KUKONKHOSKA MAVESI NGA MU BAYIBOLU
Yoswa 1:9—“Uje ndi Nthazi Kweniso Uje ndi Chiganga”
“Asi ini ndini ndakulamula venivi? Uje ndi chiganga kweniso uje ndi nthazi. Ungachitanga mantha cha pamwenga kopa, chifukwa Yehova Chiuta waku we nawi kwekosi ko ungaluta.”—Yoswa 1:9, Bayibolu la Charu Chifya.
“Asi ini ndini ndakulamula venivi? Uje ndi nthazi kweniso uje ndi chiganga. Ungawopanga cha; ungafipanga mtima cha, chifukwa AMBUYA Chiuta waku we nawi kwekosi ko ungaluta.”—Yoswa 1:9, New International Version.
Vo Lemba la Yoswa 1:9 Ling’anamuwa
Mazu nga pa lemba ili, ngalongo kuti Yehovaa Chiuta wangusimikiziya mteŵeti waki wakugomezgeka Yoswa, kuti ‘waje ndi chiganga kweniso waje ndi nthazi’ chinanga kuti wangukumana ndi masuzgu ngo ngawonekanga kuti wangamalana nangu cha. Pengavi chifukwa chakuti Yoswa wachitiyi mantha asani wavwiya marangu ngaku Chiuta, chifukwa venga nge kuti Yehova we kujanja laki lamaryi kuti wamuwovyi kuti vinthu vimuyende umampha. Chiuta wenga ndi Yoswa chifukwa wamupaskanga ulongozgi kweniso wamuwovyanga kuti wathereskengi arwani ŵaki ku nkhondu.
Kumbi Yoswa wanguchita wuli kuti ‘waje ndi chiganga kweniso waje ndi nthazi’? Iyu wanguja ndi chiganga kweniso ndi nthazi chifukwa cha mazu ngo Yehova wangupereka pa nyengu yo. Mazu ngenanga ngasazgapu ‘Dangu losi lo Mozesi mteŵeti waku Yehova wangulamula Yoswa.’b (Yoswa 1:7) Yehova wangukambiya Yoswa kuti watenere “kuliŵerenga ndi kulunguruka musana ndi usiku.” (Yoswa 1:8) Kuŵerenga kweniso kulunguruka kungumuwovya Yoswa kuti wasimikizi mtima kuchita khumbu laku Chiuta. Pavuli wanguchita vo wangusambira mu Mazu ngaku Chiuta ndipu wangulondo mwakuphwere vosi vo vingulembekamu.’ Venivi vingumuwovya kuchita vinthu mwazeru ndipu vinthu vingumuyende umampha ukongwa. Chinanga kuti wangukumana ndi masuzgu nganandi, kweni nge mteŵeti wakugomezgeka waku Yehova, Yoswa wanguja ndi umoyu utali kweniso wakukondwesa.—Yoswa 23:14; 24:15.
Mazu ngo Yehova wangukambiya Yoswa ngatitichiska ukongwa nasi mazuŵa nganu. Mazu ngenanga ngalongo kuti Yehova waphwere ateŵeti ŵaki wosi, ukongwa asani akumana ndi masuzgu. Iyu wakhumba kuti vinthu viŵayendiyengi umampha nge mo venge ndi Yoswa! Ndipu mwakuyanana ndi Yoswa, ateŵeti aku Yehova a mazuŵa nganu nawu, ‘angaja ndi chiganga kweniso anthazi’ asani aŵerenga Mazu ngaku Chiuta, Bayibolu, kweniso kulunguruka, ndipuso atenere kuchita vinthu mwakukoliyana ndi vo aŵerenga.
Nkhani ya pa Yoswa 1:9
Mozesi wati wafwa, Yehova wangukambiya Yoswa kuti ndiyu walongozgi mtundu wa Ayisirayeli. (Yoswa 1:1, 2) Pa nyengu iyi, Ayisirayeli anozgekiyanga kuchisere mu Charu Chakulayizgika, charu cha Kanani. Kweni yiwu akhumbikanga kuchita nkhondu ndi arwani ŵawu wo ŵenga anthazi. Mwakuyeruzgiyapu, Yoswa wakhumbikanga kuchita nkhondu ndi Akanani wo ŵenga ŵanthu aheni ukongwa.c (Dotoronome 9:5; 20:17, 18) Kweniso Akanani ŵenga anandi ukongwa ndipuso ŵenga ndi vidya vanthazi va nkhondu, kuphara Ayisirayeli. (Yoswa 9:1, 2; 17:18) Kweni mwachiganga, Yoswa wangulondo ulongozgi waku Yehova. Ndipu Chiuta wangulongo kuti wenga nayu, chifukwa Ayisirayeli anguthereska arwani ŵawu wosi pa vyaka 6 pe.—Yoswa 21:43, 44.
a Yehova ndi zina laku Chiuta ndipu likufwatulika kutuliya ku mazu nga Chiheberi ngo nge ndi vilembu vinayi (YHWH), vo viziŵika kuti Tetiragiramatoni. Mu Mabayibolu nganyaki, zina ili likulembeka kuti “AMBUYA.” Kuti muziŵi vinandi vakukwaskana ndi Yehova kweniso chifukwa cho mu Mabayibolu nganyaki mulivi zina ili, ŵerengani nkhani yamutu wakuti “Kumbi Yehova ndi Yani?”
b Mazu ngo Yoswa wakhumbikanga kungaŵerenga, ngo nasi titingaŵerenga mazuŵa nganu kuziya mu Bayibolu, ngatenere kuti ndi mazu ngo ngakulembeka mu mabuku 5 ngo Mozesi wangulemba (Genezesi, Ekisodo, Levitiko, Numeri, ndipuso Dotoronome), buku la Yobu kweniso Salimo limoza pamwenga ngaŵi.
c Pa nkhani yakuti ntchifukwa wuli nkhondu zaviyo zenga zakuzomerezgeka, ŵerengani nkhani ya mutu wakuti “N’chifukwa Chiyani Mulungu Anawononga Akanani?” mu Chigongwi cha Alinda cha Chichewa cha January 1, 2010.