VO ACHINYAMATA AFUMBA

Kumbi Ndikhumbika Kubatizika?—Chigaŵa Chakwamba: Vo Kubatizika Kung’anamuwa

Chaka chechosi achinyamata anandi wo alereke mubanja la Akaboni aku Yehova, abatizika. Kumbi namwi mukhumba kubatizika? Asani ndi viyo, chakwamba mukhumbika kuziŵa vo kujipatuliya ndipuso kubatizika kung’anamuwa.

Kumbi ubatizu ung’anamuwanji?

Bayibolu likamba kuti ubatizu nkhumuwaza waka munthu maji cha, kweni kumubiza mu maji ndipu kuchita venivi kumiya vinthu vakukhumbika ukongwa.

Kubizika mumaji pa ubatizu kulongo pakweru kuti muchitengi vakukhumba vinu cha.
Kuzuwuka mumaji kulongo kuti mwayamba umoyu wasonu kuti muchiti vo vikondwesa Chiuta.

Asani munthu wabatizika waziŵa kuti Yehova ndiyu ngwakwenere kutikambiya cho ntchamampha kweniso chiheni ndipu mutimulayizga kuti nyengu zosi muchitengi vo iyu wakhumba.

Ŵanaŵaniyani fundu iyi: Ntchifukwa wuli mukhumbika kulayizga pagulu kuti muvwiyengi Yehova? Wonani pa 1 Yohane 4:19 ndi Chivumbuzi 4:11.

Kumbi kujipatuliya kung’anamuwanji?

Mwechandabatiziki, mukhumbika dankha kujipatuliya kwaku Yehova pakumwija. Mungachita wuli?

Kuziya mupempheru, mukambiya Yehova kuti mumuteŵetiyengi kwa umoyu winu wosi kweniso muchitengi vo iyu wakhumba kwali vinthu vingaŵa wuli pa umoyu winu.

Munthu wabatizika pakweru kulongo kuti wakujipatuliya kwaku Yehova. Mulongo pakweru kuti mwaleka umoyu wakuchita vo mukhumba ndipu sonu muchitengi vo Yehova wakhumba.—Mateyu 16:24.

Ŵanaŵaniyani fundu iyi: Ntchifukwa wuli munthu waja ndi umoyu wamampha asani wajipereka kwaku Yehova? Wonani pa Yesaya 48:17, 18 ndi Aheberi 11:6.

Ntchifukwa wuli ubatizu ngwakukhumbika ukongwa?

Yesu wangulongo kuti ubatizu ngwakukhumbika ukongwa kwa akusambira ŵaki. (Mateyu 28:19, 20) Mwaviyo, ubatizu weche wakukhumbika ukongwa kwa Akhristu mazuŵa nganu. Bayibolu likamba kuti ubatizu ngwakukhumbika ukongwa kuti munthu wazitaskiki.—1 Peturo 3:21.

Kweni mukhumbika kubatizika chifukwa chakwanja Yehova ndipuso muwona kuti ubwezi winu ndi iyu ngwakukhumbika. Mutenere kuja ndi maŵanaŵanu nge ngo wakulemba sumu munyaki wenga nangu. Iyu wangulemba kuti: “Kumbi ndimuweziyengenji Yehova pa vamampha vosi vo iyu wandichitiya? . . . Ndipu ndidaniyengi pa zina laku Yehova. Ndifiskengi vo ndalapizgiya Yehova.”—Salimo 116:12-14.

Ŵanaŵaniyani fundu iyi: Kumbi ndi vinthu wuli vamampha vo Yehova wakuchitiyani ndipu mungamuweziyanji? Wonani pa Dotoronome 10:12, 13 ndi Aroma 12:1.

Fundu zaboza ndipuso zauneneska

FUNDU YABOZA— Arara pe mwauzimu ndiwu mbakwenere kubatizika.

FUNDU YAUNENESKA— Kukhwima mwauzimu kutole vyaka pe cha, kweni kutole asani munthu watanja kweniso wavwiya Yehova ndi mtima wosi. Pa nyengu yo, Yosefi, Samuyeli ndi Yosiya ŵenga ŵeche achinyamata angulongo kuti ŵenga akukhwima mwauzimu. Ndivu achinyamata anandi mazuŵa nganu achita.

Bayibolu likamba kuti: “Chinanga ndi mwana nayu waziŵika ndi vakuchita vaki, asani nkharu yaki njakutowa kweniso njakunyoloka.”—Nthanthi 20:11.

FUNDU YABOZA— Asani anyaku abatizika, nawi so ukhumbika kubatizika.

FUNDU YAUNENESKA— Munthu wakhumbika kusankha yija kuti wajipatuliyi kwaku Yehova ndipuso kubatizika ndipu wakhumbika kuchita venivi kutuliya mu mtima. Kujipatuliya kweniso kubatizika kuchitika waka mwa mwambu cha pamwenga kukhumba kujilongo ku ŵanthu kuti wakuwa.

Bayibolu likamba kuti: ‘Ŵanthu aku [Chiuta] ajiperekengi mwakukhumbisiska.’—Salimo 110:3.

FUNDU YABOZA— Asani wechendabatiziki, umbika mulandu cha pa vo uchita.

FUNDU YAUNENESKA— Munthu watuŵa ndi mulandu kwaku Yehova chifukwa chakuti wabatizika cha. Mumalu mwaki, watuŵa ndi mulandu asani waziŵa vo Yehova watanja ndi vo watinkha.

Bayibolu likamba kuti: “Asani munthu munyaki waziŵa mo wangachitiya chinthu chamampha, kweni watichichita cha, ndikuti wachita ubudi.”—Yakobe 4:17.

VO VINGAKUWOVYANI: Asani munthu yo wakujipatuliya ndi kubatizika wawona kuti wasuzgika kufiska udindu waki nge Mkhristu, wangachita umampha kujifufuza kuti waziŵi cho chitimuchitiska viyo ndipuso vo vingamuwovya kuti wamalani ndi suzgu iyi. Kuti muchiti venivi, ŵerengani mutu 37 mu buku lakuti Mayankho a Zimene Achinyamata Amafunsa, Buku Lachiwiri.