngaku Chiuta ngakusinthika cha?

Chiuta we ndi nthazi zakusungiya kweniso kuvikiliya Mazu ngaki kuti ngaleki kunangika. Mu nyengu yakali, ŵanthu wo akopanga mipukutu akopanga chechosi mwakuphwere ndipu aŵerenganga so chilembu chechosi ndi kusimikiziya kuti palivi cho asaziyapu, kusintha pamwenga kutuzgapu. Kweni chifukwa chakuti taŵanthu te ambula kufikapu, wo akopanga mipukutu nawu anangisanga tinthu tinyaki timanatimana.

KUMBI MALEMBA NGAKUPATURIKA NGO TENANGU SONU NGAKUTULIYA NADI KWAKU CHIUTA?

Pe mipukutu masauzandi nganandi yo yikukopeka kutuliya ku mipukutu yakali ya Malemba Ngakupaturika. Mwaviyo, asani mpukutu unyaki upambanaku kamanavi ndi mipukutu yinyaki vingaja umampha kuwona so mumipukutu yinyaki kuti tisaniyi uneneska.—Kuti muziŵi vinandi, wonani nkhani yakuti “Kodi Baibulo Linasinthidwa Kapena Kusokonezedwa?” pa jw.org.

Mwakuyeruzgiyapu, ŵanaŵaniyani mipukutu yo ŵanthu a mtundu wachibedouin angusaniya mumphaku zinyaki kufupi ndi Nyanja Yakufwa mu 1947. Mipukutu yeniyi ye ndi vigaŵa vinyaki va Malemba Ngakupaturika ndipu yiwoneka kuti njakali kujumpha vyaka 2000 kutuliya po yingulembeke. Akaswiri anyaki angufufuza mumipukutu yeniyi ndipuso mumipukutu yakali ukongwa ya Malemba Ngakupaturika kuti awoni asani pe kupambana. Kumbi angusaniyanji?

Vo akaswiri yaŵa akusaniya vilongo kuti vo vikulembeka mu Bayibolu lo tenalu mazuŵa nganu viyanana ndendende ndi vo vikulembeka mumipukutu yakwamba chayiyu.a Vo akaswiri yaŵa angusaniya ŵati afufuza mwakuphwere mumipukutu yakali ukongwa, vilongo kuti Malemba Ngakupaturika ngo tiŵerenga mazuŵa nganu mbuthenga chayiwu wakutuliya kwaku Chiuta. Yapa tikayika cha kuti Chiuta wanguyesesa kuvikiliya uneneska wa mu Malemba Ngakupaturika wo utitiwovya mazuŵa nganu.

Mwaviyo, tikhumbika kuŵerenga Mazu ngaku Chiuta ndi chigomezgu chakuti ngakulembeka mwauneneska. Po tiŵanaŵaniya fundu yeniyi, tiyeni tiwoni vo tingasambira vakukwaskana ndi Chiuta kutuliya kwa achimi ŵaki.