Kumbi Chilindizga Ndingachisaniya Pani?

Vo Bayibolu limuka

Bayibolu likamba kuti Chiuta wakhumba ‘kuti vinthu vizitiyendiyengi umampha kunthazi kweniso kuti tije ndi chilindizga chamampha.’a (Yeremiya 29:11) Chifukwa chimoza cho Chiuta wakutipasiya Bayibolu ntchakuti “tije ndi chilindizga.  . . ndipuso kupembuzgika ndi Malemba.” (Aroma 15:4) Nge mo tiwoniyengi mu nkhani iyi, ulongozgi wa zeru wa mu Bayibolu ungatiwovya kuja ndi chilindizga chifukwa malayizgu ngaki ngatitiwovya kuziŵa kuti kunthazi vinthu vazamukuŵa umampha.

Mu nkhani iyi tikambiskanengi fundu izi:

• Kumbi Bayibolu lititiwovya wuli kuja ndi chilindizga?

• Kumbi Bayibolu litiŵapaska chilindizga wuli ŵanthu?

• Mavesi nga mu Bayibolu pa nkhani ya chilindizga

Kumbi Bayibolu lititiwovya wuli kuja ndi chilindizga?

Bayibolu lingatiwovya kuja ndi chilindizga chifukwa lititikambiya vo titenere kuchita kuti tije ndi umoyu wamampha. Ŵanaŵaniyani fundu izi:

• Muŵerengengi Bayibolu kuti likupaskeni ulongozgi wazeru. Lemba la Salimo 119:105 likamba kuti: “Mazu nginu ndi nyali yo yilongozga malundi ngangu, kweniso mbukweru wo uŵalisa nthowa yangu.” Ukweru wanthazi, ungatiwovya kuti tiwoni cho che kunthazi kwidu ndipuso cho chepatali ndi isi. Mwakuyanana ŵaka, fundu za mu Bayibolu zingatiwovya kumalana ndi masuzgu ngo tikumana nangu ndipuso zititipasa chilindizga. Vo Bayibolu lisambiza vititiwovya kuja ndi nthazi kweniso ‘vikondwesa mtima.’ (Salimo 19:7, 8) Kusazgiyapu yapa, mu Bayibolu mwe malayizgu ngakukondwesa ngaku Chiuta pa vo wakhumba kuzichitiya ŵanthu kunthazi pacharu chapasi. Chilindizga chenichi chingatiwovya kuja ndi likondwa lambula kumala kweniso kuti tikhorwengi.

• Muzomerezengi kuti anyinu akuwovyeni. Asani vinthu viwoneka nge palivi kamampha, tingakhumba kuleka kucheza ndi abali ŵidu pamwenga mabwezi ngidu. Kweni Bayibolu lititikambiya kuti kuchita viyo nkhuŵavi zeru chifukwa kungachitiska kuti tichiti vinthu viheni. (Nthanthi 18:1) Ŵanthu a mubanja lidu kweniso mabwezi ngidu angatiwovya kuti tiziki mtima. Yiwu angatipasa masachizgu nga mo tingamalisiya suzgu yo takumana nayu. (Nthanthi 11:14) Kweniso, angatipembuzga kweniso kutichiska. Venivi vingatiwovya kuti tikunthiyepu mpaka po vinthu vajaliya umampha.—Nthanthi 12:25.

• Mupempherengi kwaku Chiuta. Bayibolu lititikambiya kuti: “Muponye Yehova mphingu yaku, ndipu iyu wakuwovyengi. Iyu wazomerezengi cha kuti murunji wawi.”b (Salimo 55:22) Yehova wadanika kuti ndi “Chiuta yo wapereka chilindizga.” (Aroma 15:13) Mwaviyo kuziya mu pempheru mungamukambiya “vinthu vosi vo vitikufipiskani mtima” chifukwa watikuphweriyani. (1 Peturo 5:7) Kusazgiyapu yapa, Bayibolu likamba kuti: “Iyu wakuwovyeningi kuti muŵi akukho, muŵi anthazi ndipuso kuti muleki kusukunyika.”—1 Peturo 5:10.

• Mayeseru ngakuwovyeni kuja ndi chilindizga chakukho. Bayibolu lilayizga kuti: ‘Munthu yo wavwiya [Chiuta] wajengi mwakuvikilirika ndipu watimbanyizgikengi cha chifukwa chakopa soka.’ (Nthanthi 1:33) Munthukazi munyaki wa ku Australia zina laki Margaret, katundu waki yosi wangunangika ndi chimphepu chanthazi cho chingunanga nyumba yaki. Kweni mumalu mwakutimbanyizgika ukongwa maŵanaŵanu, munthukazi uyu wangusambirapu kanthu pa vo vingumuchitikiya. Iyu wangusambira kuti chuma chiswera cha kumala. Mwaviyo wanguwona kuti mbumampha kuŵika maŵanaŵanu pa vinthu vakukhumbika ukongwa nge kuphwere banja kweniso achibali ŵaki, ubwezi waki ndi Chiuta ndipuso chilindizga cho che mu Bayibolu.—Salimo 37:34; Yakobe 4:8.

Kumbi Bayibolu litiŵapaska chilindizga wuli ŵanthu?

Bayibolu lilayizga ŵanthu kweniso charu chapasi vinthu vamampha ukongwa kunthazi. Ndipu venivi vichitikengi pambula kuswera penapa. Kukamba uneneska, masuzgu ngo ŵanthu akumana nangu mazuŵa nganu ngalongore limu kuti tija “mu mazuŵa ngakumaliya” nga charu ichi. (2 Timote 3:1-5) Pambula kuswera yapa, Chiuta wayambengi kulamuliya ndipu wazamutuzgapu vinthu vosi vambula urunji kweniso masuzgu. Wazamugwiriskiya ntchitu boma lo lidanika kuti Ufumu waku Chiuta. (Daniyeli 2:44; Chivumbuzi 11:15) Ufumu wenuwu ndiwu Yesu mu pempheru laki lakuwoniyapu wangukamba kuti tipempherengi kuti uzi. Iyu wanguti: “Ufumu winu uzi. Khumbu linu lichitiki panu pasi.”—Mateyu 6:9, 10.

Bayibolu likonkhoska mwakuvwika umampha vinthu vo Chiuta wakhumba kuzichitiya ŵanthu. Wonani nganyaki mwa masuzgu ngo Ufumu waku Chiuta wazamutuzgapu:

• Kwazamuŵavi nja. “Charu chiperekengi vipasu vaki.”—Salimo 67:6.

• Kwazamuŵavi matenda. “Palivi wakuja mucharu cho yo wazamukamba kuti: ‘Ndatama.’”—Yesaya 33:24.

• Kwazamuŵavi nyifwa. Chiuta “wazamuleska masozi ngosi mumasu mwawu, ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi. Vinthu vakali vatuwapu.”—Chivumbuzi 21:3, 4.