Kumbi Charu Chimalengi Zukwanji?

Vo Bayibolu limuka

Kuti tiziŵi nyengu yo charu chazamumaliya, tikhumbika kuvwisa chifukwa cho Bayibolu ligwiriskiya ntchitu mazu ngakuti “charu.” Mazu Ngachigiriki ngakuti ko′smos ngo akungafwatuliya kuti “charu,” kanandi ngakamba ukongwa za ŵanthu wo aleka kukoliyana ndi khumbu laku Chiuta. (Yohane 15:18, 19; 2 Peturo 2:5) Nyengu zinyaki, mazu ngakuti ko′smos ngangang’anamuwa so vo ŵanthu achita.​—1 Akorinto 7:​31; 1 Yohane 2:​15, 16.a

Kumbi “kumala kwa charu” kung’anamuwanji?

Mazu ngakuti “kumala kwa charu” ngo ngasanirika so mu ma Bayibolu nganyaki ngo akungafwatuliya, ngangang’anamuwa so kuti “kumala kwa mugonezi,” pamwenga kuti “kumala kwa nyengu.” (Mateyu 24:3; English Standard Version) Mwaviyo, mazu yanga ngang’anamuwa kunangika kwa charu chayichu cha pamwenga ŵanthu wosi, kweni ngang’anamuwa kunangika kwa ŵanthu wo aleka kukoliyana ndi khumbu laku Chiuta.​—1 Yohane 2:​17.

Bayibolu lisambiza kuti “ŵanthu aheni azamujaku so cha” kweni ŵanthu amampha azamukondwa ndi umoyu pacharu chapasi. (Sumu 37:​9-​11) Ŵanthu aheni ŵenaŵa azamubayika pa “chisuzgu chikulu” ndipuso pa nkhondu ya Aramagedoni.​—Mateyu 24:21, 22; Chivumbuzi 16:14, 16.

Kumbi charu chimalengi zukwanji?

Yesu wangukamba kuti: “Kweni va zuŵa pamwenga ora laki, palivi munthu yo waziŵa, chinanga mbangelu kuchanya pamwenga Mwana, kweni Ada pe ndiwu aziŵa.” (Mateyu 24:36, 42) Pakukamba za nyengu ya umaliru wa vinthu, iyu wangukamba so kuti vazamuchitika mwamabuchibuchi, “mu ora lo yimwi muleka kuŵanaŵanaku.”​—Mateyu 24:44.

Chinanga kuti titiliziŵa cha zuŵa chayilu ndipuso ora laki, kweni Yesu wangukamba “chisimikizu” pamwenga vakuchitika vo vazamulongo kuti nyengu ya umaliru wa charu yepafupi. (Mateyu 24:​3, 7-​14) Pakukamba za nyengu yeniyi, Bayibolu likamba kuti ndi “umaliru wa nyengu,” ndipuso “mazuŵa ngakumaliya.”​—Danyele 12:4; Mazu Ngaku Chiuta; 2 Timote 3:​1-5.

Kumbi chilipu cho chazamupona pa umaliru wa charu?

Hinya. Charu cho tijamu chazamunangika cha chifukwa Bayibolu likamba kuti, “chazamusukunyika cha mpaka muyaya.” (Sumu 104:5) Ndipu charu chapasi chazamuzaza ndi ŵanthu, nge mo Bayibolu lilayizgiya kuti: “Arunji azamulonde charu chapasi ndipu azamuja mwenimo kwamuyaya.” (Sumu 37:29) Chiuta wazamusintha vinthu kuti vizije so nge mo venge pakwamba:

• Paradayisu.​—Yesaya 35:1; Luka 23:43.

• Kuvikilirika ndipuso vinthu vamampha.​—Mika 4:4.

• Ntchitu zakukondweska ndipuso zakukhorwesa.​—Yesaya 65:21-​23.

• Matenda ndipuso ukoti vazamumala.​—Jobu 33:25; Yesaya 33:24.