Yesaya 40:31—“Ŵanthu wo Alindizga Yehova Azamusaniya so Nthazi”

“Kweni ŵanthu wo alindizga Yehova azamusaniya so nthazi.Yiwu azamuphululukiya muchanya nge kuti ŵe ndi mapapa nge nombu. Azamutchimbiya ndipu azamulakatuka cha; Azamukwenda ndipu azamuvuka cha.”—Yesaya 40:31, Bayibolu la Charu Chifya.

“Kweni wo ŵalindizga Ambuya, ŵakawerezgangamo nthazi zawo, ŵakaphururukanga ndi mapapa uli ndi nombo, ŵakachimbiyanga kwambura kugongowa, ŵakayendanga kwambura kuvuka.”—Yesaya 40:31, Mazu Ghaku Chiuta.

Vo Lemba la Yesaya 40:31 Ling’anamuwa

Yehovaa Chiuta wasimikiziya ateŵeti ŵaki kuti waŵapasengi nthazi zo akhumbikiya kuŵa nazu kuti afiski kukunthiyapu pamwenga kumalana ndi masuzgu ngengosi ngo angakumana nangu.

“Ŵanthu wo alindizga Yehova azamusaniya so nthazi.” Ŵanthu wo alindizga pamwenga kugomezga nthazi zaku Chiuta kuti wawovyengi ŵanthu ŵaki, akayika cha kuti waŵawovyengi. (Nthanthi 3:5, 6) Nthowa yimoza yo Chiuta walongore kuti wangawovya ŵanthu wo atimusopa nkhuŵapaska mzimu waki wakupaturika pamwenga kuti nthazi yo wagwiriskiya ntchitu.—Luka 11:13.

“Yiwu azamuphululukiya muchanya nge kuti ŵe ndi mapapa nge nombu.” Mazu yanga ngakonkhoska mo nthazi zaku Chiuta zingagwiriya ntchitu ku munthu. Nombu yitanja kuphululuka kumalu ko kwe mphepu yakufunda yo yituwa pacharu chapasi kuluta kuchanya. Asani nombu yafika pa mphepu yakufunda yeniyi, yitambasuwa mapapa ngaki ndikuzunguliya pa malu po, uku yiphululukiya kuchanya ukongwa. Chifukwa cha mphepu zakufunda zenizi, nombu zingaphuluka kwa maora nganandi kutuwa kumalu nganyaki kuluta kumalu nganyaki, kweni zivuka ukongwa cha.

“Azamutchimbiya ndipu azamulakatuka cha.” Masuzgu ngo tikumana nangu pa umoyu ngangananga liŵavu kweniso maŵanaŵanu ngidu, kweni ndi nthazi zo Chiuta watitipasa tingafiska kukunthiyapu. Nthazi zenizi zingatiwovya kuti tichiti cho ntchamampha mwambula kutole kanthu za masuzgu ngo tikumana nangu. Wakutumika Paulo yo wangukunthiyapu masuzgu ngakulu wangulemba kuti: “Mu vinthu vosi ndija ndi nthazi kuporote mwaku yo watindipaska nthazi.”—Afilipi 4:13.

Nkhani ya pa Yesaya 40:31

Chiuta wangutuma mchimi Yesaya kuti walembi mazu ngenanga vyaka 2,700 vo vajumpha. Chinanga kuti lemba ili ligwira ntchitu kwa ateŵeti wosi akugomezgeka aku Chiuta, kweni Yehova wangugwiriskiya ntchitu mazu nga palemba lenili pakuchiska Ayuda wo angutoleke ku ukapolu ku Babiloni kwa vyaka 70. Po Ayuda aweriyanga kwawu ku Yerusalemu kutuwa ku ukapolu, anguwona mazu ngaku Chiuta ngenanga ngachifiskika. (Yesaya 40:1-3) Chiuta wanguŵapaska nthazi kuti afiski kwenda ulendu utali kweniso wakusuzgab kutuwa ku Babiloni mpaka kuchifika ku Yerusalemu mu 537 B.C.E.—Yesaya 40:29.