NKHANI YAKUSAMBIRA YA NAMBALA 41
Kumbi Tingaŵawovya Wuli Ŵanthu wo Tisambira Nawu Bayibolu Kuti Abatiziki?—Chigaŵa Chakwamba
“Pakuti yimwi mwalongoleka kuti ndimwi kalata yaku Khristu, yakulembeka ndi isi nge ateŵeti.”—2 AKORI. 3:3.
SUMU 78 ‘Kusambiza Mazu Ngaku Chiuta’
VO TISAMBIRENGI MU NKHANI IYIa
Abali ndi azichi akondwa ukongwa kuwona kuti munthu yo wasambiranga Bayibolu mu mpingu ndipu amuyanjanga wabatizika (Wonani ndimi 1)
1. Kumbi lemba la 2 Akorinto 3:1-3, lititiwovya wuli kuziŵa kuti ndi mwaŵi kusambiza munthu Bayibolu mpaka kubatizika? (Wonani chithuzi cho che pa chikonkhombi.)
KUMBI mutuvwa wuli asani muwona munthu munyaki yo wasambiranga Bayibolu mu mpingu mwinu wabatizika? Tikayika cha kuti mukondwa. (Mate. 28:19) Ndipu asani yimwi ndimwi mwasambiranga nayu Bayibolu, mutenere kuti mungukondwa ukongwa pa nyengu yo wabatizikiyanga. (1 Ate. 2:19, 20) Ŵanthu wo abatizika sonu, atuŵa ‘makalata ngakusimikiziya’ ku ŵanthu wo asambira nawu pe cha, kweni ku mpingu wosi.—Ŵerengani 2 Akorinto 3:1-3.
2. (a) Kumbi ndi fumbu lakukhumbika nili lo tikambiskanengi, ndipu ntchifukwa wuli? (b) Kumbi sambiru la Bayibolu ntchinthu wuli? (Wonani mazu ngamumphata.)
2 Vakukondwesa ukongwa kuwona kuti vyaka vinayi vo vajumpha, mwezi wewosi abali ndi azichi achitiskanga masambirub nga Bayibolu pafufupi 10,000,000 mwezi wewosi. Ndipu pa vyaka vinayi venivi, ŵanthu pafufupi 280,000, abatizikanga chaka chechosi, ndi kuja Akaboni aku Yehova kweniso akusambira aku Yesu Khristu. Kumbi tingachita wuli kuti tiwovyi ŵanthu mamiliyoni ŵenaŵa kuti abatiziki? Chifukwa chakuti Yehova weche kuŵapaska mpata ŵanthu kuti aje akusambira aku Khristu, tikhumbika kuchita vosi vo tingafiska kuti tiwovyi ŵanthu ŵenaŵa kuti abatiziki mwaliŵi. Veviyo, chifukwa nyengu yaja kamanavi kumala!—1 Akorinto 7:29a; 1 Peturo 4:7.
3. Kumbi tikambiskanengenji mu nkhani iyi pa nkhani yakuchitiska masambiru nga Bayibolu?
3 Chifukwa chakuti ntchitu yakovya ŵanthu kuti aje akusambira yikhumbika kuyigwira mwaliŵi, Wupu Wakulongozga ungufumba maofesi nga nthambi ngakupambanapambana kuti akambi nthowa zo abali ndi azichi agwiriskiya ntchitu, kuti awovyi ŵanthu wo asambira nawu Bayibolu kuti abatiziki. Mu nkhani iyi kweniso mu nkhani yakulondopu, tiwonengi vo tingasambira kwa apayiniya, amishonale kweniso akuwonere madera, wo awovyapu ŵanthu kuti abatiziki.c (Nthanthi 11:14; 15:22) Yiwu akonkhoska vo munthu yo wachitiska sambiru la Bayibolu kweniso munthu yo watimusambiza akhumbika kuchita kuti sambiru liluti panthazi. Mu nkhani iyi, tikambiskanengi vinthu vinkhondi vo wakusambira Bayibolu weyosi wakhumbika kuchita kuti wabatiziki.
MUSAMBIRENGI NAWU SABATA YEYOSI
Mupempheni yo musambira nayu asani wangasaniya malu ngo mungaja pasi ndi kulutirizga kukambiskana (Wonani ndimi 4-6)
4. Kumbi tikhumbika kuziŵanji pa nkhani yakusambira Bayibolu ndi ŵanthu kwa nyengu yimanavi?
4 Abali ndi azichi anandi atuma ŵaka wima asani achitiska masambiru nga Bayibolu. Kusambira Bayibolu ndi ŵanthu mu nthowa yeniyi nkhwamampha chifukwa kutovya kuti aje ndi mtima wakukhumba kuziŵa vinandi. Kweni kanandi nthowa yeniyi yichitiska kuti musambirengi ŵaka nayu mwakudumuwa kweniso sabata yeyosi cha. Kuti munthu waje ndi mtima wakukhumba kuziŵa vinandi, abali ndi azichi anyaki atimupempha kuti waŵapaski nambala ya foni. Pavuli paki, atimumbiya foni pamwenga kumulembe meseji ndi kukambiskana nayu mwakudumuwa fundu yinyaki ya mu Malemba. Kukambiskana nayu mu nthowa yeniyi kungalutiliya kwakanyengu, kweni kungawovya cha kuti sambiru la Bayibolu liluti panthazi. Kumbi munthu yo tisambira nayu wangajipereka kwaku Yehova kweniso kubatizika asani waleka kuŵikiyapu mtima ndipuso kumaliya nyengu yinandi pakusambira Mazu ngaku Chiuta? Awa.
5. Mwakukoliyana ndi Luka 14:27-33, kumbi Yesu wangukambanji vo vingatiwovya pa ntchitu yidu yakusambiza ŵanthu Bayibolu?
5 Nyengu yinyaki, Yesu wangukonkhoska vo munthu wakhumbika kuchita kuti waje wakusambira waki. Iyu wangukamba chakuyeruzgiyapu cha munthu yo wakhumba kuzenga nyumba yakuthopoka kweniso fumu yo yikhumba kuluta ku nkhondu. Yesu wangukamba kuti munthu yo wakhumba kuzenga nyumba, watenere “kuja dankha pasi ndi kuŵerengese kuti wawoni asani we ndi ndalama zakukwana” kuti wayimalizi. Ndipu fumu yitenere “kuja dankha pasi ndi kufumbiya zeru” kuti yiwoni asani asilikali ŵaki angafiska vo akhumba kuchita. (Ŵerengani Luka 14:27-33.) Mwakuyanana ŵaka, Yesu wanguziŵa kuti munthu yo wakhumba kuja wakusambira waki, watenere kuŵanaŵaniya mwakuphwere vo wakhumbika kuchita kuti waje wakusambira waki. Pa chifukwa chenichi, tikhumbika kuchiska ŵanthu wo tisambira nawu Bayibolu kuti tisambirengi nawu sabata yeyosi. Kumbi tingachita wuli venivi?
6. Kumbi tikhumbika kuchitanji kuti ŵanthu wo tisambira nawu aluti panthazi?
6 Lutirizgani kusambira nawu fundu zinandi ŵanthu wo musambira nawu mwama wima. Mwakuyeruzgiyapu, mumalu mwakukambiskana nawu vesi limoza mungakambiskana nawu mavesi ngaŵi. Asani mweneku wa nyumba wakondwa kukambiskana nayu nyengu yitali, mumupemphi asani pe malu nganyaki ngo wawona kuti mungaja pasi ndi kulutirizga kukambiskana. Vo mweneku wa nyumba wangamuka, vingalongo asani wawona kuti kusambira Bayibolu nkhwakukhumbika kwaku iyu pamwenga cha. Kuti mumuwovyi kusambira mwaliŵi, mungamufumba asani wangayanja kuti musambirengi nayu kaŵi pa sabata. Chinanga kuti veviyo, pe vinandi vo mukhumbika kuchita pade pakusambira nayu kamoza pamwenga kaŵi pa sabata.
MUNOZGEKIYENGI MWECHENDALUTI KUCHISAMBIRA NDI MUNTHU
Munozgekiyengi umampha sambiru ndipu mumulongongi yo musambira nayu mo wanganozgeke (Wonani ndimi 7-9)
7. Kumbi msambizi wangachita wuli kuti wanozgeke umampha sambiru lelosi?
7 Pakuŵa msambizi, mukhumbika kunozgeke umampha sambiru lelosi. Mungayamba kuŵerenga nkhani yo mwamusambira ndi munthu kweniso malemba ngo nge mu nkhani. Muvwisengi fundu zikulu zo ze mu nkhani. Muŵanaŵaniyengi mutu wa nkhani, timitu timanatimana, mafumbu, malemba ngo ngakulembeka kuti “ŵerengani,” vithuzi kweniso vidiyo yeyosi yo yikonkhoska nkhani yo mwamusambira ndi munthu. Pavuli paki muŵanaŵaniyengi mo mungachimukonkhoske mwakuvwika umampha kweniso mu nthowa yipusu. Venivi vingawovya kuti wakayivwisi umampha nkhani yo kweniso kuziŵa mo wangagwiriskiya ntchitu fundu zo wasambira.—Nehe. 8:8; Nthanthi 15:28a.
8. Kumbi mazu ngo Paulo wangukamba pa Akolose 1:9, 10, ngatitisambizanji pa nkhani yakupemphere munthu yo tisambira nayu Bayibolu?
8 Pa nyengu yo munozgeke, mupempherengi kwaku Yehova vakukwaskana ndi munthu yo musambira nayu. Mupemphengi Yehova kuti musambizengi fundu za mu Bayibolu mu nthowa yakuti zimufikengi pa mtima munthu yo musambira nayu. (Ŵerengani Akolose 1:9, 10.) Mutenere so kuŵanaŵaniya fundu zo zingachimusuzga kuvwisa kweniso zo wamuleka kukoliyana nazu. Nyengu zosi mukumbukengi kuti chilatu chinu nkhukhumba kumuwovya kuti wabatiziki.
9. Kumbi msambizi wangamuwovya wuli munthu yo wasambira nayu kuziŵa mo wanganozgeke sambiru? Konkhoskani.
9 Tikayika cha kuti fundu za mu Bayibolu zo tisambira ndi munthu kaŵikaŵi, zingamuwovya kuti wawongengi vo Yehova ndi Yesu akutichitiya. Ndipu pavuli paki, wangakhumba kuti wasambiri vinandi. (Mate. 5:3, 6) Kuti munthu yo tisambira nayu wayanduwengi ukongwa, watenere kuŵikiyapu maŵanaŵanu ngaki ngosi pa vo wasambira. Kuti wachiti venivi, mutenere kumukonkhoske kukhumbika kwakunozgeke sambiru lelosi. Iyu watenere kuŵerenge limu sambiru lo mwazamusambira nayu ndi kuŵanaŵaniyapu mo wangagwiriskiya ntchitu fundu zo wasambira. Kumbi mungamuwovya wuli kuziŵa mo wanganozgeke? Munganozgeke nayu limoza sambiru kuti mumulongo mo wanganozgeke pakuyija.d Mukonkhoskiyeni mo wangasaniliya kwamuka kwa fumbu pa ndimi. Kweniso mo wangagwaliya mzeri ku mazu ngo ngangamuwovya kuti wakumbukengi kwamuka kwa fumbu. Pavuli paki mungamukambiya kuti wamuki mu mazu ngaki. Asani wachita viyo, mungaziŵa kuti wayivwisa umampha nkhani yo pamwenga cha. Kweni pe chinthu chinyaki so cho mutenere kuchiska munthu yo musambira nayu kuti wachiti.
MUMUSAMBIZENGI KUTI WAKAMBISKANENGI NDI YEHOVA ZUŴA LELOSI
Musambizengi yo musambira nayu Bayibolu mo wangakambiskiyana ndi Yehova (Wonani ndimi 10-11)
10. Ntchifukwa wuli kuŵerenga Bayibolu zuŵa lelosi nkhwakukhumbika, nanga munthu yo musambira nayu, watenere kuchitanji kuti wayanduwengi ukongwa ndi vo waŵerenga?
10 Kusazgiyapu pakusambira Bayibolu sabata yeyosi, munthu yo tisambira nayu, wangayanduwa asani pakuyija wachita vinthu vinyaki zuŵa lelosi. Iyu watenere kukambiskana ndi Yehova zuŵa lelosi. Kumbi wangachita wuli venivi? Asani wavwisiya kwaku Yehova ndi kukambiskana nayu. Iyu wangavwisiya kwaku Chiuta mwakuŵerenga Bayibolu zuŵa lelosi. (Yoswa 1:8; Sumu 1:1-3) Mulongoni mo wangagwiriskiya ntchitu “Ndondomeku Yakuŵerenge Bayibolu,” yo ye pa jw.org.e Kweni kuti mumuwovyi kuti wayanduwengi ukongwa ndi vo waŵerenga mu Bayibolu, mumuchiskengi kuti waŵanaŵaniyengi vo wasambira vakukwaskana ndi Yehova, kweniso mo wangavigwiriskiya ntchitu pa umoyu waki.—Machi. 17:11; Yako. 1:25.
11. Kumbi munthu yo musambira nayu Bayibolu, wangachita wuli kuti waziŵi mo wangapemphere, nanga ntchifukwa wuli nkhwakukhumbika kuti wapempherengi kwaku Yehova kaŵikaŵi?
11 Mumuchiskengi munthu yo musambira nayu Bayibolu kuti wakambiskanengi ndi Yehova mwakupemphera zuŵa lelosi. Mupempherengi mwakutuliya pasi pa mtima mwechendayambi kusambira nayu kweniso asani mwamaliza ndipu mumuzumbuwengemu asani mupemphera. Asani wavwisiya po mupemphera, wangasambira mo wangapemphere kutuliya pasi pa mtima kweniso wangaziŵa kuti watenere kupemphera kwaku Yehova Chiuta kuziya mwaku Yesu Khristu. (Mate. 6:9; Yoha. 15:16) Ŵanaŵaniyani mo mungakondwe kuwona kuti, kuŵerenga Bayibolu zuŵa lelosi, (kung’anamuwa kuvwisiya kwaku Yehova) kweniso kupemphera (kung’anamuwa kukambiskana ndi Yehova) kungawovye munthu yo musambira nayu kuja pa ubwezi wakukho ndi Chiuta. (Yako. 4:8) Asani wangachita venivi zuŵa lelosi, vingamuwovya kuti waluti panthazi ndi kujipereka kwaku Yehova kweniso kubatizika.
MUMUWOVYENGI KUTI WAJE PA UBWEZI WAKUKHO NDI YEHOVA
12. Kumbi msambizi, wangamuwovya wuli munthu yo wasambira nayu kuti waje pa ubwezi wakukho ndi Yehova?
12 Tikhumba kuti munthu yo tisambira nayu wamuziŵi Yehova. Kweni vo wasambira vikhumbika kumufika pa mtima. Chifukwa wuli? Chifukwa asani vamufika pa mtima ndipu wangavigwiriskiya ntchitu pa umoyu waki. Yesu wasambizanga ŵanthu mu nthowa yakuti aŵanaŵaniyengepu pa vo asambira. Iyu waŵafikanga pa mtima ŵanthu. (Luka 24:15, 27, 32) Munthu yo tisambira nayu wakhumbika kuwona Yehova nge Munthu chayiyu yo wangaja nayu pa ubwezi wakukho. Ndipuso watenere kuwona Yehova nge Ada ŵaki, Chiuta waki kweniso Mubwezi waki. (Sumu 25:4, 5) Pa nyengu yo musambira nayu, mukonkhoskengi mwakuvwika umampha mijalidu yaku Chiuta. (Chitu. 34:5, 6; 1 Petu. 5:6, 7) Pa nkhani yeyosi yo musambira, mukonkhoskengi mo Yehova waliri. Mumuwovyengi munthu yo musambira nayu kuti wayanjengi mijalidu yaku Yehova nge chanju kweniso lisungu. Yesu wangukamba kuti “dangu likulu ukongwa kweniso lakwamba,” ‘nkhwanja Yehova Chiuta widu.’ (Mate. 22:37, 38) Muyesesengi kumuwovya kuti wamuyanjengi ukongwa Chiuta.
13. Kambani chakuyeruzgiyapu cha mo tingawovye munthu yo tisambira nayu kuti waziŵi mijalidu yaku Yehova.
13 Pa nyengu yo muchitiska sambiru la Bayibolu, mumukonkhoskiyengi munthu yo musambira nayu chifukwa cho mutanjiya Yehova. Ivi vingamuwovya kuziŵa kuti nayu wakhumbika kuja pa ubwezi ndi Chiuta kweniso kumuyanja. (Sumu 73:28) Mwakuyeruzgiyapu, kumbi mu kabuku ko musambira nayu mwe chiganizu chinyaki pamwenga lemba lo litikufikani pa mtima lo likonkhoska mijalidu yinyaki yaku Yehova nge chanju, zeru, urunji pamwenga nthazi? Asani ndi viyo, mulongoni yo musambira nayu ndipu mukambiyeni kuti chenichi ntchimoza mwa vifukwa vinandi vo vichitiska kuti muŵayanjengi Ada ŵidu akuchanya. Kweni pe so chinthu chinyaki cho wakusambira Bayibolu weyosi wakhumbika kuchita kuti wabatiziki.
MUMUCHISKENGI KUTI WAWUNGANENGI
Muchiskengi yo musambira nayu kuti wayambi kuwungana mwaliŵi! (Wonani ndimi 14-15)
14. Kumbi lemba la Aheberi 10:24, 25, lingamuwovya wuli yo tisambira nayu Bayibolu kuti waluti panthazi?
14 Tosi tikhumba kuti wo tisambira nawu Bayibolu, aluti panthazi mpaka kubatizika. Nthowa yakukhumbika ukongwa yo tingaŵawovye, nkhuŵachiska kuti awunganengi. Abali ndi azichi anyaki wo awovyapu ŵanthu mpaka kubatizika, akamba kuti akusambira Bayibolu wo ayamba liŵi kuwungana aluta panthazi mwaliŵi. (Sumu 111:1) Ndipu anyaki akambiya ŵanthu wo asambira nawu kuti asani aluta ku maunganu, amusambira fundu zinyaki zo aleka kusambira pa nyengu ya sambiru. Ŵerengani Aheberi 10:24, 25, limoza ndi munthu yo musambira nayu, ndipu mukonkhoskiyeni vitumbiku vo wangasaniya asani wangaluta ku maunganu. Muwoneseni vidiyo ya mutu wakuti, Kumbi ndi Vinthu Wuli vo Vichitika pa Nyumba ya Ufumu?f Ndipu muwovyeni kuti wawonengi kuti kuwungana ntchinthu chakukhumbika pa umoyu waki.
15. Kumbi tingachita wuli kuti tichiski munthu yo tisambira nayu kuti wawunganengi nyengu zosi?
15 Kumbi mungachita wuli asani yo musambira nayu wechendaluteku ku maunganu pamwenga walutaku ŵaka mwa po ndi po? Mwachanju, mukambiyeni vo mwasambira ku maunganu sabata yeniyo. Asani wawona mo yimwi muwone maunganu, vingamuchiska kuti nayu waluteku. Mupaskeni Chigongwi cha Alinda chakusambira kweniso Kabuku ka Unganu wa Umoyu Widu Wachikhristu Ndipuso Uteŵeti, vo tisambira pa maunganu mwezi weniwo. Mulongoni vo tisambirengi sabata yakulondopu ndipu mufumbeni kuti wakambi chigaŵa cho chamukondwesa ukongwa. Vo munthu uyu wamuwona ndi kuvwa kakwamba ku maunganu, vamuluska chechosi cho wakuwona ndi kuvwa ku chisopa chinyaki chechosi. (1 Akori. 14:24, 25) Iyu wamukumana ndi abali ndi azichi anyaki wo wangatoliyaku nkharu yawu yamampha kweniso wo angamuwovya kuti wabatiziki.
16. Kumbi ndi vinthu wuli vo tikhumbika kuchita kuti tiwovyi wo tisambira nawu Bayibolu kuti abatiziki, ndipu tazamusambiranji sabata yamawa?
16 Kumbi tingaŵawovya wuli ŵanthu wo tisambira nawu Bayibolu kuti abatiziki? Tingawovya yo tisambira nayu kuti wawonengi kukhumbika kwa vo wasambira, mwakumuchiska kuti tisambirengi nayu sabata yeyosi kweniso kuti wanozgekiyengi sambiru lelosi. Tikhumbika so kumuchiska kuti wakambiskanengi ndi Yehova zuŵa lelosi kweniso kuti waje nayu pa ubwezi. Ndipu titenere so kumuchiska kuti wawunganengi. (Wonani bokosi lakuti, “Vo Munthu yo Wasambira Bayibolu Wakhumbika Kuchita Kuti Wabatiziki,” lo le papeji 12.) Kweni nge mo tazamusambiriya mu nkhani ya sabata yamawa, pe so vinthu vinyaki 5 vo isi tisambiza anyidu Bayibolu tikhumbika kuchita, kuti tiŵawovyi kuti abatiziki.
SUMU 76 Kumbi Mutuvwa Wuli Asani Mupharazga?
a Kusambiza munthu kung’anamuwa kumuwovya kuti “waŵanaŵanengi pamwenga kuchita vinthu mwakupambana ndi mo wachitiyanga kali.” Lemba la chaka chinu cha 2020 la Mateyu 28:19, latikumbusa umampha wakusambira Bayibolu ndi ŵanthu, kweniso kuŵasambiza vo angachita kuti abatiziki ndi kuja akusambira aku Yesu Khristu. Mu nkhani iyi kweniso mu nkhani ya sabata yamawa, tiwonengi mo tingasazgiyaku lusu lidu pa ntchitu yakukhumbika yeniyi.
b VO MAZU NGANYAKI NGANG’ANAMUWA: Asani kanandi mukambiskana ndi munthu fundu za mu Bayibolu ndipu muchita venivi mwandondomeku, ndikuti muchitiska sambiru la Bayibolu. Mungalemba kuti mwe ndi sambiru la Bayibolu asani mwamulongo munthu mo sambiru la Bayibolu lichitikiya, ndipu mwasambira nayu maulendu ngaŵi. Venivi vingalongo kuti sambiru lo lilutiriyengi.
c Nkhani ziŵi zenizi, ze ndi masachizgu ngo ngenga mu nkhani yakuti, “Kuchititsa Maphunziro a Baibulo Opita Patsogolo,” yo yenga mu Uteŵeti Widu wa Ufumu wa Chichewa wa July 2004 mpaka May 2005.
d Woneriyani vidiyo ya maminiti 4 yakuti, Mo Tingasambiziya Wo Tisambira Nawu Bayibolu Kuti Anozgekiyengi. Pa JW Library®, lutani po palembeka kuti MEDIA > OUR MEETINGS AND MINISTRY > IMPROVING OUR SKILLS.
e Pa jw.org, lutani pa chigaŵa chakuti, ZIMENE BAIBULO LIMAPHUNZITSA > ZOKUTHANDIZANI POPHUNZIRA BAIBULO.
f Pa JW Library®, lutani po palembeka kuti MEDIA > OUR MEETINGS AND MINISTRY > TOOLS FOR THE MINISTRY.