Ntchifukwa Wuli Chiuta Wamuka Mapempheru Ngosi Cha?
Yehova Chiuta Ada ŵidu akuchanya, mbakukhumbisiska kweniso akondwa kuvwisiya mapempheru ngidu ngakutuliya pasi pa mtima. Kweni pe vinthu vinyaki vo vingachitiska kuti yiwu aleki kumuka mapempheru ngidu. Kumbi vinthu vaki ndi nivi? Nanga tikhumbika kukumbukanji asani tipemphera? Wonani ulongozgi unyaki wa mu Bayibolu.
“Pakupemphera ungawerezangawerezanga ŵaka cha.”—Mateyu 6:7.
Yehova wakhumba kuti tingawerezanga cha mapempheru ngo tikuchita kuloŵeza pamwenga kuŵerenga mu buku. Mumalu mwaki, wakhumba kuti tipempherengi kutuliya pasi pa mtima. Ŵanaŵaniyani mo mungavwiya asani mubwezi winu watikukambiyani waka mazu ngamozangamoza pe zuŵa lelosi. Mabwezi ngamampha ngafwatuka kweniso ngakamba kutuliya pasi pa mtima. Mwakuyanana waka, asani tipemphera mu mazu ngidu, tilongo kuti Awisefwi akuchanya mbabwezi ŵidu.
“Ndipu asani mupempha, mulonde cha chifukwa chakuti mupempha ndi chilatu chiheni.”—Yakobe 4:3.
Tingalindizganga cha kuti Chiuta wamukengi mapempheru ngidu asani tipemphe dala vinthu vo tiziŵa kuti iyu wakhumba cha kuti tichitengi pamwenga kuti tije navu. Mwakuyeruzgiyapu, kumbi Yehova wangavwa mapempheru nga ŵanthu wo atchaya juga kuti asaniyi ndalama penipo iyu wakutcheŵeske limu kuti tikhumbika cha kuchita mbunu kweniso vamasenga kuti tisaniyi mwaŵi? (Yesaya 65:11; Luka 12:15) Tingalindizganga cha kuti Yehova wamukengi mapempheru ngaviyo. Kweni kuti Chiuta wamukengi mapempheru ngidu, tikhumbika kupempha mwakukoliyana ndi marangu ngo watitikambiya mu Bayibolu.
“Munthu yo wakana kuvwiya dangu, chinanga ndi pempheru laki, ndaukazuzi.”—Nthanthi 28:9.
Mu nyengu yakali, Chiuta wamukanga cha mapempheru nga ŵanthu wo alekanga kuvwiya marangu ngaki nga urunji. (Yesaya 1:15, 16) Iyu wakusintha cha. (Malaki 3:6) Asani tikhumba kuti Chiuta wamukengi mapempheru ngidu, tikhumbika kuchita vo tingafiska kuti tivwiyengi marangu ngaki. Nanga wuli asani kuvuli tingunangisapu vinthu vinyaki? Kumbi venivi ving’anamuwa kuti Yehova wangavwisiya cha mapempheru ngidu? Awa! Chiuta wangatigowoke asani talapa, ndikuchita vosi vo tingafiska kuti timukondwesi.—Machitidu 3:19.