Chitatu, August 6
Nthowa ya ŵanthu arunji ye nge ukweru wa matandakucha wo uŵaliyaŵaliya mpaka po kwachiya limu.—Nthanthi 4:18.
Mazuŵa nganu ngakumaliya, Yehova wagwiriskiya ntchitu gulu laki kupereka chakurya chauzimu kuti watiwovyi kulutirizga kwenda pa “Msewu Wakupaturika.” (Yesa. 35:8; 48:17; 60:17) Tingakamba kuti munthu weyosi yo wazomera kusambira Bayibolu ndikuti we ndi mwaŵi wakwamba kwenda pa “Msewu Wakupaturika.” Anyaki atenda ŵaka mtunda umanavi mbwenu atuwapu pa msewu ukulu. Penipo anyaki akhumbisiska kulutirizga kwenda pa msewu wenuwu mpaka po amaliziya ulendu wenuwu. Kumbi ulendu wenuwu umaliya pani? Kwaku wo ŵe ndi chilindizga chakuluta kuchanya, “Msewu Wakupaturika” utiŵalongozge ku “paradayisu waku Chiuta” kuchanya. (Chivu. 2:7) Ndipu wo ŵe ndi chilindizga chakuzija pacharu chapasi, msewu ukulu wenuwu utiŵalongozge kukumaliya kwa vyaka 1,000 va ulamuliru waku Khristu pa nyengu yo weyosi wazamuja wakufikapu. Asani mazuŵa nganu mutenda pa msewu ukulu wenuwu, mungalereskanga kuvuli cha. Ndipu mungatuwangapu cha pa msewu wenuwu mpaka po mwamaliziya ulendu winu wakuchifika mucharu chifya! w23.05 17 ¶15; 19 ¶16-18
Chinayi, August 7
Te ndi chanju chifukwa iyu ndiyu wangwamba kutiyanja.—1 Yoha. 4:19.
Asani muŵanaŵaniya vinthu vosi vamampha vo Yehova wakuchitiyani, mumuwongengi ndipuso mukhumbisiskengi kujipereka kwaku iyu. (Sali. 116:12-14) Bayibolu likamba kuti “mphasu yeyosi yamampha ndipuso yakufikapu,” vituliya kwaku Yehova. (Yako. 1:17) Ndipu mphasu yikulu ukongwa yo wakukupaskani ndi sembi ya Mwana waki Yesu. Mphasu yeniyi njapade ukongwa ndipu yitovya kuti muje pa ubwezi wakukho ndi Yehova. Kweniso wakukupaskani mwaŵi wakuti muzije ndi umoyu wamuyaya. (1 Yoha. 4:9, 10) Nthowa yamampha ukongwa yakulongore kuti muwonga chanju cho Yehova wakukulongoni kweniso vinthu vosi vamampha vo wakukuchitiyani nkhujipereka kwaku iyu.—Doto. 16:17; 2 Akori. 5:15. w24.03 5 ¶8
Chinkhondi, August 8
Munthu yo watenda mwakunyoloka watopa Yehova.—Nthanthi 14:2.
Asani tiwona mijalidu yiheni yo ŵanthu achita mazuŵa nganu, tituvwa nge mo Loti wavwiyanga. Iyu “wasuzgikanga maŵanaŵanu chifukwa chakuti ŵanthu ambula kuvwiya marangu achitanga jalidu liheni mwambula soni” ndipu iyu waziŵanga kuti Awusefwi akuchanya atinkha jalidu liheni. (2 Petu. 2:7, 8) Chifukwa chakuti Loti wawopanga Chiuta kweniso wamuyanjanga, wakhwechanga mijalidu yiheni yo ŵanthu wo wajanga nawu pafupi achitanga. Nasi tija ndi ŵanthu wo atizitumbika cha fundu zaku Yehova, pamwenga atizitumbika kamanavi. Chinanga kuti ve viyo, tingalutirizga kuja ndi mijalidu yamampha asani tilutirizga kwanja Yehova kweniso kumuwopa mu nthowa yakwenere. Yehova watitiwovya kuti tichiti venivi kuziya mu ulongozgi wakuchiska wo we mu buku la Nthanthi. Akhristu wosi, anthulumi, anthukazi, achinyamata kweniso akukota, angayanduwa asani aŵanaŵaniya ulongozgi wazeru wo usanirika mu buku lenili. Asani titopa Yehova, tikhwecha kwanjana ndi ŵanthu wo achita vinthu viheni. w23.06 20 ¶1-2; 21 ¶5