TICHITENGI VINTHU NGE AKHRISTU
Londoni Fundu za Mijalidu Yamampha Zaku Yehova
Yehova Chiuta wakupereka fundu za mijalidu yamampha zo ŵanthu ŵaki atende. Mwakuyeruzgiyapu, wakupereka dangu lakuti nthengwa yingamalanga cha pakati pa munthurumi ndi munthukazi. (Mat. 19:4-6, 9) Iyu wakaniya limu jalidu la ureŵi la mtundu wewosi. (1 Ŵakor. 6:9, 10) Yehova wakupereka so fundu za mijalidu yamampha zo Akhristu atenere kulondo pa nkhani yakuvwala ndi kujitowesa.—Mar. 22:5; 1 Tim. 2:9, 10.
Ŵanthu anandi mucharu ichi mazuŵa nganu akana kwende fundu za mijalidu yamampha zaku Yehova. (Ŵar. 1:18-32) Yiwu atende waka maŵanaŵanu ngacharu pa nkhani yakuvwala ndi kujitowesa ndipuso mijalidu yawu. Achita vinthu viheni mwambula soni ndipu asuska ŵanthu wo alondo fundu zaku Yehova.—1 Pet. 4:3, 4.
Isi Akaboni aku Yehova titenere kuyesesa kulondo fundu zaku Chiuta za mijalidu yamampha. (Ŵar. 12:9) Kumbi tingachita wuli venivi? Vakuchita vidu vilongongi kuti titende nadi fundu zaku Yehova. Kweniso titenere kuja ndi mijalidu yamampha. Mwakuyeruzgiyapu, asani tisankha masitayelu nga malaya ndipuso kujitowesa, tijifumbengi kuti: ‘Kumbi vo ndasankha vilongo kuti nditende fundu zaku Yehova pamwenga fundu zacharu? Kumbi kavwalidu kangu ndipuso kujitowesa vilongo kuti nditumbika nadi Chiuta?’ Kweniso asani tisankha mafilimu pamwenga mapulogilamu ngakuti tiwonere tingajifumba kuti: ‘Kumbi Yehova wangakondwa nayu pulogilamu yeniyi? Kumbi filimu iyi yichiska munthu kuti waje ndi jalidu wuli? Kumbi vakukondwesa vo ndisankha vingandichitisa kuti ndiyambi mijalidu yiheni? (Sumu 101:3) Kumbi ŵanthu a m’banja langu pamwenga ŵanthu anyaki angaguŵa ndi venivi?’—1 Ŵakor. 10:31-33.
Ntchifukwa wuli titenere kulondo fundu za mijalidu yamampha zaku Yehova? Pambula kuswela yapa, Khristu Yesu watuzengepu ŵanthu aheni ndi vinthu vosi viheni. (Ezek. 9:4-7) Wo achita khumbu laku Chiuta pe ndiwu azamuja kwamuyaya. (1 Yoh. 2:15-17) Mwaviyo, tiyeni tosi tilutilizi kulondo fundu za mijalidu yamampha zaku Yehova kuti ŵanthu wo awona mijalidu yidu yamampha amutumbiki.—1 Pet. 2:11, 12.
Kumbi kavwalidu kangu ndipuso kujitowesa vilongo kuti ndilondo fundu za mijalidu yamampha?
WONESANI VIDIYO YAMUTU WAKUTI JANI BWEZI LAKU YEHOVA—MUNTHURUMI YUMOZA, MUNTHUKAZI YUMOZA, PAVULI PAKI KAMBISANANI MAFUMBU YANGA:
Ntchifukwa wuli titenere kulondo fundu za mijalidu yamampha zaku Yehova?
Ntchifukwa wuli apapi atenere kusambiza ŵana ŵawu fundu za mijalidu yamampha zaku Yehova ŵeche anamana?
Kumbi ŵana ndipuso arara angawovya wuli ŵanthu anyaki kuti aziŵi kuti Chiuta ngwamampha?