Ntchifukwa Wuli Ŵanthu Atondeka Kujalikiska Chimangu?—Kumbi Bayibolu Likambanji?

Alongozgi kweniso mawupu vatondeka kujalikiska chimangu pacharu. Kwambiya po Nkhondu Yachiŵi ya Pacharu Chosi yikuchitikiya, pacharu chapasi mazuŵa nganu pachitika nkhondu zinandi ukongwa. Ŵanthu pafupifupi mabiliyoni ngaŵi aja mumalu mo muchitika nkhondu zenizi.

Ntchifukwa wuli ŵanthu angafiska cha kujalikiska chimangu? Kumbi Bayibolu likambanji?

Vifukwa vitatu vo ŵanthu atondeke kuzisa chimangu

1. 1. Ŵanthu ŵe ndi mijalidu yo yitiŵatondekesa kuti ajalikiski chimangu. Bayibolu lingukambiya limu kuti mu nyengu yidu yinu, “ŵanthu [ajengi] akujiyanja, akwanja ndalama, akujiŵikamu, akujikuzga, . . . ambula kugomezgeka, . . . ambula kukoliyana ndi anyawu,  . . . ambula kujiko, akofya, . . . ambula kuvwa va anyawu, akujitukumuwa chifukwa cha kunyada.”—2 Timote 3:2-4.

2. 2. Munthu weyosi pakuyija pamwenga nge gulu angafiska cha kumalisa masuzgu kwambula kuwovyeka ndi Mlengi wawu Yehovaa Chiuta. Bayibolu likamba kuti “Munthu yo watenda walivi nthazi zakunyoloske maphazi ngaki.”—Yeremiya 10:23.

3. 3. Charu chilongozgeka ndi wakulamuliya wanthazi kweniso muheni, Satana Dyaboli, yo “walandizga charu chosi chapasi.” (Chivumbuzi 12:9) Pa nyengu iyi po “charu chosi che mu nthazi ya muheni yo,” paŵengi nkhondu ndi viwawa.—1 Yohane 5:19.

Kumbi ndiyani yo wangazisa chimangu?

Bayibolu lititisimikiziya kuti palivi munthu yo wangazisa chimangu kweni Chiuta pe ndiyu wangachita venivi.

• “‘Pakuti ndiziŵa umampha vo nditikuŵanaŵaniyani,’ Yehova ndiyu wakamba, ‘ndiŵanaŵana kuti ndikupaskeni chimangu, soka cha, kuti vinthu vizikuyendiyeni umampha kunthazi kweniso kuti muje ndi chilindizga chamampha.’”—Yeremiya 29:11.

Kumbi Chiuta wazamufiska wuli layizgu lenili? “Chiuta yo wapereka chimangu wazamuphwanya Satana.” (Aroma 16:20) Chiuta wazamugwiriskiya ntchitu boma lakuchanya, lo Bayibolu litilidana kuti “Ufumu waku Chiuta,” kujalikiska chimangu pa charu chosi. (Luka 4:43) Kuziya mwaku Yesu Khristu, yo ndi Fumu ya Ufumu wenuwu, ŵanthu azamusambizika mo angajaliya mwachimangu.—Yesaya 9:6, 7.

• Kuti muziŵi vinandi, ŵerengani nkhani ya mutu wakuti “Kumbi ndi Vinthu Wuli vo Ufumu Waku Chiuta Ufiskengi?”