TICHITENGI VINTHU NGE AKHRISTU
Vo Vingatiwovya Kuti Tisambirengi Malemba Mwaphamphu
Kumbi mungalutiriza kuja akugomezgeka nge Danyele chinanga kuti mungakumana ndi mayeseru? Danyele wasambiranga Mazu Ngaku Chiuta mwaphamphu, kusazgapu mauchimi ngakusuzga. (Dan. 9:2) Kusambira Bayibolu mwaphamphu kungatiwovya kuti tilutirizi kuja akugomezgeka. Kumbi vingatiwovya wuli? Vingatiwovya kuti tigomezgengi kuti malayizgu ngaku Yehova ngafiskikengi nadi. (Yos. 23:14) Vingatiwovya so kuti timuyanjengi ukongwa Chiuta kweniso kuti tichitengi vinthu vo iyu wakondwa navu. (Sumu 97:10) Kweni tingachita wuli kuti tiyambepu kuchita venivi? Tiyeni tikambisani fundu izi.
Kumbi ndi nkhani nizi zo ndingasambira? Kuja ndi ndondomeku yamampha yakuŵerenge Bayibolu kung’anamuwa so kunozgeke maunganu nga mpingu. Kusaniya nyengu yakukwana yakufufuziya fundu zinyaki zo mwaleka kuzivwisa pakuŵerenga Bayibolu, kungakuwovyani ukongwa kuti mulivwisengi. Anyaki asankha kuti afufuzengi ukongwa nkhani zakukwasana ndi mauchimi, mijalidu ya mzimu utuŵa, maulendu ngaku Paulo nga umishonale kweniso mo Yehova wakulenge vinthu. Asani nkhani yinyaki mwayivwisa cha pakuŵerenga Bayibolu, mungachita umampha kuyilemba kuti muyifufuzi nyengu yinyaki.
Kumbi ndingafufuza nunkhu? Kuti muvwi fundu zinyaki zo zingakuwovyani, woneriyani vidiyo yakuti Vidya Vakufufuziya Chuma Chauzimu. Kuti muyesi lusu linu lakufufuza, yesani kufufuza maufumu ngakulungakulu ngo ngakambika muchaputala 7 cha buku la Danyele.
Kumbi ndingasambira kwa nyengu yitali wuli? Kuŵerenga Bayibolu nyengu zosi kutovya kuti munthu wakuwi mwauzimu. Mungayamba dankha kusambira vinthu vimanavi pakwamba. Kusambira Mazu Ngaku Chiuta kuyanana waka ndi munthu yo wakumba pamalu po pabisika chuma. Asani wasaniya kuti pe chuma chinandi ndipu walimbikiya so ukongwa kukumba. (Nthanthi 2:3-6) Asani muchitengi viyo, mungayanjengi ukongwa Mazu Ngaku Chiuta, kweniso mukhumbisisengi kungaŵerenga nyengu zosi.—1 Pet. 2:2.
KUMBI VINYAMA VAKOFYA VO VIZUMBULIKA M’BUKU LA DANYELE CHAPUTALA 7 VIMIYANJI?
FUMBU LINYAKI LO MUNGAJIFUMBA:
Kumbi lemba la Danyele 7:8, 24 likufiskika wuli?
NDIFUFUZI SO IVI:
Kumbi vinyama vakofya vo vizumbulika m’buku la Chivumbuzi chaputala 13 vimiyanji?