Vo Mungachita Kuti Muvwisengi vo Muŵerenga mu Bayibolu

Kumbi nyengu yinyaki mwapenjanga kugwira ntchitu yinyaki yakusuzga kweni mwasoŵanga pakwambiya? Kuti ntchitu yo yileki kukufyoni, panyaki mungwamba kuyigwiraku kamanakamana. Mungachita so venivi pakuŵerenga Bayibolu. Nyengu zinyaki mungajifumba kuti, ‘Sonu ndiyambiyengi pani?’ Musambiru ili muwonengi vo mungachita kuti mukondwengi ndi kuŵerenga kweniso kusambira Bayibolu.

1. Ntchifukwa wuli mukhumbika kuŵerenga Bayibolu zuŵa lelosi?

Munthu yo waŵerenga Bayibolu pamwenga “dangu laku Yehova” zuŵa lelosi, wakondwa ndipuso vinthu vitimuyende umampha. (Ŵerengani Salimo 1:1-3.) Mungayambapu kuliŵerenga kwa maminisi ngamanavi zuŵa lelosi. Asani mwayamba kungaziŵiriya Mazu ngaku Chiuta, mukondwengi ukongwa asani mutingaŵerenga.

2. Kumbi ndi vinthu wuli vo vingakuwovyani kuti muvwisengi vo muŵerenga mu Bayibolu?

Kuti tivwisengi vo tiŵerenga mu Bayibolu, tikhumbika kuma dankha ndi kuŵanaŵaniyapu pa vo tiŵerenga. Titenere kuliŵerenga ndipuso “kulunguruka.” (Yoswa 1:8) Muchiŵerenga, mujifumbengi mafumbu yanga: ‘Kumbi nkhani iyi yitindisambizanji vakukwaskana ndi Yehova Chiuta? Kumbi ndingayigwiriskiya wuli ntchitu pa umoyu wangu? Kumbi ndingaŵawovya wuli anyangu ndi mavesi ngenanga?’

3. Kumbi mungachita wuli kuti musaniyengi nyengu yakuŵerenge Bayibolu?

Kumbi musuzgika kuti musaniyi nyengu yakuŵerenge Bayibolu? Venivi ndivu vititichitikiya tanandi. Kweni Bayibolu likamba kuti “nyengu yinu muyigwiriskiyengi ntchitu mwakwenere.” (Aefeso 5:16) Mungachita venivi mwakupatuwa nyengu yakuŵerenge Bayibolu zuŵa lelosi. Ŵanthu anyaki asankha kuŵerenga Bayibolu ndi mlenjilenji. Anyaki aŵerenga ndi msana asani apumuwa. Kweniso anyaki asankha kuŵerenga Bayibolu ndi mazulu ŵechendagoni. Yimwi mungasankha nyengu niyi?

SAMBIRANI VINANDI

4. Vo mungachita kuti mukondwengi ndi kuŵerenga Bayibolu

Nyengu zinyaki vingaŵa vakusuzga kuti tiyambi kuŵerenga Bayibolu. Kweni tingayamba kuja ndi mtima ‘wakukhumbisiska’ kuŵerenga Bayibolu nge mo munthu wangayambiya kwanja chakurya chinyaki chasonu. Ŵerengani 1 Peturo 2:2 ndipu pavuli paki kambiskanani fumbu ili:

• Asani mungayamba kuŵerenga Bayibolu zuŵa lelosi, kumbi muwona kuti mungayamba kuliyanja ndi kusimikiza mtima kuti muchitengi venivi nyengu zosi?

Woneriyani VIDIYO kuti muwoni vo ŵanthu anyaki anguchita kuti ayambi kuŵerenga Bayibolu ndi mtima wosi. Pavuli paki kambiskanani mafumbu ngo nge mumphata.

VIDIYO: Achinyamata Atamba Kwanja Mazu Ngaku Chiuta (5:33)

• Nge mo tawone mu vidiyo, kumbi ndi masuzgu wuli ngo achinyamata angumalana nangu?

• Ntchinthu wuli chinguŵawovya kuti alutirizgi kuŵerenga Bayibolu zuŵa lelosi?

• Kumbi anguchita wuli kuti akondwengi ukongwa ndi kuŵerenga Bayibolu?

Vo vingakuwovyani kuti muyambepu kuŵerenga Bayibolu:

• Sankhani Bayibolu lo livwika umampha lo likufwatulika mwauneneska. Yesani kuŵerenga Bayibolu la Charu Chifya asani lilimu mu chineneru chinu.

• Yambani kuŵerenga nkhani zo zitikukondwesani ukongwa. Wonani masachizgu patchati chakuti “Yambanipu Kuŵerenga Bayibolu.”

• Mulembengi vo mwaŵerenga. Gwiriskiyani ntchitu “Tchati Chakuŵerenge Bayibolu” cho che mubuku lenili.

• Mugwiriskiyengi ntchitu pulogilamu ya JW Library.^® Pulogilamu yeniyi yingakuwovyani kuti muŵerengengi ndi kuvwisiya Bayibolu kwekosi ko mungaŵa, pafoni pamwenga pachipangizu chinyaki chechosi.

• Mugwiriskiyengi ntchitu fundu zakukumaliya mu Bayibolu la Charu Chifya. Fundu zenizi ze ndi mapu, matchati ndipuso mazu ngo ngakonkhoskeka. Vosi venivi vingakuwovyani kuti mukondwengi pakuŵerenga Bayibolu.

5. Munozgekiyengi sambiru

Ŵerengani Salimo 119:34, pavuli paki kambiskanani fumbu ili:

• Ntchifukwa wuli mukhumbika kupemphera dankha mwechendayambi kuŵerenga Bayibolu pamwenga kunozgeke sambiru?

Kumbi mungachita wuli kuti muvwisengi vo musambira? Pakunozgeke sambiru lelosi mubuku ili yesani kuchita ivi:

1. Muŵerengengi ndimi zo ze kukwamba kwa sambiru lelosi.

2. Muŵerengengi malemba ngo ngaŵikikamu ndipu mujifumbengi kuti ngakoliyana wuli ndi nkhani yo muŵerenga.

3. Mugwalengi mzeri kusi kwa mazu ngo ngamuka fumbu lelosi ndipu venivi vikuwovyeningi pa nyengu yo mukambiskana ndi msambizi winu.

Kumbi muziŵa?

Akaboni aku Yehova agwiriskiyapu ntchitu Mabayibolu ngakupambanapambana. Kweni tiwona kuti Bayibolu la Charu Chifya ndilu leumampha ukongwa chifukwa likufwatulika mwauneneska, livwika umampha ndipuso ligwiriskiya ntchitu zina laku Chiuta.—Wonani nkhani ya pa Webusayiti yamutu wakuti “Kumbi Akaboni aku Yehova Ŵe ndi Bayibolu Lawu?”

KUMBI MWASAMBIRANJI?

Kuti muvwisengi vo muŵerenga mu Bayibolu mupempherengi kwaku Chiuta kuti wakuwovyeni, musaniyengi nyengu yakuliŵerenge ndipuso munozgekiyengi sambiru lelosi.

Kuweriyamu

• Kumbi ndi vinthu wuli vo vingakuwovyani kuti muvwisengi vo muŵerenga mu Bayibolu?

• Kumbi yimwi muwona kuti nyengu yamampha yo mungaŵerenge pamwenga kusambira Bayibolu ndi niyi?

• Ntchifukwa wuli mukhumbika kunozgeke sambiru lelosi?

FUFUZANI

Wonani fundu zo zingakuwovyani kuti muvwisengi vo muŵerenga mu Bayibolu.

“Vo Mungachita Kuti Mulivwisengi Bayibolu” (Chigongwi cha Alinda Na. 1 2017)

Wonani nthowa zitatu zo mungaŵerenge Bayibolu.

“Kumbi Bayibolu Lingandiwovya Wuli?—Chigaŵa Chakwamba: Kuŵanaŵaniya Fundu za mu Bayibolu” (Nkhani ya pa webusayiti)

Wonani vo mungachita kuti mukondwengi ndi kuŵerenga Bayibolu.

“Kumbi Bayibolu Lingandiwovya Wuli?—Chigaŵa Chachiŵi: Vo Mungachita Kuti Mukondwengi Pakuŵerenga Bayibolu” (Nkhani ya pa webusayiti)

Wonani vo vawovyapu ŵanthu anyaki wo akwamba kali kuŵerenga Bayibolu.

Vo Mungachita Kuti Muyanduwengi Pakusambira Bayibolu Pakumwija (2:06)

4. Lutirizgani kukambiskana ndi Mubwezi winu

Kupemphera kweniso kusambira Bayibolu kwakuwovyani kuti muje pa ubwezi ndi Yehova. Kumbi vinthu viŵi venivi vingakuwovyani wuli kuti muje pa ubwezi wakukho ukongwa ndi iyu?

Ŵerengani Salimo 62:8, pavuli paki kambiskanani fumbu ili:

• Kuti muje pa ubwezi wakukho ndi Yehova, kumbi ndi vinthu wuli vo mungachita kuti mapempheru nginu ngajengi ngamampha?

Ŵerengani Salimo 1:2 ndi mazu ngamumphata, pavuli paki kambiskanani fumbu ili:

• Kuti muje pa ubwezi wakukho ndi Yehova, kumbi ndi vinthu wuli vo mungachita kuti muvwisengi vo muŵerenga mu Bayibolu?

Kumbi mungachita wuli kuti vo musambira mu Bayibolu vikuwovyeningi? Kuti muwoni vo mungachita, woneriyani VIDIYO, pavuli paki kambiskanani mafumbu ngo nge mumphata.

VIDIYO: Vo Mungachita Kuti Muyanduwengi Asani Musambira Bayibolu (5:22)

• Kumbi yimwi muwona kuti mungagwiriskiya ntchitu masachizgu nanga pa ngo ngakambika mu vidiyo?

• Nanga ndi nkhani nizi zo mungayanja kusambira?