Kumbi Buku la Chivumbuzi Litikukwaskani Wuli Mazuŵa Nganu?

1-2. Kumbi ntchifukwa chakwamba nichi cho chititichitiska kuti tikhumbisiskengi kuŵerenga buku la Chivumbuzi?

KUMBI nyengu yinyaki mungupemphekapu kuti muwoni vithuzi mu alubamu ya munthu munyaki? Po muwona vithuzi venivi, muwona visku va ŵanthu anandi wo mutiŵaziŵa cha. Kweni muchifika pa chithuzi chinyaki, mutichilereseska ukongwa. Chifukwa wuli? Chifukwa chakuti namwi mwe pa chithuzi chenichi. Muchilereska chithuzi ichi, mutesesa kukumbuka nyengu kweniso malu ngo chingujambulikiya. Ndipuso mukumbuka weyosi yo mwenayu pa chithuzi chenichi. Chithuzi ichi ntchakukhumbika ukongwa kwaku yimwi.

² Buku la Chivumbuzi lenge chithuzi chenichi. Chifukwa wuli? Tikamba viyo pa vifukwa viŵi ivi. Chakwamba, buku la mu Bayibolu ili likulembeke isi. Mu vesi lakwamba, tiŵerenga kuti: “Chivumbuzi chakuperekeka ndi Yesu Khristu, cho Chiuta wangumupaska kuti walongo akapolu ŵaki vinthu vo vitenere kuchitika pambula kuswera.” (Chivu. 1:1) Mwaviyo, vo vikulembeka mubuku ili, vikulembeke ŵanthu bweka cha, kweni isi ateŵeti akujipereka aku Chiuta. Nge ŵanthu aku Chiuta, tizizwa cha kuziŵa kuti nasi tifiskaku mauchimi nga mubuku lakukondwesa lenili. Mwaviyo, asani tiŵerenga buku la Chivumbuzi, venge kuti nasi “te pa chithuzi.”

3-4. Mwakukoliyana ndi buku la Chivumbuzi, kumbi mauchimi ngaki ngazamufiskika zukwanji, nanga venivi vitenere kutichiska kuchitanji?

³ Chifukwa chachiŵi, chikwaska nyengu yo mauchimi ngenanga ngazamufiskikiya. Wakutumika Yohane wangulongo nyengu yeniyi po wangukamba kuti: “Mwa mzimu, ndingusanirika kuti nde mu zuŵa la Ambuya.” (Chivu. 1:10) Pa nyengu yo Yohane walembiyanga mazu yanga cha m’ma 96 C.E., ndipu “zuŵa la Ambuya” leche kutali ukongwa. (Mate. 25:14, 19; Luka 19:12) Kweni mwakukoliyana ndi uchimi wa mu Bayibolu, zuŵa ili lingwamba mu 1914, Yesu wati waja Fumu kuchanya. Kwambiya chaka chenichi kuluta kunthazi, mauchimi nga mubuku la Chivumbuzi ngo ngakwaska ŵanthu aku Chiuta, ngangwamba kufiskika. Yapa, tingakamba kuti sonu te nadi mu “zuŵa la Ambuya.”

⁴ Chifukwa chakuti tija mu nyengu yapade yeniyi, tikhumbika kuŵika ukongwa maŵanaŵanu pa ulongozgi wachanju wo we pa Chivumbuzi 1:3, wakuti: “Ngwakukondwa munthu yo waŵerenga mwakukweza, kweniso mbakukondwa ŵanthu wo atuvwa mazu nga uchimi uwu ndipuso wo asunga vinthu vo vikulembeka mwenimo, pakuti nyengu yakuŵikika ye pafupi.” Kukamba uneneska, tikhumbika ‘kuŵerenga mwakukweza,’ ‘kuvwa mazu nga uchimi uwu’ kweniso ‘kungasunga.’ Kumbi ndi mazu nganyaki nanga ngo tikhumbika kungasunga?

MUYESESENGI KUTI KUSOPA KWINU KUJENGI KWAKUZOMEREZEKA KWAKU YEHOVA

5. Kumbi buku la Chivumbuzi lididimizga wuli kukhumbika kwa kuyesesa kuti Yehova wazomerezi kusopa kwidu?

⁵ Kwambiya chaputala 1 cha buku la Chivumbuzi, tisambira kuti Yesu waziŵa umampha vo vichitika mumipingu ya ŵanthu ŵaki. (Chivu. 1:12-16, 20; 2:1) Yesu wangulongo venivi kuziya mu mauthenga ngo wakupereka ku mipingu 7 ya ku Asia Minor. Mu mauthenga yanga, iyu wangupereka ulongozgi wambula kuyeŵapu mani kuti wawovyi Akhristu a mu nyengu ya akutumika kuti ayesesengi kuti kusopa kwawu kuje kwakuzomerezeka kwaku Yehova. Ndipu vo vingukambika mu mauthenga yanga vikwaska so ŵanthu wosi aku Chiuta mazuŵa nganu. Kumbi isi tisambiranji penapa? Mulongozgi widu Khristu Yesu, waziŵa umampha asani te pa ubwezi wamampha ndi Yehova pamwenga cha. Yesu watitivikiliya kweniso kutilongozga, ndipu wawona chechosi. Iyu waziŵa vo tikhumbika kuchita kuti Yehova walutirizgi kutiyanja. Kumbi wangupereka ulongozgi nuwu wo tikhumbika kuwusunga mazuŵa nganu?

6. (a) Mwakukoliyana ndi mazu ngaku Yesu nga pa Chivumbuzi 2:3, 4, kumbi mpingu wa ku Efeso wenga ndi suzgu wuli? (b) Kumbi isi tisambiranjipu?

⁶ Ŵerengani Chivumbuzi 2:3, 4. Tingalekanga cha kumuyanja Yehova nge mo tachitiyanga pakwamba. Uthenga wo Yesu wangupereka ku mpingu wa ku Efeso ungulongo kuti yiwu angulongo kuti mbakukunthiyapu kweniso kuti angulutirizga kuteŵete Yehova chinanga kuti akumananga ndi masuzgu ngakupambanapambana. Chinanga kuti venga viyo, yiwu anguleka chanju cho ŵenga nachu pakwamba. Yiwu akalekengi kuja so ndi chanju cho ŵenga nachu pakwamba, kusopa kwawu kwatingi kuŵengi kwambula kuzomerezeka. Mazuŵa nganu napu, tikhumbika kuchita vinandi kuluska waka kukunthiyapu. Tikhumbika kukunthiyapu pa vifukwa vakwenere. Chiuta widu wakondwa waka ndi vo tichita pe cha, kweniso chifukwa cho titivichitiya. Vilatu vidu vakukhumbika ukongwa kwaku iyu pakuti wakhumba kuti timusopengi chifukwa chakuti titimuyanja ukongwa ndipuso titimuwonga.​—Nthanthi 16:2; Mariko 12:29, 30.

7. (a) Nge mo palongore pa Chivumbuzi 3:1-3, kumbi Yesu wangusaniya kuti mpingu wa ku Sade we ndi suzgu wuli? (b) Kumbi tikhumbika kuchitanji?

⁷ Ŵerengani Chivumbuzi 3:1-3. Titenere kulutirizga kuja masu. Ŵanthu a mpingu wa ku Sade, nawu ŵenga ndi suzgu lawu. Chinanga kuti kuvuli ateŵetiyanga Chiuta mwaphamphu, kweni pa nyengu iyi anguwere vuli. Mwaviyo, Yesu wanguŵakambiya kuti ‘aje masu.’ Kumbi isi tisambiranjipu penapa? Mbuneneska kuti Yehova waluwengi cha ntchitu yidu. (Ahe. 6:10) Kweni tikhumbika cha kuŵanaŵana kuti chifukwa chakuti tinguteŵete Yehova kuvuli ndikuti sonu tikhumbika cha kumuteŵete. Chinanga tingaŵa kuti sonu tichita vinandi cha nge mo tachitiyanga kali, tikhumbika kutangwanika mu “ntchitu ya Ambuya,” kulutirizga kuja masu kwamba sonu mpaka pakumaliya.​—1 Akori. 15:58; Mate. 24:13; Mariko 13:33.

8. Kumbi tisambiranji pa vo Yesu wangukambiya abali a ku Lawodikaya pa Chivumbuzi 3:15-17?

⁸ Ŵerengani Chivumbuzi 3:15-17. Titenere kusopa Yehova mwaphamphu kweniso ndi mtima wosi. Uthenga waku Yesu wakuluta ku ŵanthu a ku Lawodikaya ungudidimizga kuti nawu ŵenga ndi suzgu lawu. Yiwu ŵenga ‘akuluputuka’ pa nkhani yakusopa. Chifukwa chakuti ŵengavi linweka, Yesu wanguŵakambiya kuti ŵenga ‘akusuzgika kweniso akuchitiska lisungu.’ Yiwu akhumbikanga kuchita phamphu ukongwa pakuteŵete Yehova kweniso kumusopa. (Chivu. 3:19) Kumbi isi tisambiranjipu? Asani phamphu lidu ndimana pasonu panu, tikhumbika kuwonga ukongwa vinthu vauzimu vo Yehova watitipaska. (Chivu. 3:18) Tingazomerezanga cha kuti kupenja umoyu wapachanya kutitimbanyizgi, mpaka kutitondekesa kuŵika vinthu vauzimu pamalu ngakwamba.

9. Nge mo ngalongore mauthenga ngaku Yesu ngakuluta kwa Akhristu a ku Pegamo ndi Tiyatira, kumbi tikhumbika kukhwechanji?

⁹ Titenere kukana vo ampatuku asambiza. Yesu wanguchenya ŵanthu anyaki a ku Pegamo wo achiskanga anyawu kuti ayendiyengi zeru za ŵanthu kweniso kwambisa timagulu takugaruka. (Chivu. 2:14-16) Iyu wanguwonga ŵanthu a ku Tiyatira wo angukhwecha “vinthu vandimba vaku Satana” ndipu wanguŵachiska kuti ‘akolesi’ uneneska. (Chivu. 2:24-26) Akhristu akulopwa mumipingu yeniyi wo angwamba kulondo visambizu vaboza akhumbikanga kulapa. Nanga isi mazuŵa nganu? Tikhumbika kukana chisambizu chechosi cho chisuskana ndi maŵanaŵanu ngaku Yehova. Ampatuku ‘angawoneka nge mbakujipereka kwaku Chiuta’ kweni ‘nthazi yakujipereka kwenuku atiyikana.’ (2 Timo. 3:5) Asani tiŵerenga Mazu ngaku Chiuta mwaphamphu, vingatisuzga cha kuziŵa visambizu vaboza ndipuso kuvikana.​—2 Timo. 3:14-17; Yuda 3, 4.

10. Kumbi ntchinthu wuli so chinyaki cho tisambira pa vo Yesu wangukambiya mipingu ya ku Pegamo ndi Tiyatira?

¹⁰ Tingazomerezanga cha pamwenga kuchita mtundu wewosi wa ureŵi. Ku Pegamo ndi ku Tiyatira kwenga so suzgu linyaki. Yesu wanguchenya ŵanthu anyaki a mumipingu yeniyi chifukwa chakuti akananga cha ureŵi. (Chivu. 2:14, 20) Kumbi isi tisambiranjipu? Yehova wangakondwa nasi cha asani tichita vinthu vakukwaskana ndi ureŵi, chinanga kuti taja tichimuteŵete kwa vyaka vinandi ndipu pasonu te ndi maudindu nganandi. (1 Samu. 15:22; 1 Petu. 2:16) Iyu wakhumba kuti tiyesesengi kulondo fundu zaki zapachanya za mijalidu yamampha, chinanga kuti mijalidu ya charu ichi yafika paheni ukongwa.—Aefe. 6:11-13.

11. Kumbi kufika yapa tasambiranji? (Wonani so bokosi lakuti, “Vo Tisambirapu Mazuŵa Nganu.”)

¹¹ Kumbi tingakamba kuti tasambiranji kufika yapa? Tawona kuti tikhumbika kwesesa kuti kusopa kwidu kuje kwakuzomerezeka kwaku Yehova. Asani tichita chinthu chinyaki cho chingachitiska kuti kusopa kwidu kuje kwambula kuzomerezeka, tikhumbika kuchitapu kanthu mwaliŵi kuti tinozgi vinthu. (Chivu. 2:5, 16; 3:3, 16) Kweni Yesu wangukamba so chinthu chinyaki mu mauthenga ngaki ngakuluta ku mipingu. Kumbi ntchinthu wuli?

MUJENGI AKUNOZGEKA KUKUNTHIYAPU KUTOMBOZGEKA

12. Kumbi tingasambiranji pa vo Yesu wangukambiya abali a ku Simuna ndi Filadefiya? (Chivumbuzi 2:10)

¹² Sonu tiyeni tikambiskani mauthenga ngo Yesu wangutumiza ku mipingu ya ku Simuna ndi Filadefiya. Iyu wangukambiya Akhristu a kwenuku kuti angawopanga kutombozgeka cha chifukwa Yehova wazakuŵatumbika asani alutirizgengi kuja akugomezgeka. (Ŵerengani Chivumbuzi 2:10; 3:10.) Kumbi isi tisambiranjipu mazuŵa nganu? Tikhazgengi kutombozgeka ndipu tijengi akunozgeka kukunthiyapu. (Mate. 24:9, 13; 2 Akori. 12:10) Ntchifukwa wuli kuziŵa venivi nkhwakukhumbika?

13-14. Kumbi ŵanthu aku Chiuta akwaskika wuli ndi vo vikonkhoskeka mu Chivumbuzi chaputala 12?

¹³ Buku la Chivumbuzi lititikambiya kuti ŵanthu aku Chiuta azamutombozgeka mu “zuŵa la Ambuya,” kung’anamuwa mu nyengu yidu yinu. Chivumbuzi chaputala 12 chikamba kuti kuchanya kunguchitika nkhondu, Ufumu waku Chiuta wati wajalikiskika waka. Mikayeli yo ndi Yesu Khristu limoza ndi angelu ŵaki, anguchita nkhondu ndi Satana kweniso viŵanda. (Chivu. 12:7, 8) Mwaviyo, arwani aku Chiuta ŵenaŵa anguthereskeka ndi kuponyeka pacharu chapasi ndipu achitiska masuzgu nganandi pacharu. (Chivu. 12:9, 12) Kweni kumbi venivi vaŵakwaska wuli ateŵeti aku Chiuta?

¹⁴ Pavuli paki, buku la Chivumbuzi lititikambiya mo Satana wachitiya. Iyu wangaluta so cha kuchanya, mwaviyo, wakwiyiya akusankhika wo ŵeche pacharu chapasi, wo amiya Ufumu waku Chiuta ndipuso “agwira ntchitu yakupereka ukaboni wakukwaskana ndi Yesu.” (Chivu. 12:17; 2 Akori. 5:20; Aefe. 6:19, 20) Kumbi uchimi wenuwu wafiskika wuli?

15. Kumbi mbayani wo amiyanga ‘akaboni ŵaŵi’ wo akambika mu Chivumbuzi chaputala 11, nanga ndi vinthu wuli vo vinguŵachitikiya?

¹⁵ Satana wanguchitiska kuti arwani aku Chiuta ayukiyi abali akusankhika wo alongozganga pa ntchitu yakupharazga Ufumu. Abali ŵenaŵa amiyanga ‘akaboni ŵaŵi’ wo akambika kuti angubayika.b (Chivu. 11:3, 7-11) Mu 1918, abali 8 wo alongozganga angumbika mulandu wa boza ndipu weyosi angumuyeruzga kuti wakaje mujeri kwa nyengu yitali. Ŵanthu anguwona nge kuti ntchitu ya abali ŵenaŵa “yabayika.”

16. Kumbi ntchinthu chakuziziswa nichi cho chinguchitika mu 1919, kweni kumbi Satana walutirizga kuchitanji kwambiya nyengu yeniyi?

¹⁶ Uchimi wa mu Chivumbuzi chaputala 11, ukamba so kuti ‘akaboni ŵaŵi’ azamuja so ndi umoyu asani pajumpha nyengu yimanavi. Kuti uchimi uwu ufiskiki, panguchitika chinthu chinyaki chakuziziswa pati pajumpha waka nyengu yimanavi kutuliya po abali yaŵa anguŵikikiya mujeri. Kukwambiriya kwa chaka cha 1919, abali akusankhika ŵenaŵa angutuzgika mujeri ndipu pavuli paki mulandu wawu ungumala. Nyengu yeniyo, abali yaŵa angwamba so kulongozga pa ntchitu ya Ufumu. Kweni venivi vinguchitiska cha kuti Satana waleki kuyukiya ŵanthu aku Chiuta. Kwambiya nyengu yeniyi, Satana waphongole “msinji” wakutombozga ku ŵanthu wosi aku Chiuta. (Chivu. 12:15) Kukamba uneneska, ‘yapa ndipu weyosi waku isi wakhumbika kukunthiyapu ndipuso kuŵa ndi chivwanu.’​—Chivu. 13:10.

MUGWIRENGEKU MWAKUKWANA NTCHITU YO YEHOVA WATIPASKA

17. Kumbi ŵanthu aku Chiuta alonde chovyu wuli kutuliya kunyaki chinanga kuti Satana watiŵayukiya?

¹⁷ Chivumbuzi chaputala 12 chilongo kuti ŵanthu aku Chiuta azamulonde chovyu kutuliya kunyaki. Vazamuja nge kuti “charu” chameza “msinji” wakutombozga. (Chivu. 12:16) Venivi ndivu vaja vichichitika. Nyengu zinyaki, vigaŵa vinyaki va charu chaku Satana, nge akweruzga milandu anyaki, ayeruzga mwazeru, vo vichitiska kuti ŵanthu aku Chiuta ataskiki. Kanandi, ateŵeti aku Yehova aja achiwina milandu ku makhoti, vo vachitiska kuti aje ndi wanangwa. Kumbi yiwu awugwiriskiya wuli ntchitu wanangwa wenuwu? Yiwu agwiriskiya ntchitu mwakukwana mpata wewosi pakuchita ntchitu yo Yehova waŵapaska. (1 Akori. 16:9) Kumbi ntchitu yeniyi yisazganjipu?

18. Kumbi ntchitu yidu yikulu mu mazuŵa nganu ngakumaliya ndi niyi?

¹⁸ Yesu wangukambiya limu kuti ŵanthu ŵaki azamupharazga “uthenga wamampha . . . wa Ufumu [waku Chiuta]” pacharu chosi chapasi umaliru wechendazi. (Mate. 24:14) Pakupharazga, yiwu atovyeka ndi angelu wo akambika kuti ŵe ndi ‘uthenga wamampha wamuyaya, wakuti apharazgi ku ŵanthu wo aja pacharu chapasi, ku mtundu wewosi, fuku lelosi, lilimi lelosi ndipuso ku ŵanthu wosi.’—Chivu. 14:6.

19. Kumbi ŵanthu wo atanja Yehova akhumbika so kupharazga uthenga unyaki nuwu?

¹⁹ Ŵanthu aku Chiuta akhumbika kupharazga uthenga wamampha wa Ufumu pe cha. Yiwu akhumbika so kovya ntchitu ya angelu wo akonkhoskeka mu Chivumbuzi chaputala 8 mpaka 10. Angelu ŵenaŵa apharazga masoka ngo ngazamuwiya ŵanthu wo akana Ufumu waku Chiuta. Mwaviyo, Akaboni aku Yehova aja achipharazga uthenga wacheruzgu wo uyeruzgikiya ndi “matalala ndi motu,” ndipu uvumbuwa vyeruzgu vaku Chiuta vo viwiyengi vigaŵa vakupambanapambana va charu chaku Satana. (Chivu. 8:7, 13) Ŵanthu akhumbika kuziŵa kuti umaliru wepafupi ndi chilatu chakuti asinthi vo achita pa umoyu wawu, ndipu aziponi pa zuŵa la ukali waku Yehova. (Zefa. 2:2, 3) Kweni uthenga wenuwu ngwakuwanda cha. Tikhumbika chiganga kuti tipharazgi uthenga uwu. Pa nyengu ya chisuzgu chikulu, uthenga wakumaliya wacheruzgu wazamuja wanthazi ukongwa.​—Chivu. 16:21.

MUSUNGENGI MAZU NGA UCHIMI

20. Kumbi tazamukambiskananji mu nkhani ziŵi zakulondopu?

²⁰ Tikhumbika nadi kusunga “mazu nga uchimi uwu” chifukwa nasi tifiskaku vo tiŵerenga mubuku la Chivumbuzi. (Chivu. 1:3) Kweni kumbi tingafiska wuli kukunthiyapu mwakugomezgeka asani titombozgeka ndipuso kulutirizga kupharazga mwachiganga mauthenga ngenanga? Tichiskikengi ndi vinthu viŵi ivi: chakwamba, ndi vo buku la Chivumbuzi livumbuwa vakukwaskana ndi arwani aku Chiuta ndipu chachiŵi, ndi vitumbiku vo tazamulonde kunthazi asani tilutirizgengi kuja akugomezgeka. Tazamukambiskana venivi mu nkhani ziŵi zakulondopu.