Vo Akuŵerenga Afumba

Kumbi akusambira 70 wo Yesu wanguŵatuma kuti akapharazgi ŵenga pani pa nyengu yo Yesu wanguyambisa mwambu wa Chakurya cha Mazulu cha Ambuya? Kumbi yiwu angumujowo?

Pa nyengu yo Yesu wanguyambisa mwambu wa Chakurya cha Mazulu cha Ambuya, akusambira ŵaki 70 ŵengapu nadi cha. Kweni titenere cha kuŵanaŵana kuti waŵayanjanga cha pamwenga kuti angumujowo. Ve viyo chifukwa pa nyengu iyi, Yesu wakhumbanga kuja ndi akutumika ŵaki pe.

Ŵanthu wo ŵenga mu gulu la ŵanthu 12 kweniso 70 wosi ŵenga akusambira aku Yesu wo waŵayanjanga. Pa akusambira ŵaki anandi wo wenga nawu, Yesu wangusankhapu anthulumi 12 wo wanguŵadana kuti akutumika. (Luka 6:​12-16) Iyu wenga ku Galileya pa nyengu yo “wangudana Akutumika 12” ndipu “wanguŵatuma kuti akapharazgengi Ufumu waku Chiuta kweniso kuti akachizgengi ŵanthu.” (Luka 9:​1-6) Pavuli paki, Yesu wati waluta ku Yudeya, ‘wangusankha akusambira anyaki 70, ndipu wanguŵatuma ŵaŵiŵaŵi.’ (Luka 9:51; 10:1) Mwaviyo, Yesu wenga ndi akusambira muvigaŵa vakupambanapambana mo mwapharazgikanga uthenga waki.

Ayuda wo anguja akusambira aku Yesu achitanga mbwenu Pasika chaka chechosi, ndipu atenere kuti achitanga limoza ndi mabanja ngawu. (Eki. 12:​6-11, 17-20) Kwati kwaja kamanavi kuti Yesu wabayiki, iyu ndi akutumika ŵaki anguluta ku Yerusalemu. Kweni wangudana chigulu cha akusambira ŵaki wosi cha kutuwa ku Yudeya, Galileya ndi Pereya kuti azichiti nayu Pasika. Viwoneke limu kuti pa nyengu iyi, Yesu wakhumbanga kuti waje ndi akutumika ŵaki pe. Iyu wanguŵakambiya kuti: “Ndaja ndichikhumbisiska kurya Pasika uyu limoza ndi yimwi ndechendayambi kusuzgika.”—Luka 22:15.

Penga chifukwa chakuvwika cho iyu wanguchitiya venivi. Yapa ndipu kwaja kanyengu kamanavi kuti Yesu wafwi nge “Mwanawambereri waku Chiuta yo watuzgapu ubudi wa charu.” (Yoha. 1:29) Venivi vakhumbikanga kuti vikachitikiyi ku Yerusalemu ko ŵanthu aperekiyanga sembi kwaku Chiuta. Mwanawambereri yo wabayikanga pa Pasika wakumbuskanga Ayisirayeli kuti Yehova wakuŵawombo kutuwa mucharu cha Ijipiti. Kweni kuziya mu sembi yaki, Yesu watingi wachitengi vikulu kuluska yapa. Iyu watingi wafwatuwengi ŵanthu wosi ku ubudi ndi nyifwa. (1 Akori. 5:​7, 8) Vo Yesu wanguchita vinguwovya kuti akutumika 12 aje fawundeshoni ya mpingu wachikhristu. (Aefe. 2:​20-22) Chakukondwesa so ukongwa ntchakuti tawuni yakupaturika ya Yerusalemu ye ndi “mya 12 ya fawundeshoni,” yo pakulembeka “mazina 12 nga akutumika 12 a Mwanawambereri.” (Chivu. 21:​10-14) Mwaviyo, akutumika akugomezgeka ŵenga ndi udindu wapade kuti awovyi pakufiska khumbu laku Chiuta. Ndichu chifukwa chaki Yesu wakhumbanga kuti wachitiyi limoza Pasika wakumaliya ndi akutumika ŵaki ŵenaŵa kweniso kuyambisa mwambu wa Chakurya cha Mazulu cha Ambuya.

Akusambira ŵaki 70 kweniso anyaki ŵengapu cha pa mwambu wa Chakurya cha Mazulu cha Ambuya wo Yesu wanguyambisa. Kweni akusambira wosi akugomezgeka aku Yesu ayanduwa ndi mwambu wa Chakurya cha Mazulu cha Ambuya wo Yesu wanguyambisa. Akusambira wosi ŵenaŵa wo anguzija Akhristu akusankhika anguzisere mu phanganu la ufumu lo Yesu wangukambiya akutumika ŵaki pa usiku wenuwu.—Luka 22:​29, 30