Yohane 14:27—“Chimangu Nditikusiliyani”

“Nditikusiliyani chimangu ndipuso nditikupaskani chimangu changu. Nditichipereka kwaku yimwi nge mo charu chipereke cha. Mitima yinu yingasuzgikanga cha ndipuso yingakhwinyatanga cha chifukwa cha mantha.”—Yohane 14:27, Bayibolu la Charu Chifya.

“Chimangu nditikusiliyani; chimangu changu nditikupaskani, ini kuti nditikupaskani nge mo charu chipaskiya cha. Mtima winu ungakweŵekanga cha, ndipuso ungatenthemanga cha.”—Yohane 14:27, American Standard Version.

Vo lemba la Yohane 14:27 Ling’anamuwa

Pakukamba mazu yanga, Yesu wanguŵasimikiziya mwachanju akutumika ŵaki kuti angasuzgikanga ukongwa maŵanaŵanu cha asani akumana ndi masuzgu. Nge iyu, yiwu akhumbikanga kulutirizga kuja ndi chimangu chamumtima mwakuwovyeka ndi Chiuta.

Kumbi ndi mtundu wuli wa chimangu wo Yesu wangusiliya pamwenga kuti wangupaska akutumika ŵaki? Yesu wanguŵapaska chimangu chaki, cho chiyanana ndi chimangu cho iyu wenga nachu. Chimangu ichi ching’anamuwa kuleka kukumana ndi masuzgu cha. (Yohane 15:20; 16:33) Chinanga kuti Yesu amuchitiyanga vinthu vambula urunji mpaka pa zuŵa lo wangufwiya, iyu wenga mbwenu ndi chimangu mumaŵanaŵanu ndipuso mumtima. (Luka 23:27, 28, 32-34; 1 Peturo 2:23) Iyu wenga ndi chimangu chamumtima chifukwa waziŵanga kuti wenga wakuzomerezeka ndi Awisi a Yehovaa ndipuso kuti amuyanjanga.—Mateyu 3:16, 17.

Yesu wanguŵapaska chimangu akutumika ŵaki mwakuŵasimikiziya kuti iyu ndi Awisi atiŵayanja ndipuso mbakuzomerezeka. (Yohane 14:23; 15:9, 10; Aroma 5:1) Chimangu ichi, cho chathembanga kuti agomezgengi kuti Yesu ndi Mwana waku Chiuta, chinguŵawovya kuti aleki kuchita mantha. (Yohane 14:1) Chinanga kuti Yesu watingi wajengi nawu cha mwakuliŵavu, iyu wanguŵalayizga kuti mzimu wakupaturika uŵawovyengi kuja ndi chigomezgu kweniso chimangu chamumtima. (Yohane 14:25-27) Wo alondo Yesu achita chiganga kuti amalani ndi masuzgu ngo akumana nangu, achiziŵa kuti Yehova watiŵayanja kweniso waŵawovyengi.—Aheberi 13:6.

Pa nyengu yo Yesu wenga pacharu chapasi, ŵanthu akhumbiyananga chimangu asani atawuzgana. (Mateyu 10:12) Chinanga kuti venga viyo, Yesu wanguŵakhumbiya waka chimangu cha akutumika ŵaki kweni wanguŵapaska chimangu. Kusazgiyapu yapa, chimangu cho Yesu wanguŵapaska ntchakupambana ukongwa ndi chimangu cho charub chipereka. Charu chingapereka chimangu chimanavi ku ŵanthu asani atanjana ndi anyawu, we ndi chuma, mbakutchuka pamwenga ŵe ndi udindu. Kweni chimangu chaku Yesu chathembanga mo vinthu viliri cha pa umoyu wa munthu. Ichi ntchimangu cha mumtima chambula kumala.

Nkhani ya pa Yohane 14:27

Yesu wangukambiya akutumika ŵaki akugomezgeka mazu yanga ndi usiku wakuti wafwengi mawa laki. Usiku wenuwu, iyu wanguŵakambiya kuti kwaja kamanavi kuti waŵasiyi. (Yohane 13:33, 36) Akutumika ŵaki anguchita chitima ukongwa. (Yohane 16:6) Yesu wanguŵachiska ndipu wanguŵakonkhoske chifukwa cho akhumbikiyanga cha kufipa mtima ndi vo vichitikengi asani waŵasiya.

Mazu ngaku Yesu ngangachiska so Akhristu wosi mazuŵa nganu. Nasi so tingaja ndi chimangu. (2 Atesalonika 3:16) Asani taja akusambira aku Yesu, tisambira kuti tija akuzomerezeka kwaku iyu ndi Awisi a Yehova kweniso kuti wosi ŵaŵi atitiyanja. (Akolose 3:15; 1 Yohane 4:16) Pakumaliya paki, tifipa mtima cha. Chifukwa wuli? Chifukwa Chiuta wenasi.—Salimo 118:6; Afilipi 4:6, 7; 2 Peturo 1:2.

Woneriyani kavidiyo kafupi ko kakonkhoska vo ve mubuku la Yohane.