Kumbi Bayibolu Likambanji pa Nkhani Yakupaska?

Vo Bayibolu likamba

Pa nkhani ya kupaska, Bayibolu lititichiska kuti tipaskengi anyidu ndi vilatu vamampha kwambula kuchichizgika pamwenga kudinginyika. Lilongo so kuti kuchita viyo kuyanduliska yo walonde pe cha kweni kuyanduliska so yo wapeleka. (Nthanthi 11:25; Luka 6:38) Yesu anguti: “Kupaska kuchitiska kuti munthu wakondwengi ukongwa kuluska kulonde.”—Machitidu 20:35.

Kupaska ko kukondweska Chiuta

Chiuta wakondwa ukongwa asani tipereka mwakutuliya pasi pa mtima. Bayibolu likamba kuti: “Weyosi wachiti nge mo wasimikiziya mumtima mwaki mwakudinginyika cha pamwenga mwakuchichizgika, pakuti Chiuta watanja munthu yo wapereka mwakukondwa.”—2 Akorinto 9:7, mazu ngamumphata.

Kupaska mwakutuliya mumtima, ntchigaŵa cha “kusopa kwakutowa” ko Chiuta wazomereza. (Yakobe 1:27, mazu ngamumphata) Chiuta wakondwa ukongwa ndi munthu mweniyo watovya ŵanthu wo asuzgika. Iyu wawona kuti munthu waviyo watimukongozga. (Nthanthi 19:17) Bayibolu lisambiza kuti Chiuta wazakumuweze munthu yo wapaska anyaki.—Luka 14:12-14.

Kupaska ko kuleka kukondweska Chiuta

Asani kuchitika pa vifukwa vambula kwenere. Mwakuyeruzgiyapu asani kuchitika ndi chilatu chakuti:

Tijiwonesi ku ŵanthu.—Mateyu 6:2.
Nasiso azitiweze pakumaliya.—Luka 14:12-14.
Tiguli utaski.—Sumu 49:6, 7.

Asani kuchiska vinthu vo Chiuta watinkhana navu. Mwakuyeruzgiyapu, ntchinthu chambula zeru kupereka ndalama kuti munthu wakatchayiyi juga pamwenga kuti wakaguliyi munkhwala wakutimbanyiza wongu kweniso kuti wakamwiyi moŵa mpaka kuloŵe nawu. (1 Akorinto 6:9, 10; 2 Akorinto 7:1) Ndipuso ntchakwenere cha kumupaska ndalama munthu yo wangafiska kujiphwere pakuyija kweni waleke dala kuchita viyo.—2 Atesalonika 3:10.

Asani kutimbanyizga udindu wo Chiuta wakupaska anthulumi wa kuphwere banja. Bayibolu lisambiza kuti mitu ya mabanja yitenere kuphwere mabanja ngawu. (1 Timote 5:8) Chingaja chinthu chambula kwenere asani munthu yo ndi mutu wa banja wangafiska kuwovya ŵanthu anyaki ndi kuleke dala kuwovya ŵanthu a mubanja laki. Ndipu Yesu nayu wanguchenya ŵanthu wo alekiyanga dala kuphwere apapi ŵawu akukota. Yiwu akambanga kuti chuma chawu chosi ndi “mphasu yakuperekeka kwaku Chiuta.”—Mariko 7:9-13.

Mavesi nga mu Bayibolu pa nkhani ya kupaska

Nthanthi 11:25: “Munthu yo wapaska mwawanangwa vinthu vimuyendiyengi umampha, ndipu mweniyo wadiriya maji nayuso wakadiririkiyanga maji.”

Ivi ving’anamuwa kuti: Kupaska kuyanduliska yo walonde pe cha kweni kuyanduliska so yo wapereka.

Nthanthi 19:17: “Yo wachitiya lisungu munthu wakusika, wabwerekesa Yehova ndipu wazakumuweze pa vo wachita.”

Ivi ving’anamuwa kuti: Chiuta wawona kuti we ndi ngongoli ya ŵanthu wo atesesa kupaska ŵanthu wo asuzgika ndipu watiŵalayizga kuti wazakuŵaweze chifukwa cha jalidu lawu la kupaska.

Mateyu 6:2: “Mwaviyo, asani mupereka mphasu zalisungu mungambanga mbata cha nge mo achitiya ŵanthu akunyenga . . . kuti ŵanthu aŵalumbengi.”

Ivi ving’anamuwa kuti: Tikhumbika cha kupaska anyidu ndi chilatu chakuti tiziŵiki ndi ŵanthu.

Machitidu 20:35: “Kupaska kuchitiska kuti munthu wakondwengi ukongwa kuluska kulonde.”

Ivi ving’anamuwa kuti: Tikondwa ukongwa asani tipaska anyidu mwakutuliya mumtima.

2 Akorinto 9:7: “Weyosi wachiti nge mo wasimikiziya mumtima mwaki, mwakudinginyika cha pamwenga mwakuchichizgika, pakuti Chiuta watanja munthu yo wapereka mwakukondwa.”

Ivi ving’anamuwa kuti: Asani tipaska anyidu kwambula kuchichizgika tikondwesa Chiuta.