Vo Akuŵerenga Afumba

Ntchifukwa wuli lemba la 2 Samuyeli 21:7-9 likamba kuti Davidi ‘wangumulongo lisungu Mefiboseti’ kweni pavuli paki wangupereka Mefiboseti kuti wabayiki?

Ŵanthu anyaki wo atiyiŵerenga waka mwaliŵiliŵi nkhani iyi afumba fumbu lenili. Kweni mavesi yanga ngazumbuwa ana Mefiboseti ŵaŵi, ndipu tingasambirapu chinthu chinyaki asani tingawona vo vinguchitika.

Fumu Sauli ya ku Isirayeli yenga ndi ŵana anthulumi 7 kweniso anthukazi ŵaŵi. Mwana wakwamba waku Sauli wenga Yonatani. Pavuli paki, fumu yenga ndi mwana munthulumi zina laki Mefiboseti, yo yingubaliya paku Rizipa mbilika yaki. Chakukondwesa ntchakuti Yonatani nayu wenga ndi mwana munthulumi zina laki Mefiboseti. Mwaviyo, Fumu Sauli yenga ndi mwana zina laki Mefiboseti kweniso mzuku yo wenga so ndi zina lenili.

Nyengu yinyaki, Fumu Sauli yinguyukiya Agibiyoni wo ajanga pakati pa Ayisirayeli ndipu yakhumbanga kuŵamaliya limu wosi. Viwoneka kuti anandi aku yiwu angubayika. Vo iyu wanguchita venga viheni ukongwa. Chifukwa wuli? Chifukwa mu nyengu yaku Yoswa, alongozgi ŵa Ayisirayeli anguchita nawu phanganu la chimangu Agibiyoni.​—Yoswa 9:3-27.

Dangu ili lenga leche kugwira ntchitu mu nyengu ya Fumu Sauli. Mwakupambana ndi phanganu lenili, fumu yakhumbanga kupulutuwa Agibiyoni wosi. Ivi vinguchitiska kuti ‘Sauli kweniso nyumba yaki, aje ndi mulandu wa ndopa.’ (2 Samu. 21:1) Pakumaliya, Davidi wanguja fumu. Agibiyoni wo anguleka kubayika, angukambiya Davidi vinthu viheni vo Sauli wanguchita. Davidi wanguŵafumba vo akhumbanga kuti alipiriki chifukwa cha vinthu viheni ukongwa vo Sauli wanguchita ndipu venivi vinguchitiska kuti Yehova watumbiki charu cha Isirayeli. Mumalu mwakupempha ndalama, Agibiyoni angupempha kuti ŵana 7 aku Sauli wo ‘angunozga chiŵembu chakuti aŵamaliyi limu’ aperekeki ndi kubayika. (Nume. 35:30, 31) Davidi wanguzomereza vo yiwu angupempha.​—2 Samu. 21:2-6.

Yapa ndipu Sauli ndi Yonatani ŵafwa kunkhondu, kweni Mefiboseti mwana waku Yonatani wenga weche wamoyu. Iyu wenga wakupunduka weche mwana chifukwa cha ngozi, ndipu wanguŵawovyaku cha ambuyaki pa nyengu yo abayanga Agibiyoni. Davidi wanguchita phanganu ndi Yonatani lakuti alutirizgengi kwanjana, lo latingi liziwovyengi mphapu yaki, kusazgapu Mefiboseti, mwana waku Yonatani. (1 Samu. 18:1; 20:42) Nkhani iyi yikamba kuti: ‘Fumu [Davidi] yingumulongo lisungu Mefiboseti, mwana waku Yonatani mwana waku Sauli, chifukwa cha layizgu lo yinguchita pa masu paku Yehova.’​—2 Samu. 21:7.

Kweni Davidi wanguchitapu kanthu pa vo Agibiyoni angupempha. Iyu wangupereka ŵana ŵaŵi aku Sauli, ndipu yumoza mwaku yiwu wadanikanga kuti Mefiboseti kweniso azuku ŵaki aku Sauli ankhondi. (2 Samu. 21:8, 9) Vo Davidi wanguchita vinguchitiska kuti mulandu wa ndopa umali mucharu cha Isirayeli.

Nkhani iyi, ndi mbiri waka cha. Dangu laku Chiuta lenga la kuvwika umampha. Ilu lakambanga kuti: “Ŵana angabayikanga cha chifukwa cha vo awusewu achita.” (Doto. 24:16) Yehova watingi wazomerezengi cha vo vinguchitikiya ŵana ŵaŵi aku Sauli kweniso azuku ŵaki ankhondi, asani yiwu ŵengavi mulandu. Dangu lakambanga so kuti: “Munthu weyosi watenere kubayika chifukwa cha ubudi waki.” Viwoneka kuti ŵana ŵaŵi aku Sauli kweniso azuku ŵaki ankhondi wo angubayika, angumuwovya Sauli pa nyengu yo wabayanga Agibiyoni.

Nkhani iyi yilongo kuti munthu wangaŵa mbwenu ndi mulandu chifukwa cha vinthu viheni vo wachita, chinanga kuti wangaŵanaŵana pamwenga kukamba kuti achita kumutuma kuti wachiti vinthu vo. Nthanthi yinyaki yikamba kuti: “Nozga nthowa ya maphazi ngaku, ndipu nthowa zaku zosi zijengi zambula kukayikisa.”​—Nthanthi 4:24-27; Aefe. 5:15