Kumbi Nkhondu ya Aramagedoni Yiyambiyengi ku Isirayeli?—Kumbi Bayibolu Likambanji?

Bayibolu likambapu cha kuti Aramagedoni ndi nkhondu yo yazamuchitika ku chigaŵa chimanavi ŵaka cha charu chapasi. Kweni likamba kuti ndi nkhondu ya pacharu chosi yo yazamuchitika pakati pa maboma ngosi nga ŵanthu ndi Chiuta.

• “Mazu ngakukambirika ndi viŵanda . . . ngaluta ku mafumu nga pacharu chosi chapasi, kuti ngaŵawunganisiyi ku nkhondu ya zuŵa likulu laku Chiuta Wanthazizosi. . . . Mazu ngakukambirika ngo, nganguŵawunganisiya kumalu ngo mu Chiheberi ngadanika kuti Aramagedoni.”—Chivumbuzi 16:14, 16.

Mazu ngakuti “Aramagedoni” ngatuliya ku mazu nga Chiheberi ngakuti Har Meghid·dohnʹ, ngo ngang’anamuwa kuti “Phiri la Megido.” Megido yenga tawuni yo yenga mu Isirayeli wakali. Mwaviyo, ŵanthu anyaki agomezga kuti nkhondu ya Aramagedoni yazamuchitikiya mucharu cha Isirayeli. Kweni tawuni ya Megido ndipuso malu nganyaki ngengosi nga ku Middle East ngakukwana cha kuti “mafumu [ngosi] nga pacharu chosi chapasi” kweniso asilikali ŵawu awunganeku.

Vinthu vo vikulembeka mu buku la Chivumbuzi vimiya vinthu vinyaki. (Chivumbuzi 1:1) Aramagedoni ndi malu chayingu cha, kweni nkhuwunganisika kwa mitundu ya ŵanthu pacharu chosi kuti yisuskani kakumaliya ndi ulamuliru waku Chiuta.—Chivumbuzi 19:11-16, 19-21.