Kumbi Ntchifukwa Wuli te ndi Umoyu?

Vo Bayibolu limuka

Fumbu lakuti kumbi ntchifukwa wuli te ndi umoyu lingafumbika munthowa zinandi. Mwakuyeruzgiyapu, lingafumbika kuti Ntchifukwa wuli tilipu? pamwenga Kumbi umoyu we ndi chilatu wuli? Bayibolu lilongo kuti chilatu cha umoyu widu nkhuja pa ubwezi ndi Chiuta. Tiyeni tiwoni fundu zauneneska zo Bayibolu likamba.

• Chiuta ndi Mlengi widu. Bayibolu likamba kuti: ‘Iyu [Chiuta] ndiyu wakutipanga, ndipu tikujipanga tija cha.’—Salimo 100:3; Chivumbuzi 4:11.

• Chinthu chechosi cho Chiuta wakulenga kusazgapu isi taŵanthu, wakuchilenga ndi chilatu.—Yesaya 45:18.

• Chiuta wakutilenga ndi mtima wakukhumba ‘kuziŵa vakukwaskana ndi iyu’ vo visazgiyapu kuziŵa chilatu cha umoyu. (Mateyu 5:3) Iyu wakhumba kuti tikhorwengi ndi chilatu chaumoyu.—Salimo 145:16.

• Asani tija pa ubwezi wakukho ndi Chiuta tilongo kuti tiziŵa kuti tikhumbika Chiuta pa umoyu widu. Chinanga kuti anyaki awona kuti vingachitika cha kuti tije paubwezi ndi Chiuta, kweni Bayibolu lititichiska kuti: “Ndereni kufupi ndi Chiuta, ndipu nayu wanderengi kufupi ndi yimwi.”—Yakobe 4:8; 2:23.

• Kuti tije mabwezi ngaku Chiuta, tikhumbika kuchita vinthu mwakukoliyana ndi vo iyu wakhumba. Bayibolu likamba vo Chiuta wakhumba kuti tichitengi pa Wakutawula 12:13 po pakamba kuti: “Wopa Chiuta wauneneska ndipu sunga marangu ngaki, pakuti venivi ndivu munthu wakhumbika kuchita.”

• Kunthazi, Chiuta wazamufiska chilatu chaki cho wenga nachu pakwamba po wangulenga ŵanthu. Iyu wazamutuzgapu masuzgu ngosi ndipu ŵanthu wo atimusopa ndipuso wo we nawu pa ubwezi wakukho wazakuŵapaska umoyu wamuyaya.—Salimo 37:10, 11.