Vo Vingawovya wo Agwira Ntchitu ku Chipatala Kuti Alekengi Kufipa Mtima

Bryn yo waja kunkhondi kwa charu cha Carolina ku U.S.A., wateŵete mu Komiti ya Kukambiskana ndi Achipatala ndipu wagwira ntchitu limoza ndi a chipatala pakovya Akaboni aku Yehova wo atama.

Chifukwa cha mulili wa COVID-19, vipatala vinandi vizomereza cha kuti ŵanthu akawonengi ŵanthu wo atama. Kuti waziŵi mo wangawovye Akaboni wo atama, Bryn wangumbiya foni munthu yo wazomereza kuti alongozgi a visopa akapembuzgengi ŵanthu wo atama muchipatala.

Mumalu mwakukambiskana ndi munthu uyu, Bryn wangukambiskana ndi wachiŵi waki. Chifukwa cha dangu lakukaniza kuti ŵanthu angalutanga cha kuchiwona wo atama, Bryn wangupempha asani nambala yaki ya foni yingapaskika kwa Akaboni wo atama kuti wakambiskanengi nawu. Ndipu angumuzomereza.

Pavuli paki, Bryn wanguŵanaŵaniya ntchitu yo madokotala ngagwira. Wangukambiya wachiŵi kwaku yo wazomereza kuti alongozgi a visopa akapembuzgengi ŵanthu wo atama muchipatala kuti wawonga ntchitu yikulu yo madokotala ngagwira ndipu wagomezga kuti ŵeumampha. Iyu wangukamba so kuti wakuŵerengapu nkhani zinyaki zo zikonkhoska kuti kwekosi, ŵanthu afipa mtima ukongwa chifukwa cha mulili, ukongwa wo agwira ntchitu muchipatala.

Wachiŵi kwaku yo wazomereza kuti alongozgi a visopa akapembuzgengi ŵanthu mu chipatala wangusimikiziya kuti mulili wa COVID-19 wachitiska nadi ŵanthu kuchipatala kuti afipengi mtima ukongwa.

Bryn wangukamba kuti: “Pa webusayiti yidu pe nkhani zo zingawovya ŵanthu kuti alekengi kufipa mtima. Asani mungaluta pa jw.org ndikulemba mazu ngakuti ‘kufipa mtima’ pa malu ngakufufuziya musaniyengi nkhani zo zingachiska wo mugwira nawu ntchitu.”

Achikambiskana, munthu yo wangujula pa webusayiti ndi kulemba mazu ngakuti “kufipa mtima” ndipu wangusaniya nkhani zo zikonkhoska vakukwaskana ndi kufipa mtima. Pavuli paki wangukamba kuti, “Nadi! Ndilongongi alongozgi ŵidu nkhani zenizi. Ndigomezga kuti zitiwovyengi kweniso ziwovyengi ŵanthu anyaki. Ndipulintengi nkhani zenizi kuti ndipasi weyosi panu.”

Pati pajumpha masabata ngamanavi, Bryn wangukambiskana ndi yo wazomereza kuti alongozgi a visopa akapembuzgengi ŵanthu mu chipatala. Munthu uyu wangukamba kuti wangujula pa webusayiti yidu ndipu wati wapulinta mapepala nga nkhani zakukwaskana ndi kufipa mtima kweniso nkhani zinyaki, wangugaŵiyaku manesi ndipuso ŵanthu anyaki wo agwira ntchitu kuchipatala.

Bryn wangukamba kuti: “Munthu uyu wangundiwonga ukongwa chifukwa cha ntchitu yidu ndipuso chifukwa cha nkhani zidu zakulembeka umampha. Ndipu nkhani zenizi zakovya ukongwa.”