Kwanja Yehova ndi Kuwonga vo Watikuchitiyani Kungakuchitiskani kuti Mubatiziki

1-2. Nge mo pakambiya pa Machitidu 8:27-31, 35-38, ntchinthu wuli cho chinguchitiska kuti nduna ya ku Ifiyopiya yibatiziki?

KUMBI mukhumba kubatizika kuti muje wakusambira waku Khristu? Ŵanthu anandi abatizika chifukwa cha kwanja Yehova ndipuso kuwonga vo watiŵachitiya. Tiyeni tiwoni chakuyeruzgiyapu cha nduna yo yenga ndi mazaza pasi pa fumukazi ya ku Ifiyopiya.

² Nduna ya ku Ifiyopiya yati yasambira waka Malemba, yingubatizika nyengu yeniyo. (Ŵerengani Machitidu 8:27-31, 35-38.) Kumbi ntchinthu wuli cho chinguchitiska kuti nduna iyi yibatiziki? Tikayika cha kuti chenga chifukwa chakuti yinguwona kuti Mazu ngaku Chiuta ngakuzirwa. Tikamba viyo chifukwa nduna iyi yaŵerenganga mavesi nganyaki mubuku laku Yesaya pa nyengu yo yenga pa galeta kutuwa ku Yerusalemu kuluta ku Ifiyopiya. Ndipu Filipu wati wayikambiya vo mavesi yanga ngang’anamuwa, nduna iyi yinguwonga vo Yesu wanguyichitiya. Kweni kumbi ntchifukwa wuli nduna iyi yinguluta ku Yerusalemu? Chifukwa chakuti yayanjanga Yehova. Kumbi tiziŵa wuli venivi? Tiziŵa chifukwa chakuti pa nyengu iyi yatuwanga ku Yerusalemu kuchisopa Yehova. Iyu yitenere kuti yinguleka chisopa chaki ndipu yingwamba kusopa Chiuta wauneneska limoza ndi ŵanthu ŵaki. Kwanja Yehova ndiku kunguchitiska so nduna iyi kuti yichiti chinthu chinyaki chakukhumbika. Yingubatizika kuti yije wakusambira waku Khristu.​—Mate. 28:19.

3. Kumbi ndi vinthu wuli vo vingatondekeska munthu kuti wabatiziki? (Wonani bokosi lakuti “Kumbi Mtima Winu Uyanana ndi Dongu la Mtundu Wuli?”)

³ Kwanja Yehova kungakuchitiskani kuti mubatiziki. Kweni mungatondeka kuchita viyo asani mutanja ŵanthu pamwenga vinthu vinyaki. Kumbi venivi vingachitika wuli? Wonani vakuyeruzgiyapu ivi. Panyaki mutanja ukongwa mabwezi nginu kweniso abali ŵinu wo Mbakaboni cha ndipu mungafipa mtima kuti azakukutinkhani asani mwabatizika. (Mate. 10:37) Pamwenga mungaŵa kuti mutanja vinthu vinyaki vo Chiuta watinkha ndipu mutondeka kuvileka. (Sumu 97:10) Pamwenga kutuliya po mukuwiya, mutanja kukondwere maholidi ndipuso midawuku yo yikoliyana ndi visopa vaboza. Ndipu panyaki mungaŵa kuti mukumbuka vinthu vakukondweska vo vichitika pa nyengu yeniyi. Venivi vingachitiska kuti vikusuzgeni kuleka midawuku yo Yehova watinkha. (1 Akori. 10:20, 21) Mwaviyo, mungajifumba kuti: “Kumbi ndikhumbika kwanja ukongwa yani?”

KUMBI TIKHUMBIKA KWANJA UKONGWA YANI?

4. Kumbi ntchinthu wuli cho chingakuchitiskani kuti mubatiziki?

⁴ Mwechendayambi kusambira Bayibolu ndi Akaboni aku Yehova, panyaki ndipu mwayamba kali kwanja Yesu kweniso kuwona kuti vo Bayibolu likamba vakuzirwa. Ndipu sonu chifukwa chakuti mwaŵaziŵa umampha Akaboni aku Yehova, mutenere kuti mutanja kucheza nawu. Tikayika cha kuti mutanja ndi kuwonga vinthu venivi. Kweni kwanja ŵaka vinthu vamampha venivi ndiku cha kungakuchitiskani kuti mujipatuliyi kwaku Yehova ndipuso kuti mubatiziki. Chinthu chakukhumbika ukongwa cho chingakuchitiskani kuti mubatiziki, nkhwanja Yehova Chiuta. Asani mutanja ukongwa Yehova kuluska vinthu vosi, muzomerezengi cha kuti chinthu chinyaki chechosi pamwenga munthu munyaki weyosi wakutondekeskeni kumuteŵete. Kwanja Yehova kungakuchitiskani kuti mubatiziki ndipu kungakuwovyani so kuti mulutirizgi kuja akugomezgeka asani mwabatizika.

5. Kumbi tikambiskanengi mafumbu nanga?

⁵ Yesu wangukamba kuti tiyanjengi Yehova ndi mtima widu wosi, umoyu widu wosi, maŵanaŵanu ngidu ngosi ndi nthazi zidu zosi. (Mariko 12:30) Kumbi mungachita wuli kuti mumuyanjengi ukongwa Yehova kweniso kumutumbika? Muŵanaŵaniyengi mo Yehova watikuyanjiyani ndipu venivi vingakuwovyani kuti namwi mumuyanjengi. (1 Yoha. 4:19) Kumbi ndi vinthu wuli so vinyaki vo tingachita asani tayamba kwanja Yehova?b

6. Mwakukoliyana ndi Aroma 1:20, kumbi ndi nthowa yimoza niyi yo mungasambiriya vakukwaskana ndi Yehova?

⁶ Musambirengi vakukwaskana ndi Yehova kuziya muchilengedu. (Ŵerengani Aroma 1:20; Chivu. 4:11) Muŵanaŵaniyengi mo vimiti kweniso vinyama vilongore kuti Yehova ngwazeru ukongwa. Musambirengi mo liŵavu linu likupangikiya mwakuziziswa. (Sumu 139:14) Kweniso muŵanaŵaniyengi nthazi zo Yehova wakuŵika mu lumwi, lo ndimoza mwa nyenyezic mabiliyoni nganandi. (Yesa. 40:26) Asani muŵanaŵaniyengi vinthu vo Yehova wakulenga mumutumbikengi ukongwa. Kweni pe vinandi vo mutenere kuchita kuti muje pa ubwezi ndi Yehova kuluska kuziŵa waka kuti ngwazeru ndipuso we ndi nthazi. Kuti mumuyanjengi ukongwa Yehova, mutenere kuziŵa vinandi vakukwaskana ndi iyu.

7. Kumbi mukhumbika kusimikizanji kuti mumuyanjengi ukongwa Yehova?

⁷ Mukhumbika kusimikiza kuti Yehova watikuyanjani pakumwija. Kumbi mukayikiya kuti Mlengi wakuchanya ndi charu chapasi watikuŵanaŵaniyani kweniso watikuphweriyani? Asani ndi viyo, mutenere kukumbuka kuti Yehova “we kutali cha ndi weyosi waku isi.” (Machi. 17:26-28) Iyu “wafufuza mitima yosi” ndipu watikulayizgani kuti ‘asani mumupenjengi, wazomerezengi kuti mumusaniyi.’ (1 Miko. 28:9) Mwakuti pasonu panu musambira Bayibolu chifukwa chakuti Yehova ‘watikundereziyani kwaku iyu.’ (Yere. 31:3) Asani mwaziŵa vosi vo Yehova wakuchitiyani, muyambengi kumuyanja ukongwa.

8. Kumbi mungalongo wuli kuti muwonga chanju chaku Yehova?

⁸ Nthowa yimoza yo mungalongore kuti muwonga chanju chaku Yehova, nkhupemphera. Muyambengi kumuyanja ukongwa Chiuta asani mutimukambiya vo vitikufipiskani mtima ndipuso asani mutimuwonga pa vosi vo watikuchitiyani. Ubwezi winu ndi Yehova ujengi wakukho asani muwona mo wamukiya mapempheru nginu. (Sumu 116:1) Ndipu musimikizengi kuti iyu watikuŵanaŵaniyani. Kweni kuti mundere kufupi ndi Yehova, mukhumbika kuziŵa vo watanja, vo watinkha kweniso chifukwa cho wachitiya vinthu vinyaki. Ndipuso mutenere kuziŵa vo wakhumba kuti muchitengi. Nthowa yija yo mungaziŵiya venivi, nkhusambira Bayibolu.

9. Kumbi mungalongo wuli kuti muwonga Bayibolu?

⁹ Muwonengi kuti Mazu ngaku Chiuta ngakuzirwa. Mu Bayibolu pe ndimu musanirika uneneska wakukwaskana ndi Yehova kweniso vo wakhumba kukuchitiyani. Mungalongo kuti muwonga Bayibolu asani mutiliŵerenga zuŵa lelosi, munozgeke limu sambiru wechendazi yo watikusambizani kweniso asani mugwiriskiya ntchitu vo musambira. (Sumu 119:97, 99; Yoha. 17:17) Kumbi mwe ndi ndondomeku yakuŵerenge Bayibolu pakumwija? Kumbi muŵerenga Bayibolu zuŵa lelosi?

10. Kambani chinthu chimoza cho chichitiska kuti Bayibolu lije lapade.

¹⁰ Chinthu chimoza cho chichitiska kuti Bayibolu lije lapade ntchakuti mwe nkhani zauneneska zo zikulembeka ndi ŵanthu wo anguwona Yesu. Ndilu buku lija launeneska lo likonkhoska vo Yesu wakukuchitiyani. Asani musambira vo Yesu wangukamba ndi kuchita, mukhumbisiskengi kuja nayu pa ubwezi.

11. Kumbi ntchinthu wuli cho chingakuwovyani kuti mumuyanjengi ukongwa Yehova?

¹¹ Muyanjengi Yesu kuti mumuyanjengi ukongwa Yehova. Chifukwa wuli? Chifukwa Yesu we ndi mijalidu yo Awisi ŵenayu. (Yoha. 14:9) Asani mulutirizga kusambira vakukwaskana ndi Yesu, mumuziŵengi umampha Yehova kweniso mumuyanjengi. Ŵanaŵaniyani lisungu lo Yesu walongonga ŵanthu wo anyawu aŵawonanga kuti mbakusika chifukwa chakuti ŵenga akulopwa, akavu pamwenga atamanga. Ŵanaŵaniyani so ulongozgi wazeru wo watikupaskani kweniso mo umoyu winu usinthiya asani mutiwugwiriskiya ntchitu.​—Mate. 5:1-11; 7:24-27.

12. Kumbi kusambira vakukwaskana ndi Yesu kukuwovyeningi kuti muchitenji?

¹² Tikayika cha kuti mumuyanjengi ukongwa Yesu asani muŵanaŵaniyengi sembi yo wangupereka kuti Yehova watigowoke maubudi ngidu. (Mate. 20:28) Asani mwaziŵa kuti Yesu wangukhumbisiska kukufwiyani, vingakuchitiskani kuti mulapi ndi kupempha Yehova kuti wakugowokiyeni. (Machi. 3:19, 20; 1 Yoha. 1:9) Ndipu asani mutanja ukongwa Yehova ndi Yesu, muŵayanjengi ukongwa abali ndi azichi.

13. Kumbi Yehova wakupaskeningi vinthu wuli?

¹³ Muyanjengi ŵanthu wo atanja Yehova. Abali ŵinu wo Mbakaboni cha kweniso anyinu wo mwachezanga nawu, angavwisa cha chifukwa cho mukhumbiya kujipatuliya kwaku Yehova. Yiwu angakususkani. Kweni Yehova wakuwovyeningi. Iyu wakupaskeningi abali ndi azichi wo angaŵa nge ŵanthu a mubanja linu. Asani mukoliyanengi nawu ukongwa, akuwovyeningi kweniso akuyanjeningi. (Mariko 10:29, 30; Ahe. 10:24, 25) Mukuluta kwa nyengu, abali ŵinu angayamba kuteŵete Yehova ndi kugwiriskiya ntchitu fundu zaki.​—1 Petu. 2:12.

14. Nge mo pakambiya pa 1 Yohane 5:3, kumbi mwawona kuti marangu ngaku Yehova ngakovya wuli?

¹⁴ Mutumbikengi ndi kugwiriskiya ntchitu marangu ngaku Yehova. Mwechendamuziŵi Yehova, mutenere kuti mwayendiyanga fundu zinu pakusankha vakuchita. Kweni sonu muwona kuti marangu ngaku Yehova ngamampha ukongwa. (Sumu 1:1-3; Ŵerengani 1 Yohane 5:3.) Ŵanaŵaniyani ulongozgi wa mu Bayibolu wo ungawovya anthulumi akuto, anthukazi akuyirwa, apapi ndipuso ŵana. (Aefe. 5:22–6:4) Kumbi sonu mukondwa mubanja linu chifukwa chakuti mugwiriskiya ntchitu ulongozgi wenuwu? Kumbi sonu mukusintha nkharu yinu chifukwa chakuti muvwiya ulongozgi waku Yehova wakuti musankhengi umampha mabwezi? Kumbi mukondwa chifukwa chakuchita viyo? (Nthanthi 13:20; 1 Akori. 15:33) Tikayika cha kuti mwamuka kuti hinya mafumbu yanga.

15. Kumbi mungachita wuli asani mukhumba kuziŵa mo mungagwiriskiya ntchitu fundu za mu Bayibolu?

¹⁵ Nyengu zinyaki, mungawona kuti nkhwakusuzga kuziŵa mo mungagwiriskiya ntchitu fundu za mu Bayibolu zo musambira. Ndichu chifukwa chaki Yehova watikupaskani mabuku ngo ngakonkhoska Bayibolu kuti wakuwovyeni kupambaniska pakati pa chamampha ndi chiheni. Iyu wachita venivi kuziya mugulu laki. (Ahe. 5:13, 14) Asani muŵerenga ndi kusambira mabuku ngenanga, muwonengi mo mungagwiriskiya ntchitu fundu za mu Bayibolu pa umoyu winu kweniso mo zingakuwovyiyani. Ndipu tikayika cha kuti venivi vikuwovyeningi kuti mukhumbisiskengi kuja mugulu laku Yehova.

16. Kumbi Yehova watiŵalongozga wuli ŵanthu ŵaki?

¹⁶ Muyanjengi gulu laku Yehova ndipuso muliwovyengi. Yehova wakuŵika ŵanthu ŵaki mu mipingu yakupambanapambana ndipu Mwana waki Yesu ndiyu watiŵalongozga. (Aefe. 1:22; 5:23) Yesu wakusankha kagulu kamanavi ka Akhristu akusankhika kuti alongozgengi ntchitu yakupharazga yo yichitika mazuŵa nganu. Iyu wakudana gulu lenili kuti “kapolu wakugomezgeka ndi wazeru” ndipu yiwu afwiyapu kuti akuwovyeni kuti mundere kufupi ndi Chiuta ndipuso kuti avikiliyi ubwezi winu ndi iyu. (Mate. 24:45-47) Nthowa yimoza yo kapolu wakugomezgeka watikuphweriyani nkhuwoneseska kuti ŵara akwenere asankhika kuti akulongozgeni ndi kukuvikiliyani. (Yesa. 32:1, 2; Ahe. 13:17; 1 Petu. 5:2, 3) Ŵara akhumbisiska kuchita vosi vo angafiska kuti akupembuzgeni ndipuso kukuwovyani kuti muje pa ubwezi wakukho ndi Yehova. Kweni chinthu chakukhumbika ukongwa cho achita, nkhukuwovyani kuti namwi musambizengi anyinu vakukwaskana ndi Yehova.​—Aefe. 4:11-13.

17. Mwakukoliyana ndi Aroma 10:10, 13, 14, ntchifukwa wuli tipharazgiya ŵanthu vakukwaskana ndi Yehova?

¹⁷ Muwovyengi anyinu kuti ayanjengi Yehova. Yesu wangukambiya akusambira ŵaki kuti asambizengi anyawu vakukwaskana ndi Yehova. (Mate. 28:19, 20) Vingachitika kuvwiya waka dangu ili chifukwa chakuti ndivu tikhumbika kuchita. Kweni asani mwayamba kumuyanja ukongwa Yehova, mujivwengi nge mo wanguvwiya Peturo ndi Yohane. Yiwu angukamba kuti: “Isi tilekengepu cha kulongoro vinthu vo tikuwona ndi kuvwa.” (Machi. 4:20) Tingakondwa ukongwa asani tingawovya munthu munyaki kuti wayanjengi Yehova. Filipu watenere kuti wangukondwa ukongwa wati wawovya nduna ya ku Ifiyopiya kusambira uneneska wa mu Malemba ndi kubatizika! Asani muchitengi nge Filipu ndi kuvwiya dangu laku Yesu lakuti tipharazgengi, mulongongi kuti mukhumba kuja Kaboni waku Yehova. (Ŵerengani Aroma 10:10, 13, 14.) Pa nyengu yo mwazamukhumbiya kuja Kaboni, tikayika cha kuti mwazakujifumba fumbu lo nduna ya ku Ifiyopiya yingujifumba lakuti: “Ntchinthu wuli cho chitinditondekesa kubatizika?”​—Machi. 8:36.

18. Kumbi tazamukambiskananji sabata yamawa?

¹⁸ Asani mwasankha kubatizika, mwazamuchita chinthu chakukhumbika ukongwa pa umoyu winu. Chifukwa chakuti ubatizu ntchinthu chakukhumbika ukongwa, mutenere kuŵanaŵaniyapu ukongwa vo ung’anamuwa. Kumbi ubatizu ung’anamuwanji? Kumbi mukhumbika kuchitanji mwechendabatiziki kweniso asani mwabatizika? Mafumbu yanga, ngazamumukika mu nkhani ya sabata yamawa.