Kumbi Munganozgeke Wuli Chikumbusu?

Kwambiya chaka chinu, tiŵengi ndi nyengu yikulu yakunozgeke Chikumbusu cha nyifwa yaku Khristu. Asani Chikumbusu chichitikengi mukati mwa sabata, maunganu nga Umoyu Widu Wachikhristu Ndipuso Uteŵeti ngangachitikanga cha. Kweniso asani Chikumbusu chichitikengi pa Chisulu pamwenga pa Sabata, sambiru la Chigongwi cha Alinda ndi nkhani yachisanisani navu vingachitikanga cha. Ivi vilongo kuti muŵengi ndi nyengu yikulu. Kumbi muyigwiriskiyengi ntchitu umampha nyengu yeniyi? Nge mo vinguchitikiya mu nyengu ya akutumika, pa nyengu iyi napu ŵara akhumbika kunozge limu vosi vo vikhumbika pa chikumbusu. (Luka 22:7-13; km 3/15 1) Kweni tosi tikhumbika kunozgekeresa mitima yidu kuti tiziyanduwi ndi mwambu uwu. Kumbi tingachita wuli venivi?

• Tiŵanaŵaniyengi mo tingachiyanduliya asani tingachiŵapu.—1 Akori. 11:23-26

• Tipempherengi ndi kuŵanaŵaniya mo ubwezi widu ndi Yehova uliri.—1 Akori. 11:27-29; 2 Akori. 13:5

• Tiŵerengengi ndi kuŵanaŵaniya nkhani za mu Bayibolu zo zikonkhoska kukhumbika kwa Chikumbusu.—Yoha. 3:16; 15:13

Apharazgi anyaki atanja kuŵerenga ndi kuŵanaŵaniya malemba nga mukabuku ka Kukambiskana Malemba Zuŵa Lelosi ngo ngakhumbika kuŵerengeka mu nyengu ya Chikumbusu. Anyaki aŵerenga mavesi nga mu Bayibolu ngo ngasanirika patchati yo ye mumphata umu. Ndipu anyaki asambira so nkhani za mu Chigongwi cha Alinda zo zikonkhoska va Chikumbusu kweniso chanju cho Yehova ndi Yesu akutilongo. Tipempha kuti vosi vo mungasankha kugwiriskiya ntchitu pakusambira, vikuwovyeni kuti mulutirizgi kuja pa ubwezi wakukho ndi Yehova ndipuso Mwana waki.