“Ndereni kufupi ndi Chiuta, ndipu nayu wanderengi kufupi ndi yimwi.”—Yakobe 4:8.

Kumbi Chiuta Watuvwa Mapempheru Ngidu?

Kumbi mukujifumbapu asani Chiuta watuvwa mapempheru nginu? Asani ndi viyo, mwe mwija cha. Ŵanthu anandi apemphera kwaku Chiuta vakukwaskana ndi masuzgu nganyaki, kweni masuzgu ngamala cha. Kumbi venivi ving’anamuwa kuti Chiuta wasulaku waka mapempheru ngidu? Awa! Bayibolu lititisimikiziya kuti Chiuta wavwisiya asani tipemphera kwaku iyu munthowa yakwenere. Tiyeni tiwoni vo Bayibolu likamba.

CHIUTA WAVWISIYA.

“Yimwi Wakuvwa pempheru, ŵanthu amitundu yosi azengi kwaku yimwi.”—Salimo 65:2.

Ŵanthu anyaki akamba kuti apemphera chifukwa chakuti atuvwa umampha, chinanga kuti agomezga cha kuti pe munthu munyaki yo watiŵavwisiya. Kweni pempheru ntchinthu cho chititiwovya kuti tivwengi waka umampha cha ndi chilatu chakuti tikunthiyepu masuzgu. Bayibolu lititisimikiziya kuti “Yehovaa we pafupi ndi wosi wo atimudana, wosi wo atimudana mu uneneska. . . . Watuvwa kuliya kwawu kwakupempha chovyu.”—Salimo 145:18, 19.

Mwaviyo, tingasimikiza kuti Yehova Chiuta watuvwa mapempheru nga ŵanthu ŵaki wo atimusopa. Ndipu mwachanju iyu wakamba kuti: “Mwazakundidana, mwazamukuza kwaku ini kweniso, mwazamupemphera kwaku ini ndipu ndazakukuvwisiyani.”—Yeremiya 29:12.

**CHIUTA WAKHUMBA KUTI MUPEMPHERENGI KWAKU IYU.**

Ada ŵe pafupi ndi mwana wawu munthukazi po waseŵe ndi vidoli.

“Mufwiyengepu kupemphera.”—Aroma 12:12.

Bayibolu lititichiska kuti ‘tilutirizgi kupemphera’ kweniso kuti ‘tipempherengi pa chakuchitika chechosi.’ Yapa, viwoneke limu kuti Yehova Chiuta wakhumba kuti tipempherengi kwaku iyu.—Mateyu 26:41; Aefeso 6:18.

Ntchifukwa wuli Chiuta wakhumba kuti tipempherengi kwaku iyu? Ŵanaŵaniyani chakuyeruziyapu ichi: Kumbi ndi mpapi nuyu yo wakhumba cha kuti mwana waki wamupemphi kuti “wamuwovyi”? Mbuneneska kuti Ada angaŵa kuti aziŵa kali vo mwana wawu wakhumbikiya pamwenga mo wavwiya. Kweni asani mwana wawu waŵapempha, vilongo kuti watiŵathemba kweniso kuti we nawu pa ubwezi. Mwakuyanana waka, asani tipemphera kwaku Yehova Chiuta, tilongo kuti titimuthemba kweniso kuti tikhumba kuja nayu pa ubwezi.—Nthanthi 15:8; Yakobe 4:8.

CHIUTA WATIKUŴANAŴANIYANI.

Munthu yo wagwira ntchitu wakuguŵa ndipu waja pa masitepusi. Iyu wako katoni yo mwe vinthu vaki vo wagwiriskiya ntchitu ku ofesi.

‘Muponyengi paku iyu vosi vo vitikufipiskani mtima, chifukwa iyu watikuŵanaŵaniyani.’—1 Peturo 5:7.

Chiuta wakhumba kuti tipempherengi kwaku iyu, chifukwa chakuti watitiyanja kweniso watitiŵanaŵaniya. Iyu waziŵa umampha masuzgu ngo tikumana nangu ndipuso vinthu vinyaki vo vititifipiska mtima, ndipu wakhumba kutiwovya.

Kwa umoyu waki wosi, Fumu Davidi yapempheranga kwaku Chiuta kuti wayiwovyi. Ndipu iyu yamukambiyanga maŵanaŵanu ngaki kweniso mo yavwiyanga. (Salimo 23:1-6) Kumbi Chiuta wamuwonanga wuli Davidi? Chiuta wamuyanjanga Davidi ndipu wavwisiyanga mapempheru ngaki nganandi. (Machitidu 13:22) Mwakuyanana waka, Chiuta wavwisiya mapempheru ngidu chifukwa chakuti watitiŵanaŵaniya.

“NDITANJA YEHOVA CHIFUKWA WATUVWA MAZU NGANGU”

Mazu ngenanga, ndingu wangukamba munthu munyaki yo wangulembaku buku la Masalimo. Iyu waziŵanga kuti Chiuta wavwisiya mapempheru ngaki ndipu venivi vingumuwovya ukongwa. Pempheru lingumuwovya kuja pa ubwezi ndi Chiuta kweniso lamuwovyanga kusaniya nthazi kuti wakunthiyepu masuzgu ndipuso chitima.—Salimo 116:1-9.

Asani tileka kukayika kuti Chiuta watuvwa mapempheru ngidu, tilekengi cha kupemphera kwaku iyu. Wonani vo vinguchitikiya Pedro yo waja kunkhondi kwa charu cha Spain. Mwana waki munthulumi wavyaka 19, wangufwa pa ngozi ya galimotu. Pa nyengu yakusuzga yeniyi, Pedro wangukambiya Chiuta vo venga mumtima mwaki, ndipu wapempheranga kwaku iyu mwakuwerezawereza kuti wamupembuzgi kweniso kumuwovya. Kumbi ntchinthu wuli cho chinguchitika? Pedro wanguti: “Yehova wangumuka mapempheru ngangu kuziya mwa Akhristu anyidu. Ini ndi muwolu wangu, abali ŵenaŵa angutipembuzga kweniso kutiwovya pa nyengu yakusuzga yeniyi.”

Munthu yo we ndi chitima wakoleze chithuzi penipo anyaki atimupembuzga. — Kanandi Chiuta wamuka mapempheru ngidu kuziya mwa anyidu wo atitipembuzga kweniso kutiwovya

Chinanga kuti mwana waku Pedro wanguyuka cha, kweni pempheru lingumuwovya ukongwa iyu ndi ŵanthu a mu banja laki. Muwolu waki María Carmen wakumbuka vinthu vo vinguchitika pa nyengu iyi. Iyu wanguti: “Pempheru lingundiwovya kuti ndikunthiyepu chitima cho ndenga nachu. Ndaziŵanga kuti Yehova Chiuta watindivwisa, chifukwa asani ndapemphera, ndaŵanga ndi chimangu cha mumtima.”

Bayibolu kweniso vinthu vo ŵanthu anandi akumanapu navu pa umoyu wawu, vilongore limu kuti Chiuta watuvwa mapempheru. Kweni Bayibolu lilongo so kuti Chiuta wamuka mapempheru ngosi cha. Ntchifukwa wuli Chiuta wamuka mapempheru nganyaki penipo nganyaki wamuka cha?

a Yehova ndilu zina laku Chiuta.—Salimo 83:18.