Kumbi Chisopa Chikhumbika Kuseleriyamu mu Ndali?

Pacharu chosi, ŵanthu anandi wo akamba kuti alondo Yesu Khristu aseleriyamu mu vandali. Anyaki atesesa kulutiska panthazi vo chisopa chawu chigomezga kweniso mijalidu yachisopa kuziya mwa nduna pamwenga chipani. Ndipu kanandi andali agwiriskiya ntchitu mijalidu kweniso vakuchitika vinyaki ndi chilatu chakuti ŵanthu a muchisopa aŵawovyengi. Vachilendu cha kuwona alongozgi achisopa achiyesesa kuti asankhiki kuja mulongozgi pankhani za ndali pamwenga muboma. Ndipu muvyaru vinyaki, chisopa cho atichikamba kuti ntcha Chikhristu angachiwona nge chisopa cha boma pamwenga cha charu.

Kumbi muwona wuli? Kumbi akusambira aku Yesu akhumbika kuseleriyamu mu ndali? Mungasaniya kwamuka asani mungawona chakuwoniyapu chaku Yesu. Iyu wangukamba kuti: “Ndakupaskani chakuwoniyapu kuti nge mo ini ndakuchitiyani, namwi so muchitengi venivi.” (Yohane 13:15) Kumbi Yesu wachitanga wuli pankhani za ndali?

Kumbi Yesu wanguseleriyangamu mu ndali?

Awa. Yesu wanguseleriyamu cha mu nkhani za ndali.

Yesu wakhumbanga cha kuja ndi udindu pa nkhani za ndali. Iyu wangukana kuja wakulamuliya boma la ŵanthu pa nyengu yo Satana wangumulongo “maufumu ngosi nga pacharu chapasi.” (Mateyu 4:8-10)a Nyengu zinyaki, ŵanthu wo amuziŵanga Yesu’ kuti we ndi mijalidu yamampha yo yingamuwovya kuja mlongozgi wamampha, anguyesesa kumuchichizga kuti waseleriyengemu mu va ndali. Bayibolu likamba kuti: “Sonu Yesu wati waziŵa kuti akhumba kuzimuko ndi kumuvwalika ufumu, wanguthaŵiya so kuphiri kwakuyija.” (Yohane 6:15) Yesu wachitanga cha vo ŵanthu akhumbanga kuti wachitengi. Mumalu mwaki, wakananga kuseleriyamu mu nkhani za ndali.

Yesu waperekangaku cha maŵanaŵanu mu nkhani za ndali. Mwakuyeruzgiyapu, mu nyengu yaku Yesu, Ayuda akwiyanga kuti aperekengi msonkhu ku boma la Aroma ndipu awonanga nge kuti kupereka msonkhu nkhuchita vinthu vambula urunji. Ŵati ayesesa kumuchichizga Yesu kuti watongeku chigaŵa pankhani za ndali, iyu wangukana chinanga nkhukambiskana nkhani zakukwaskana ndi kupereka msonkhu asani nkhuchita vinthu vambula urunji pamwenga cha. Iyu wanguŵakambiya kuti: “Perekani vinthu vaku Kayisara kwaku Kayisara, ndipu vaku Chiuta kwaku Chiuta.” (Mariko 12:13-17) Iyu wanguseleriyamu cha mu ndali kweni wangulongo kuti ŵanthu akhumbikanga kupereka msonkhu wo arara a Roma, wo amiyanga Kayisara akhumbanga. Kweniso wangulongo kuti kuvwiya arara a boma kwe ndi mphaka. Munthu wakhumbika cha kupereka ku boma vinthu vo wakhumbika kupereka kwaku Chiuta pe, kusazgapu kujipereka ndipuso kusopa.​—Mateyu 4:10; 22:37, 38.

Yesu wakambiyanga anyaki vakukwaskana ndi boma la kuchanya lo ndi Ufumu waku Chiuta. (Luka 4:43) Iyu waseleriyangamu cha mu vakuchitika va ndali chifukwa chakuti waziŵanga kuti Ufumu waku Chiuta ndiwu ungachitiska kuti charu chije mo Chiuta wakhumbiyanga. (Mateyu 6:10) Iyu wanguvwisa kuti Ufumu waku Chiuta ugwiriskiyengi maboma nga charu cha kweni wazakungabwanganduwa.​—Daniyeli 2:44.

Kumbi Akhristu akwambiriya aseleriyangamu mu ndali?

Awa. Akusambira aku Yesu avwiyanga dangu laki lakuti “mwe a charu cha.” (Yohane 15:19) Yiwu angulondo chakuwoniyapu chaki ndipu aseleriyangamu cha mu ndali za charu. (Yohane 17:16; 18:36) Mumalu mwakuseleriyamu mu ndali, yiwu agwiranga ntchitu yo Yesu wangulamula, yo yenga kupharazga ndikusambiza vakukwaskana ndi Ufumu waku Chiuta.​—Mateyu 28:18-20; Machitidu 10:42.

Chinthu chakukhumbika ukongwa cho Akhristu akwambiriya akhumbikanga kuchita chenga kuvwiya Chiuta. Yiwu aziŵanga kuti akhumbika kutumbika arara a boma. (Machitidu 5:29; 1 Peturo 2:13, 17) Yiwu avwiyanga marangu ndipuso kulipira msonkhu. (Aroma 13:1, 7) Aseleriyangamu cha mu ndali kweni ayanduwanga ndi vo boma lingujalikisa kweniso marangu ngo ngaŵavikiliyanga.​—Machitidu 25:10, 11; Afilipi 1:7.

Akhristu mazuŵa nganu aseleriyamu cha mu ndali

Bayibolu likamba mwakuvwika umampha kuti chinanga ndi Yesu kweniso akusambira ŵaki akwambiliya anguseleriyamu cha mu ndali. Pa chifukwa chenichi, Akhristu wo Mbakaboni aku Yehova pacharu chosi aseleriyamu cha mu ndali. Mwakuyanana ndi Akhristu a munyengu yakali, Akaboni aku Yehova achita ntchitu yo Yesu wanguŵalamula yakupharazga “uthenga wamampha uwu wa Ufumu.”​—Mateyu 24:14.