Kumbi Mariya wa ku Magadala Wenga Yani?

Vo Bayibolu limuka

Mariya wa ku Magadala wenga wakusambira wakugomezgeka waku Yesu Khristu. Zina laki lakuti Magadala, litenere kuti likutuliya ku zina la tawuni ya Magadala (zina leneku Magadana), yo yenga pafupi ndi Nyanja ya Galileya. Mariya watenere kuti wajanga kweniko.

Mariya wa ku Magadala wenga yumoza mwa anthukazi wo alondonga Yesu ndipuso akusambira ŵaki. Iyu wagwiriskiyanga ntchitu chuma chaki kuti wawovyi Yesu ndi akusambira ŵaki. (Luka 8:1-3) Iyu wangumuwona Yesu wachibayika ndipuso ndiyu wenga wakwamba kumuwona Yesu wati wayuskika.—Mariko 15:40; Yohane 20:11-18.

• Kumbi Mariya wa ku Magadala wenga huli?

• Kumbi Mariya wa ku Magadala wenga “wakutumika wa akutumika”?

• Kumbi Mariya wa ku Magadala wenga muwolu waku Yesu Khristu?

• Kumbi Bayibolu lizumbuwa ana Mariya alinga?

Kumbi Mariya wa ku Magadala wenga huli?

Bayibolu likambapu cha kuti Mariya wa ku Magadala wenga huli. Likamba waka kuti Yesu wangumutuzga viŵanda 7.—Luka 8:2.

Kumbi fundu yakuti Mariya wa ku Magadala wenga huli yikutuliya pani? Pati pajumpha vyaka mahandiredi kutuliya po iyu wangufwiya, ŵanthu akambanga kuti wenga so mwenuyu yo (panyaki wenga nadi huli) wangusambisa malundi ngaku Yesu ndi masozi ngaki ndipu wangungapuputa ndi sisi laki. (Luka 7:36-38) Mwaviyo, Bayibolu likambapu cha kuti tigomezgengi venivi.

Kumbi Mariya wa ku Magadala wenga “wakutumika wa akutumika”?

Awa. Tchalitchi la Katolika ndilu litimudana Mariya wa ku Magadala kuti ndi “St. Mary Magdalene” kweniso litimukamba kuti “wakutumika wa akutumika” chifukwa chakuti ndiyu wenga wakwamba kukambiya akutumika kuti Yesu wayuskika kwa akufwa. (Yohane 20:18) Kweni venivi vitimuchitiska kuti waje wakutumika cha. Ndipu Bayibolu likambapu cha kuti iyu wenga wakutumika.—Luka 6:12-16.

Bayibolu lingumala kufwatulika cha mu mahandiledi C.E. Pati pajumpha vyaka mahandiledi Arara atchalitchi la Katolika angusankha kuti Mariya wa ku Magadala waje ndi udindu wapachanya. Mazu yanga ngangulembeka mu vyaka va mu ma 100 ndi 200. Mazu ngenanga ngakonkhoska kuti akusambira anyaki aku Yesu achitiyanga sanji Mariya wa ku Magadala. Kweni nkhani zakuchita kupeka zenizi zikulembekamu cha mu Bayibolu.

Kumbi Mariya wa ku Magadala wenga muwolu waku Yesu Khristu?

Awa. Bayibolu likonkhoska mwakuvwika umampha kuti Yesu wenga wambula kuto.a