Kumbi Lilipu Boma lo Vinthu Vitenda Umampha Mucharu Chawu lo Lingalamuliya Charu Chosi?—Kumbi Bayibolu Likambanji?

Pacharu chosi, maboma ngakumana ndi vinthu vinandi vakutimbanyizga. Ndipu chinanga ndi vyaru vo viwoneka kuti vinthu veumampha, vyaru venivi navu vikwaskika ndi malipoti ngakukwaskana ndi vo andali achita, kubiya visankhu, kugaŵikana pa vifukwa va ndali kweniso kuchita viwoneseru vaviwawa.

Bayibolu likamba kuti pe boma limoza pe lo lingayendesa umampha vinthu pacharu chosi. Tikayika cha kuti mukuvwapu va boma lenili. Boma lenili ndilu Yesu Khristu wangulizumbuwa mupempheru laki lakuyeruzgiyapu.

• “Kweni yimwi mupempherengi viyo: ‘Awusefwi akuchanya, zina linu litoweseki. Ufumu winu uzi. Khumbu linu lichitiki panu pasi, nge kuchanya.’”—Mateyu 6:9, 10.

Kumbi Bayibolu likambanji vakukwaskana ndi Ufumu wenuwu?

Ufumu—boma lo lingayendesa umampha vinthu

Ufumu wenuwu ulamuliya kuchanya.

• Yesu wangudana boma lenili kuti “Ufumu wakuchanya.” (Mateyu 4:17; 5:3, 10, 19, 20) Pa chifukwa chenichi, wangukamba kuti: “Ufumu wangu ngwakutuliya kucharu ichi cha.”—Yohane 18:36.

Ufumu uwu wazamusere mumalu mwa maboma ngosi nga ŵanthu.

• Bayibolu likamba kuti: “Ufumu wo . . . wazamuphwanya ndi kutuzgapu maufumu [nga ŵanthu] ngosi ngenanga, ndipu ufumu wenuwu pe ndiwu wazamuŵaku mpaka muyaya.”—Daniyeli 2:44.

Ufumu, wo Yesu Khristu ndiyu Fumu, wazamubwangandulika cha.

• Bayibolu likamba kuti: “Ulamuliru waki ndi ulamuliru wamuyaya, wo wazamumala cha, ndipu ufumu waki wazamubwangandulika cha.”—Daniyeli 7:13, 14.

Ufumu uwu wazamuwovya kuti charu chizije chachimangu kweniso chakuvikilirika.

• Bayibolu likamba kuti: “Weyosi wazamuja mwachimangu pasi pa chimiti chaki cha mphereska kweniso cha mkuyu, ndipu palivi munthu yo wazakuŵawofya.”—Mika 4:4, Good News Translation.

Sambirani vinandi vakukwaskana ndi Ufumu wenuwu

Pa nyengu yo Yesu wenga pacharu chapasi, nyengu yaki yinandi “wapharazganga uthenga wamampha wa Ufumu.” (Mateyu 9:35) Iyu wangukambiya limu kuti:

• “Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.”—Mateyu 24:14.

Mazuŵa nganu, uthenga wamampha wa Ufumu upharazgika mu vyaru vakujumpha 240. Titikupemphani kuti musambiri vinandi vakukwaskana ndi boma lenili kweniso mo mwazamuyanduliya ndi ulamuliru waki.

Chondi woneriyani vidiyo yakuti Kumbi Ufumu Waku Chiuta Ntchinthu Wuli?