Mungawona kuti Rabeka wangujipereka kumwisa ngamila mpaka po zingugutiya. Asani ngamila ye ndi nyota ukongwa yitumwa maji malita 95. Sonu tingakamba kuti asani ngamila zosi zenga ndi nyota ukongwa ndikuti Rabeka wangumwisa maji ngamila izi kwa mawora nganandi. Chifukwa cha mo vinthu venge vakukayikisa kuti ngamila izi zenga ndi nyota ukongwa.a Kweni kumbi Rabeka wanguŵanaŵaniya ukongwa za nyengu? Awa. Iyu wangukhumbisisa kuti wamuwovyi munthu mwenuyu. Munthu uyu wanguzomera kuti Rabeka wamuwovyi. Iyu wamuleresesanga Rabeka panyengu yo waneŵanga maji pachisimi ndi kuchingadira muchakumwiyamu ngamila kwa maulendu nganandi.​—Chiyambo 24:20, 21.

Rabeka watenere kuti wanguwona kuti munthu yuwa wamuleresesanga. Iyu wamuleresanga ndi maŵanaŵanu ngaheni cha kweni wazizwanga ŵaka ndi nkharu yaki yamampha ndipu wangukondwa. Rabeka wati wamaliza kumwisa ngamila, munthu uyu wangumupasa majuda ngakudula ukongwa. Iyu wangumufumba kuti: “Kumbi ndiwi mwana wakuyani? Kumbi munyumba ya awusu mwe malu ngakuti tingachigonamu?” Munthu uyu wangukondwa ukongwa Rabeka wati wamukambiya za banja laki. Ndipu wangumukambiya so mwakukondwa kuti: “Te ndi vakurya vinandi va viŵetu kweniso malu ngakugonamu ngalipu.” Iyu wangujipereka kuwovya munthu uyu limoza ndi ŵanthu anyaki wo wenga nawu. Pavuli paki, Rabeka wangutchimbiya kuti wakakambiyi anyina vo vachitika.​—Chiyambo 24:22-28, 32.