Luka 1:37—“Pakuti Kwaku Chiuta Kuŵengevi cho Chingatondeka”

“Chifukwa palivi mazu ngo Chiuta wangatondeka kufiska.”—Luka 1:37, Bayibolu la Charu Chifya.

“Pakuti kwaku Chiuta kuŵengevi cho chingatondeka.”—Luka 1:37, Mazu Ghaku Chiuta.

Vo Lemba la Luka 1:37 Ling’anamuwa

Chiuta Wanthazizosi wangachita vinthu vo ŵanthu angaŵanaŵaniyaku cha kuti vingachitika. Palivi chechosi cho chingamutondekesa kufiska vo wakamba pamwenga malayizgu ngaki.

Mazu ngakwambiriya ngo akungafwatuliya kuti “mazu ngo” ngangang’anamuwa ‘vo munthu munyaki wakamba’ ndipu mwakukoliyana ndi nkhani iyi munthu waki ndi Chiuta. Ngangang’anamuwa so vinthu vo vachitika chifukwa cha vo YehovaaChiuta wangukamba. Chifukwa chakuti mazu ngaku Chiuta nyengu zosi ngafiskika, lemba la Luka 1:37 lingafwatulikiya so kuti: “Chifukwa malayizgu ngaku Chiuta ngatondeka cha” pamwenga “Pakuti kwaku Chiuta palivi cho chingatondeka.” Mazu ngenanga ngalongo kuti mazu ngakwambiriya nga Chigiriki, ngakonkhoska uneneska wakuyanana waka ndi mazu yanga ngakuti: Palivi mazu pamwenga malayizgu ngaku Chiuta ngo ngangaleka kufiskika, chifukwa palivi cho iyu wangatondeka kufiska.—Yesaya 55:10, 11.

Mazu ngakuyanana ndi ngenanga ngakukwaskana ndi malayizgu ngaku Chiuta ngasanirika mu Bayibolu losi lamphumphu. Mwakuyeruzgiyapu, Yehova, mwakugwiriskiya ntchitu mungelu waki, wangukambiya limu kuti muwolu waku Abrahamu, zina laki Sara yo wenga chumba, waŵengi ndi nthumbu chinanga kuti wenga wakukota. Chiuta wangukamba so kuti: “Kumbi chilipu cho Yehova wangatondeka kuchita?” (Genezesi 18:13, 14) Yobu wati waŵanaŵaniyapu pa vinthu vo Yehova wakulenga wangukamba kuti: “Palivi chinthu cho yimwi mwaŵanaŵana kuti muchitengi, cho chingakutondani.” (Yobu 42:2) Ndipu akusambira aku Yesu ŵati ayamba kukayikiya kuti Chiuta wangaŵataska cha, Yesu wanguŵakumbusa kuti “palivi cho Chiuta wangatondeka kuchita.”—Mateyu 19:25, 26.b

Nkhani ya pa Luka 1:37

Mungelu munyaki zina laki Gabiriyeli wangukambiya msungwana munyaki wa Chiyuda yo wenga wechendagonanepu ndi munthulumi, zina laki Mariya, mazu ngo nge pa Luka 1:37. Gabiriyeli wangukambiya msungwana mwenuyu kuti wazamubala “Mwana wa Wapachanya Limu” ndipuso kuti ‘wazimupaski zina lakuti Yesu.’ Iyu wazamuja Fumu ya Ufumu waku Chiuta yo wazamulamuliya kwamuyaya.—Luka 1:26-33; Chivumbuzi 11:15.

Mariya wangufumba mungelu kuti vingachitika wuli venivi chifukwa wenga wechendayirwi kweniso ‘wechendagonanepu ndi munthulumi.’ (Luka 1:34, 35) Gabiriyeli wangumumuka kuti Chiuta wazamugwiriskiya ntchitu mzimu Waki wakupaturika pamwenga kuti nthazi yaki yo yigwira ntchitu. Pa nyengu iyi, Yesu ndipu wekuchanya nge mwana wauzimu waku Chiuta. Mwaviyo, Yehova wangugwiriskiya ntchitu mzimu waki wakupaturika kusamusa umoyu wa Mwana waki kutuwa kuchanya kuza mumoyu mwaku Mariya. (Yohane 1:14; Afilipi 2:5-7) Venivi vinguchitiska kuti Mariya waje ndi nthumbu mwakuziziswa. Pakukhumba kumuchiska kuti wayigomezgengi ukongwa nthazi yaku Chiuta, mungelu wangukambiya Mariya kuti mubali waki Elizabeti nayu we ndi nthumbu ya mwana munthulumi “chinanga kuti ngwakukota.” Pakwamba, Elizabeti ndi mulumu waki Zekariya, ŵengavi mwana chifukwa chakuti Elizabeti wenga chumba. (Luka 1:36) Mwana wawu wenga Yohane Mubatizi, yo nayu Yehova wangukambiya limu uteŵeti wo wazamuchita.—Luka 1:10-16; 3:1-6.

Viwoneka kuti mungelu Gabiriyeli wachikamba mazu nga pa lemba la Luka 1:37, waŵanaŵaniyanga vaku wosi ŵaŵi Mariya ndi Elizabeti. Mazu ngenanga ngasimikiziya so ateŵeti aku Yehova mazuŵa nganu kuti Iyu wazamufiska nadi malayizgu ngaki. Malayizgu ngenanga ngasazgapu layizgu lakuti Mwana waki Yesu Khristu, yo ndi Fumu ya Ufumu wakuchanya waku Chiuta wazamulamuliya mwaurunji ndipu wazamutuzgapu maboma ngosi nga ŵanthu.—Daniyeli 2:44; 7:13, 14.

Woneriyani kavidiyo kafupi yaka kuti muvwi vo ve mubuku la Luka.