Aroma 15:13—“Chiuta yo Wapereka Chilindizga, Wakuzazeni ndi Likondwa Likulu Kweniso Chimangu”

“Chiuta yo wapereka chilindizga, wakuzazeni ndi likondwa likulu kweniso chimangu chifukwa chakuti mutimuthemba, ndi chilatu chakuti muzaziki ndi chilindizga kuziya mu nthazi ya mzimu wakupaturika.”—Aroma 15:13, Bayibolu la Charu Chifya.

“Ndipo Chiuta yo wa chigomekezgu wakuzazeni ndi chimwemwe chose ndi chimangu mu kuvwana, kuti musambasenge mu chigomekezgu, mu nthazi ya Mzimu Wakupaturika.”—Aroma 15:13, Mazu Ghaku Chiuta.

Vo Lemba la Aroma 15:13 Ling’anamuwa

Wakutumika Paulo wakhumbanga kuti Chiuta wazazi ateŵeti ŵaki ndi “likondwa likulu kweniso chimangu.” Mijalidu yamampha yeniyi yikoliyana ndi chilindizga cho Chiuta watilayizga ndipuso nthazi ya mzimu wakupaturika.

Tisambira vakukwaskana ndi chilindizga cho Chiuta watipaska kuziya mu Mazu ngaki, Bayibolu. Mwakukoliyana ndi lemba la Aroma 15:4 lo likamba kuti: “Vinthu vo vikulembeka kali, vikulembeke kuti vitisambizi, ndi chilatu chakuti tije ndi chilindizga chifukwa cha kukunthiyapu ndipuso kupembuzgika ndi Malemba.” Bayibolu livumbuwa vo Chiuta watilayizga kuti wamalisengi masuzgu ngo ngachitiska kuti tiŵevi chilindizga nge ukavu, vinthu vambula urunji, kutama ndipuso nyifwa. (Chivumbuzi 21:4) Chiuta wazamugwiriskiya ntchitu Yesu Khristu kuti wafiski malayizgu ngenanga. Ndichu chifukwa chaki te ndi chilindizga chamampha cha vinthu va munthazi.—Aroma 15:12.

‘Tingazazika ndi chilindizga’ pamwenga ‘tisambasengi mu chigomekezgu,’ pijapija asani titimuthemba ukongwa Chiuta. Kusambira vinandi vakukwaskana ndi Chiuta kungachitiska kuti timugomezgengi ukongwa. (Yesaya 46:10; Tito 1:2) Tiwonga ukongwa chilindizga cho Yehova watipaska, munthu wangaŵa ndi likondwa kweniso chimangu chinanga kuti wangakumana ndi masuzgu.—Aroma 12:12.

Chimangu, likondwa ndipuso chilindizga, ndi mijalidu yo yikoliyana ndi “mzimu wakupaturika.” Mzimu wenuwu ndi nthazi yaku Chiuta yo yiwoneka mu vakuchita.a Mzimu wenuwu ungawovya so ŵanthu kuti aje ndi mijalidu yamampha nge likondwa ndi chimangu.—Agalatiya 5:22.

Nkhani ya pa Aroma 15:13

Kukamba uneneska buku la Aroma ndi kalata yo yalutanga kwa Akhristu wo ajanga ku Roma. Akhristu anyaki atuliyanga mu mabanja nga Chiyuda po anyaki ŵenga Ayuda cha. Paulo wanguchiska wosi kuti akhumbika kugwira ntchitu mwakukoliyana mu vakuchita kweniso mumaŵanaŵanu chinanga kuti apambananga ko atuliya ndipuso midawuku.—Aroma 15:6.

Paulo wangukumbusa Akhristu a ku Roma kuti kwanyengu yitali Chiuta wangukambiya limu nyengu yo ŵanthu wosi azamuchitanga vinthu mwakukoliyana kweniso mo azamusope pamoza. Pakukamba fundu yeniyi, Paulo wangukamba mazu ngo ngasanirika mu Malemba nga Chiheberib maulendu nganayi. (Aroma 15:9-12) Fundu yaki yenga yakuti: Ayuda limoza ndi ŵanthu a mitundu yosi angayanduwa ndi uteŵeti waku Khristu. Magulu ngosi ngaŵi, Ayuda ndi wo ŵenga Ayuda cha, angaja ndi chilindizga chakuyanana chakutuliya kwaku Chiuta. Ŵanthu wosi wo ŵenga mu mpingu wa ku Roma, akhumbikanga ‘kulondiyana,’ kwambula kutole ko atuliyanga. Venivi vang’anamuwanga kulongorana lisungu pamwenga kuja ndi mzimu wamasangu ku munthu weyosi.—Aroma 15:7.