Salimo 46:10—“Zomerezani, Ndipu Muziŵi Kuti Ini Ndini Chiuta”

“Zomerezani, ndipu muziŵi kuti ini ndini Chiuta. Ndikwezekengi pakati pa mitundu ya ŵanthu; Ndikwezekengi pacharu chapasi.”—Salimo 46:10, Bayibolu la Charu Chifya.

“Jani chete, ndipo ziŵani kuti ine ndine Chiuta. Nditumphuskika mukati mu mitundu, ndikutumphuskika mu charu chapasi.”—Sumu 46:10, Mazu Ghaku Chiuta.

Vo Lemba la Salimo 46:10 Ling’anamuwa

Chiuta wakhumba kuti weyosi wamusopengi kweniso waziŵengi kuti iyu ngwakwenere kulamuliya charu. Fundu yakuti Chiuta ngwanthazi ndipuso ngwakwenere kulamuliriya njauneneska ndipu weyosi yo wakhumba kuja ndi umoyu kwamuyaya wakhumbika kuziŵa venivi.—Chivumbuzi 4:11.

“Zomerezani, ndipu muziŵi kuti ini ndini Chiuta.” Mabayibolu nganyaki ngakufwatuliya chiganizu chakwamba chenichi kuti “Jani chete.” Ndichu chifukwa chaki ŵanthu anandi aŵanaŵana uheni kuti mazu ngenanga ndi dangu lakuti munthu watumbikengi pamwenga wajengi cheti mu tchalitchi. Kweni mazu nga Chiheberi ngo akungafwatuliya kuti “zomerezani, ndipu muziŵi kuti ini ndini Chiuta,” ndi mazu ngo Yehovaa Chiuta wangukamba kuti wachiski mtundu wosi wa ŵanthu. Iyu watiŵakambiya kuti aleki kususkana nayu ndipuso aziŵi kuti iyu ndiyu ngwakwenere kumusopa.

Mazu ngakuchiska ngenanga ngasanirika so pa Salimo 2. Yapa, Chiuta walayizga kuti wazamulimbana ndi ŵanthu wo atimususka. Munthowa yinyaki, ŵanthu wo aziŵa ulamuliru waku Chiuta athemba iyu kuti waŵalongozgi, waŵapaski nthazi ndi zeru. “Wo abisama mwaku Iyu,” aja ndi likondwa ndipuso aja akuvikilirika, ukongwa munyengu zakusuzga.—Salimo 2:9-12.

“Ndikwezekengi pakati pa mitundu ya ŵanthu; Ndikwezekengi pacharu chapasi.” Kali, Yehova Chiuta wakwezekanga asani wagwiriskiya ntchitu nthazi zaki pakuvikiliya ŵanthu ŵaki. (Ekisodo 15:1-3) Kunthazi, iyu wazamukwezeka pachanya ukongwa asani weyosi pacharu chosi wazamuthera ku ulamuliru waki kweniso kumusopa.—Salimo 86:9, 10; Yesaya 2:11.

Nkhani ya pa Salimo 46:10

Buku linyaki likamba kuti Salimo 46 ndi “sumu yakulongo kukondwa chifukwa cha nthazi zaku Chiuta yo wavikiliya ŵanthu ŵaki.” Ŵanthu aku Chiuta asani atumba sumu ya pa Salimo 46, alongonga kuti athemba Yehova kuti wangaŵavikiliya ndipuso kuŵawovya. (Salimo 46:1, 2) Mazu ngenanga ngaŵakumbusanga kuti nyengu zosi Yehova wenawu.—Salimo 46:7, 11.

Kuti athembengi ukongwa nthazi zaku Chiuta zo zingaŵavikiliya, lemba la salimo 46 litiŵachiska kuti aŵanaŵaniyengi ntchitu zaki zanthazi. (Salimo 46:8) Munthowa yinyaki, venivi vilongo kuti iyu we ndi nthazi zakumalisa nkhondu. (Salimo 46:9) Yehova wangumalisa nkhondu za mu nyengu ya mu Bayibolu, mwakuvikiliya ŵanthu ŵaki ku mitundu yo yaŵatinkhanga. Kweni, Bayibolu lilayizga kuti pambula kuswera yapa, Chiuta wazamumalisiya limu nkhondu pacharu chosi.—Yesaya 2:4.

Kumbi Yehova wechekovya ateŵeti ŵaki mazuŵa nganu? Hinya. Mwaviyo, wakutumika Paulo wanguŵachiska mwanthazi Akhristu kuti athembengi Yehova kuti waŵawovyi. (Aheberi 13:6) Fundu zo ze mulemba la Salimo 46, zititichiska kuti tithembengi ukongwa nthazi zaku Chiuta kuti zitivikiliyi. Zititiwovya kuwona kuti Chiuta ndi “malu ngidu ngakuthaŵiyaku kweniso nthazi zidu.”—Salimo 46:1.

Woneriyani vidiyo iyi kuti muwoni vo ve mu buku la Masalimo.