Yesaya 41:10—“Ungawopanga Cha, Pakuti Nde Nawi”

“Ungawopanga cha, pakuti nde nawi. Ungafipanga mtima cha, pakuti ndini Chiuta waku. Ndikukholesengi, ndikuwovyengi, ndikukongi ndi janja langu lamaryi la urunji.”—Yesaya 41:10, Bayibolu la Charu Chifya.

“Ungachitanga mantha cha, chifukwa nde nawi. Ungafipanga mtima cha, pakuti ini ndini Chiuta waku. Ndikukhwimisengi, hinya, ndikuwovyengi, Ndikukolesengi nadi ndi janja langu lamaryi laurunji.”—Yesaya 41:10, New King James Version.

Vo Lemba la Yesaya 41:10 Ling’anamuwa

Yehovaa Chiuta wasimikiziya ateŵeti ŵaki akugomezgeka kuti waŵawovyengi chinanga kuti angakumana ndi masuzgu.

“Nde nawi.” Yehova wakambiya ateŵeti ŵaki kuti angachitanga mantha cha chifukwa iyu wenawu. Iyu wawona masuzgu ngo ateŵeti ŵaki akumana nangu ndipu wavwisiya so mapempheru ngawu chifukwa nyengu zosi watuŵa nawu.—Salimo 34:15; 1 Peturo 3:12.

“Ndini Chiuta Waku.” Yehova watiŵapembuzga ateŵeti ŵaki asani akumana ndi masuzgu. Mwaviyo, akhumbika kumuwona kuti ndi Chiuta wawu kweniso iyu watiŵawona kuti mbateŵeti ŵaki akugomezgeka. Ndipu akhumbika kugomezga kuti palivi masuzgu ngo Chiuta ngangamutonda kuti waleki kuŵawovya.—Salimo 118:6; Aroma 8:32; Aheberi 13:6.

“Ndikukholesengi, ndikuwovyengi, ndikukongi ndi janja langu lamaryi la urunji.” Yehova wanguwereza fundu yimoza mu nthowa zakupambanapambana kuti waŵasimikiziyi kuti waŵawovyengi. Iyu wagwiriskiya ntchitu janja laki lamaryi kuti walongo vo iyu wachita asani ateŵeti ŵaki akhumbika chovyu. Ndipu asani munyaki wawa, Chiuta watimuyuska ndi janja laki lamaryi.—Yesaya 41:13.

Nthowa yimoza yo Yehova watovye ateŵeti ŵaki nkhuziya mu Mazu ngaki, Bayibolu. (Yoswa 1:8; Aheberi 4:12) Mwakuyeruzgiyapu, Mazu ngaku Chiuta nge ndi ulongozgi wamampha wo utovya ŵanthu wo akumana ndi masuzgu nge ukavu, matenda pamwenga asani munthu yo amuyanjanga watayika. (Nthanthi 2:6, 7) Chiuta wagwiriskiya so ntchitu mzimu waki wakupaturika kuti uwovyi ateŵeti ŵaki kukunthiyapu masuzgu.—Yesaya 40:29; Luka 11:13.

Nkhani ya pa Yesaya 41:10

Mazu nga pa vesi ili nganguwovya Ayuda akugomezgeka wo angutoleke ku ukapolu ku Babiloni. Yehova wangukambiya limu mo arwani azamuyukiya kweniso mo azamuthereske Babiloni. (Yesaya 41:2-4; 44:1-4) Panyengu yo, Ababiloni kweniso mitundu yinyaki yapafupi, atingi achitengi mantha ndi nkhani iyi, kweni Ayuda akhumbikanga kuchita mantha cha chifukwa Yehova watingi waŵavikiliyengi. Katatu kosi Chiuta wanguŵasimikiziya kuti “ungawopanga cha.”—Yesaya 41:5, 6, 10, 13, 14.

Chinanga kuti pakwamba mazu ngo Yehova wangukamba pa Yesaya 41:10 ngalutanga kwa Ayuda akugomezgeka wo ŵenga ku Babiloni, kweni ngangusungika kuti ngawovyi ateŵeti ŵaki wosi. (Yesaya 40:8; Aroma 15:4) Mazuŵa nganu Yehova watovya ateŵeti ŵaki nge mo wachitiyanga munyengu yakali.