Kumbi Mphakwenere Kuja Muchisopa?

Vo Bayibolu limuka

Hinya, chifukwa Chiuta wakhumba kuti ŵanthu awunganengi pa kumusopa. Bayibolu likamba kuti: “Tiyeni tiŵanaŵaniyanengi kuti tichiskiyani ku chanju ndi ku ntchitu zamampha, ndipu tingalekanga cha kuwungana pamoza.”—Aheberi 10:24, 25.

Vo Yesu wangukamba valongonga kuti akusambira ŵaki akhumbika kusopa Chiuta nge gulu. Iyu wanguŵakambiya kuti: “Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.” (Yohane 13:35) Nthowa yimoza yo akusambira aku Khristu atingi alongoliyengi chanju nkhuwungana ndi anyawu. Nyengu zosi akhumbikanga kuwungana ndi Akhristu anyawu mumipingu kuti asopi Chiuta. (1 Akorinto 16:19) Mwaviyo, mipingu yeniyi ndiyu yapanganga gulu limoza la abali ndi azichi pacharu chosi.—1 Peturo 2:17.

Kuja ŵaka muchisopa nkhwakukwana cha

Bayibolu likamba kuti ŵanthu atenere kuwungana pamoza kuti asopi Chiuta, kweni likambapu cha kuti munthu wangakondwesa Chiuta asani ndi membala waka muchisopa chinyaki. Kuti Chiuta wakondwi nasi, tikhumbika kuchita vo tisambira zuŵa lelosi. Mwakuyeruzgiyapu, Bayibolu likamba kuti: “Kusopa kwakutowa ndipuso kwambula kufipiskika pa masu paku Chiuta widu kweniso Awusefwi ndi uku: kuphwere ŵana alanda ndi vyoko mu masuzgu ngawu, kweniso kujisunga wambula donthu lakutuwa ku charu.”—Yakobe 1:27.