KUKONKHOSKA MAVESI NGA MU BAYIBOLU
Nthanthi 17:17—“Bwezi Litanja Nyengu Zosi”
“Bwezi chayilu litanja nyengu zosi ndipu ilu ndi mubali yo wakubalika kuti wakuwovyi pa nyengu ya suzgu.”—Nthanthi 17:17, Bayibolu la Charu Chifya.
“Bwezi litanja nyengu zosi, ndipu mubali wakubalika kuti wakuwovyi pa nyengu ya suzgu.”—Nthanthi 17:17, New International Version.
Vo Lemba la Nthanthi 17:17 Ling’anamuwa
Mabwezi chayingu ngaja ngakuthembeka kweniso ngakugomezgeka. Ndipu nge mo vijaliya ndi ŵana a banja limoza, mabwezi chayingu ngakugomezgeka, ukongwa pa nyengu ya suzgu.
“Bwezi chayilu litanja nyengu zosi.” Mazu yanga ngangang’anamuwa so kuti “mabwezi ngalongorana chanju nyengu zosi.” Mazu Ngachiheberi ngo pa lemba ili akungafwatuliya kuti “chanju” ngasazgapu vinandi kuphara waka mo munthu wavwiya. Ngasazgapu chanju cho munthu wangalongo mwakujipereka ukongwa kuziya mu vakuchita. (1 Akorinto 13:4-7) Mabwezi ngo ngalongorana chanju chaviyo ngaleka cha kugomezgana chinanga ubwezi wawu ungaŵa pa ngozi yakuti ungamala, panyaki chifukwa chakupambana maŵanaŵanu pa nkhani zinyaki pamwenga chifukwa cha mayeseru nganyaki ngo akumana nangu. Yiwu agowokiyana ndi mtima wosi. (Nthanthi 10:12) Ndipu asani munyaki vinthu vitimuyende umampha, mubwezi waki watimuchitiya sanji cha. Mumalu mwaki, wakondwe nayu limoza.—Aroma 12:15.
“Bwezi chayilu . . . ndi mubali yo wakubalika kuti wakuwovyi pa nyengu ya suzgu.” Nthanthi iyi yigogomezge fundu yakuti ŵanthu a banja limoza atanjana ukongwa. Mwaviyo, asani tichita vosi vo tingafiska kuti tiwovyi mubwezi widu mweniyo wakumana ndi suzgu, ndikuti tichita vinthu nge mo ŵanthu a banja limoza angachitiya. Kusazgiyapu yapa, ubwezi waviyo umala cha chifukwa cha masuzgu. Mumalu mwaki, uja wakukho ukongwa chifukwa pa nyengu yeniyi ndipu atumbikana kweniso kwanjana ukongwa.
Nkhani ya pa Nthanthi 17:17
Mu buku la Nthanthi mwe masachizu kweniso mazu nganandi ngazeru ngo ngakulembeka mwakudumuwa ndipuso munthowa yakuti munthu yo waŵerenga waŵanaŵaniyengepu. Chigaŵa chikulu cha buku la mu Bayibolu lenili chikulembeka ndi Fumu Solomoni. Iyu wangulemba buku ili mwakuyanana ndi mo ndakatulu zinandi za Chiheberi zalembekiyanga pa nyengu yo. Ndipu mumalu mwakugwiriskiya ntchitu mazu ngo kukumaliya ngavwika mwakuyanana, iyu wangulemba fundu zo ziyanana pamwenga kuyeruzgiya fundu ziŵi zo zisuskana. Mwakuyeruzgiyapu, fundu yachiŵi pa lemba la Nthanthi 17:17 yigogomezge fundu yakwamba pa vesi lenili. Penipo pa lemba la Nthanthi 18:24, fundu yachiŵi yisuskana ndi fundu yakwamba. Lemba ili likamba kuti: “Pe mabwezi ngo ngakunozgeka kupwetekana, kweni pe bwezi lo limatiriya kuluska mubali waku.”
Vingachitika kuti pa nyengu yo Solomoni walembanga mazu nga pa Nthanthi 17:17, waŵanaŵaniyanga ubwezi wakukho wo wengapu pakati pa awisi a Davidi ndi Yonatani mwana wa Fumu Sauli. (1 Samuyeli 13:16; 18:1; 19:1-3; 20:30-34, 41, 42; 23:16-18) Chinanga kuti pengavi ubali pakati paku Davidi ndi Yonatani, kweni yiwu ayanjananga ukongwa. Yonatani wanguŵika umoyu waki pangozi kuti wavikiliyi mubwezi waki.a
Mo Lemba la Nthanthi 17:17 Likulembeke mu ma Bayibolu Nganyaki
“Bwezi litanja nyengu zosi, ndipu lija mubali pa nyengu ya suzgu.”—The Bible in Basic English.
“Mubwezi waku ndi mweniyo watikuyanja nyengu zosi, ndipu mubali waku wakuwiyaku kuti wakuwovyi pa nyengu ya suzgu.”—The Moffatt Translation of the Bible.
“Bwezi litanja nyengo zose, ndipu mwana munyaku wakupapikiya suzgu.”—Mazgu Ghaku Chiuta.
Woneriyani kavidiyo yaka kuti muwoni vo ve mu buku la Nthanthi.
a Ŵerengani nkhani yamutu wakuti “Angwamba Kwanjana Ukongwa.”