Bayibolu likamba kuti umoyu waku taŵanthu “ngufupi ndipuso ngwakuzaza ndi masuzgu.” (Yobu 14:1) Kumbi Chiuta wakhumba kuti tijengi umoyu wenuwu? Asani ndi viyo cha, kumbi iyu wakhumbanji? Nanga vo wakhumba vifiskikengi nadi? Wonani mo Bayibolu limukiya umampha mafumbu ngenanga.

1. Kumbi Yehova wakhumba kuti tijengi umoyu wuli?

Yehova wakhumba kuti tijengi umoyu wamampha ukongwa. Wati walenga ŵanthu ŵaŵi akwamba, Adamu ndi Heva, wanguŵaŵika mumunda wa Edeni wo wenga paradayisu wakutowa ukongwa. Pavuli paki, “Chiuta wanguŵatumbika, ndipu wanguŵakambiya kuti: ‘Mubalani, muyandani, muzazi charu chapasi ndipu muchithereski.’” (Genezesi 1:28) Yehova wakhumbanga kuti yiwu abali ŵana, asinthi charu chosi kuti chije paradayisu ndipuso kuti aphweriyengi vinyama. Iyu wakhumbanga kuti ŵanthu wosi akondwengi ndi umoyu wamampha, wambula kutama ndipuso ajengi kwamuyaya.

Chinanga kuti khumbu laku Chiuta likufiskika cha,a kweni iyu wakusintha cha vo wakhumbanga kuchita. (Yesaya 46:10, 11) Iyu wakhumba mbwenu kuti ŵanthu akuvwiya azije kwamuyaya pacharu chapasi chambula masuzgu.—Ŵerengani Chivumbuzi 21:3, 4.

2. Kumbi tingachita wuli kuti tikondwengi ndi umoyu sonu?

Yehova wakutilenga kuti tilongozgekengi ndi iyu. Ndichu chifukwa chaki tikhumbisiska kumusopa kweniso kusambira vakukwaskana ndi iyu kuti timuziŵi. (Ŵerengani Mateyu 5:3-6) Iyu wakhumba kuti tije nayu pa ubwezi wakukho, ‘tiyendengi mu nthowa zaki zosi, timuyanjengi’ kweniso timuteŵetiyengi “ndi mtima [widu] wosi.” (Dotoronome 10:12; Salimo 25:14) Asani tichitengi venivi, tikondwengi ndi umoyu chinanga kuti tikumana ndi masuzgu. Kusopa Yehova kutitiwovya kuti tiwonengi kuti umoyu widu we ndi phindu chifukwa tichita vo iyu wakhumba.

3. Yehova wakhumba kuti ŵanthu akondwengi ndi umoyu

Woneriyani VIDIYO, pavuli paki kambiskanani fumbu ili:

VIDIYO: Kachigaŵa ka Vidiyo Yakuti Ntchifukwa Wuli Chiuta Wakulenga Charu Chapasi? (1:41)

• Ntchifukwa wuli Chiuta wakutilenge charu chakutowa ichi?

Ŵerengani Wakutawula 3:11, pavuli paki kambiskanani fumbu ili:

• Kumbi lemba lenili lititisambizanji vakukwaskana ndi Yehova?

4. Vo Yehova wakhumbanga vikusintha cha

Ŵerengani Salimo 37:11, 29 ndipuso Yesaya 55:11, pavuli paki kambiskanani fumbu ili:

• Kumbi tiziŵa wuli kuti vo Yehova wakhumbanga vikusintha cha?

5. Kusopa Yehova kutitiwovya kuti tikondwengi

VIDIYO: Ndinguziŵa Chifukwa cho Chiuta Wakutilenge (5:03)

• Kumbi kuziŵa chifukwa cho Chiuta wakutilenge kungumuwovya wuli Terumi?

Ŵerengani Wakutawula 12:13, pavuli paki kambiskanani fumbu ili:

• Kumbi tingalongo wuli kuti tiwonga chifukwa cha vinthu vinandi vo Yehova watichitiya?

KUMBI MWASAMBIRANJI?

Yehova wakhumba kuti ŵanthu azije kwamuyaya pacharu chapasi chambula masuzgu. Sonu napu tingakondwa ndi umoyu asani titimusopa ndi mtima widu wosi.

Kuweriyamu

• Kumbi pakwamba Yehova wakhumbanga kuti Adamu ndi Heva achitenji?

• Kumbi tiziŵa wuli kuti vo Chiuta wakhumbanga vikusintha cha?

• Kumbi mungachita wuli kuti mukondwengi ndi umoyu?

FUFUZANI

Wonani ukaboni wakuti munda wa Edeni wengaku nadi.

“Kumbi Munda wa Edeni Wengaku Nadi Pamwenga ndi Nthanu Waka?” (Chigongwi cha Alinda, January 1, 2011)

Wonani chifukwa cho tigomezge kuti charu chijengeku mpaka muyaya.

“Kumbi Charu Chimalengi?” (Nkhani ya pa webusayiti)

Wonani vo Bayibolu likamba kuti muchitengi kuti mukondwengi ndi umoyu.

“Kumbi Ntchifukwa Wuli te ndi Umoyu?” (Nkhani ya pa webusayiti)

Wonani mo munthu munyaki wangusaniriya vo wakhumbikanga pa umoyu chinanga kuti pakwamba wawonanga kuti we ndi chechosi.

Sonu Ndikondwa ndi Umoyu (3:55)

2. Mbayani wo alamuliya ndi Yesu?

Yesu walamuliya yija cha. Ŵanthu anyaki “akutuliya mu fuku lelosi, lilimi lelosi, [ndipuso] mtundu wewosi . . . azamulamuliya charu chapasi nge mafumu.” (Chivumbuzi 5:9, 10) Kumbi mbalinga wo amulamuliya ndi Khristu? Kutuliya po Yesu wanguziya pacharu chapasi, pe Akhristu mamiliyoni nganandi wo atimulondo. Kweni mbakhristu 144,000 pe wo amulamuliya limoza ndi Yesu kuchanya. (Ŵerengani Chivumbuzi 14:1-4.) Akhristu anyaki wosi azamuja zika za Ufumu wenuwu pacharu chapasi.—Salimo 37:29.

Ufumu waku Chiuta ukwamba kali kulamuliya. Pambula kuswera yapa usinthengi vinthu vikuluvikulu pacharu chapasi. Tiyeni tiwoni vinthu vinyaki vamampha vo tilindizga kuti Ufumu waku Chiuta wazamuchita.

1. Kumbi Ufumu waku Chiuta wazamuchita wuli kuti uweziyepu chimangu ndipuso urunji pacharu?

Pa nkhondu ya Aramagedoni, Yesu yo ndi Fumu ya Ufumu waku Chiuta wazamutuzgapu ŵanthu aheni pacharu kweniso maboma ngosi nga ŵanthu. (Chivumbuzi 16:14, 16) Pa nyengu yeniyo, uchimi uwu wa mu Bayibolu wazamufiskika: “Kwaja kanyengu kamanavi ndipu ŵanthu aheni azamuŵaku so cha.” (Salimo 37:10) Mwakugwiriskiya Ntchitu Ufumu, Yesu wazamuwonesesa kuti pacharu chosi pe chimangu ndipuso urunji.—Ŵerengani Yesaya 11:4.

2. Kumbi umoyu wazamukuŵa wuli asani khumbu laku Chiuta lazifiskika pacharu chapasi?

Asani Ufumu waku Chiuta waziyamba kulamuliya charu chosi, “ŵanthu arunji azamulonde charu chapasi, ndipu azamuja mwenimo kwamuyaya.” (Salimo 37:29) Yeruzgiyani kuti muja mucharu cho munthu weyosi ndi murunji, watanja Yehova ndipuso watanja anyaki! Palivi yo wazamutama ndipu weyosi wazamuja kwamuyaya.

3. Kumbi ndi vinthu wuli vo Ufumu waku Chiuta wazamuchita asani ŵanthu aheni wosi azibayika?

Asani ŵanthu aheni wosi azibayika, Yesu wazamulamuliya nge Fumu kwa vyaka 1,000. Pa nyengu iyi, iyu limoza ndi anyaki 144,000 wo walamuliya nawu azamuwovya ŵanthu pacharu chapasi kuti aje akufikapu kweniso ambula ubudi. Kukumaliya kwa vyaka 1,000 venivi, charu chapasi chazamuja paradayisu wakutowa ukongwa, ndipu pazamujanga ŵanthu akukondwa wo Yehova waŵatumbika chifukwa chakuvwiya marangu ngaki. Pavuli paki, Yesu wazamuweze Ufumu kwa Awisi a Yehova. Pa nyengu iyi, ‘zina laku Yehova lazamutowa’ ukongwa. (Mateyu 6:9, 10) Pazamuŵavi so kukayikiya kuti Yehova ndi Fumu yamampha ndipuso waphwere ŵanthu ŵaki. Pakumaliya, Yehova wazamubaya Satana ndi viŵanda vaki kweniso munthu weyosi yo wazamugarukiya ulamuliru Waki. (Chivumbuzi 20:7-10) Vinthu vosi vamampha vo Ufumu waku Chiuta wazamuchita pacharu chapasi vazamujaku kwamuyaya.

SAMBIRANI VINANDI

4. Ufumu waku Chiuta wazamutuzgapu maboma ngosi nga ŵanthu

“Munthu wapweteka munthu munyaki pakumulamuliya.” (Wakutawula 8:9) Mwakugwiriskiya ntchitu Ufumu waki, Yehova wazamutuzgapu vinthu vambula urunji venivi.

Ŵerengani Daniyeli 2:44 ndipuso 2 Atesalonika 1:6-8, pavuli paki kambiskanani mafumbu yanga:

• Kumbi Yehova ndi Mwana waki Yesu azamuchitanji nangu maboma nga ŵanthu limoza ndi ŵanthu ŵawu?

• Kumbi vo mwasambira vakukwaskana ndi Yehova ndipuso Yesu, vitikusimikiziyani wuli kuti yiwu azamuchita vinthu mwaurunji?

5. Yesu ngwakwenere nadi kuja Fumu

Nge Fumu ya Ufumu waku Chiuta, Yesu wazamuchita vinthu vinandi kuti wawovyi ŵanthu pacharu chapasi. Woneriyani VIDIYO kuti muwoni kuti Yesu wakhumbisiska kuwovya ŵanthu ndipuso kuti Chiuta wakumupaska nthazi zakuchitiya venivi.

VIDIYO: Yesu Wangulongo vo Ufumu Waku Chiuta Wazamuchita (1:13)

Vinthu vo Yesu wanguchita po wenga pacharu chapasi, vingulongo vo Ufumu wazamuchita. Kumbi ndi vitumbiku nivi pa vitumbiku ivi vo mukhumba kuziwona kuti vafiskika? Ŵerengani malemba ngo ngaŵikika kunthazi kwa vitumbiku venivi ngo ngatitiwovya kuziŵa vinandi.

6. Ufumu waku Chiuta wazamuchitiska kuti vinthu vizije umampha kunthazi

VIDIYO: Chithuzi cha Vinthu Vamampha vo Vichitikengi Kunthazi (4:38)

Ŵerengani Salimo 145:16, pavuli paki kambiskanani fumbu ili:

• Kumbi mutuvwa wuli kuziŵa kuti Yehova wazamupaska “chamoyu chechosi . . . vo chikhumba”?

KUMBI MWASAMBIRANJI?

Ufumu waku Chiuta wazamufiska vo iyu wakhumba kuti vichitiki. Ufumu uwu wazamusintha charu chosi kuti chije paradayisu yo pazamuja ŵanthu wo azamusopa Yehova kwamuyaya.

Kuweriyamu

• Kumbi Ufumu waku Chiuta wazakulitowesa wuli zina laku Yehova?

• Ntchifukwa wuli tigomezga kuti Ufumu waku Chiuta wazamufiska vinthu vamampha vo Bayibolu likamba kuti vichitikengi kunthazi?

• Kumbi ndi vinthu wuli vo Ufumu wazamuchita vo yimwi mukhumbisiska kuziwona?

FUFUZANI

Ziŵani vo mazu ngakuti Aramagedoni ngang’anamuwa.

“Kumbi Nkhondu ya Aramagedoni ndi Nkhondu Wuli?” (Nkhani ya pa webusayiti)

Wonani vo vazamuchitika mu ulamuliru waku Yesu wa vyaka 1,000 kweniso vo vazamuchitika kukumaliya kwa vyaka venivi.

“Kumbi ndi Vinthu Wuli vo Vazamuchitika pa Zuŵa la Cheruzgu?” (Chigongwi cha Alinda, September 1, 2012)

Wonani vo mabanja ngangachita pakuŵanaŵaniya vinthu vamampha vo Ufumu wazakutichitiya kunthazi.

Yeruzgiyani Kuti Mwe mu Paradayisu (1:50)

Ŵerengani nkhani yakuti “Ndenga ndi Mafumbu Nganandi Ukongwa,” kuti muwoni mo chigaŵenga chingumukikiya mafumbu ngaki.

“Bayibolu Lisintha Ŵanthu” (Chigongwi cha Alinda, January 1, 2012)