3. Kumbi Yehova wakhumba kuti tichitengenji kuti tije mabwezi ngaki?

Yehova watanja munthu weyosi, “kweni waja pa ubwezi wakukho ndi munthu wakunyoloka.” (Nthanthi 3:32) Yehova wakhumba kuti mabwezi ngaki ngayesesengi kuchita vinthu vamampha kweniso ngangachitanga cha vinthu viheni. Ŵanthu anyaki awona kuti angafiska cha kuchita vo Yehova wakhumba ndipuso kuleka kuchita vinthu viheni. Kweni Yehova ngwalisungu. Iyu walondere munthu weyosi yo watimuyanja nadi ndipu wayesesa kuchita vinthu vo vitimukondwesa.—Salimo 147:11; Machitidu 10:34, 35.

Munthu weyosi wakhumba kuti anyaki amuchitiyengi vinthu mwauneneska. Yehova nayu wakhumba kuti mabwezi ngaki nangu ngachitengi vinthu mwauneneska. Kweni kuchita venivi nkhupusu cha mucharu ichi, chifukwa ŵanthu anandi mbaryarya. Kumbi kuchita vinthu vosi mwauneneska nkhwakovya wuli?

1. Ntchifukwa wuli tikhumbika kuchita vinthu mwauneneska?

Asani titiŵachitiya vinthu mwauneneska ŵanthu, tilongo kuti titanja Yehova kweniso titimutumbika. Kumbukani kuti Yehova waziŵa chechosi cho tiŵanaŵana kweniso cho tichita. (Aheberi 4:13) Iyu wawona asani tasankha kuchita vinthu mwauneneska ndipu wakondwa. Mazu ngaki ngakamba kuti: “Yehova waseruka nayu munthu muryarya, kweni waja pa ubwezi wakukho ndi munthu wakunyoloka.”—Nthanthi 3:32.

2. Kumbi mphavakuchitika vinyaki nivi po tingakhumbika kuchita vinthu mwauneneska?

Yehova wakhumba kuti “weyosi wakambengi uneneska ku munyaki.” (Zekariya 8:16, 17) Venivi ving’anamuwa kuti tikhumbika cha kukamba vinthu vaboza asani tikambiskana ndi ŵanthu a mu banja lidu, wo tigwira nawu ntchitu, abali ndi azichi mumpingu pamwenga ŵanthu wo agwira ntchitu mumaofesi nga boma. Ŵanthu wo achita vinthu mwauneneska atiŵabiya cha anyawu pamwenga kuŵachitiya vinthu mwachinyengu. (Ŵerengani Nthanthi 24:28 ndipuso Aefeso 4:28.) Kweniso yiwu apereka misonkhu yosi yo akhumbika kupereka. (Aroma 13:5-7) Asani tiyesesa pa vinthu venivi kweniso pa vinthu vinyaki, ndikuti tichita nadi “vinthu vosi mwauneneska.”—Aheberi 13:18.

3. Kumbi kuchita vinthu mwauneneska nkhwakovya wuli?

Ŵanthu atitigomezga asani tichita vinthu mwauneneska. Titovya so kuti mumpingu tikoliyanengi nge banja limoza. Tija so ndi njuŵi yamampha. Kweniso asani tichita vinthu mwauneneska, ‘tingadyoŵesa [tingatowesa] chisambizu chaku Chiuta Mtaski widu,’ ndipu venivi vingakopa ŵanthu anyaki kuti nawu ayambi kumusopa mwauneneska.—Tito 2:10.

SAMBIRANI VINANDI

4. Yehova wakondwa asani tichita vinthu mwauneneska

Ŵerengani Salimo 44:21 ndipuso Malaki 3:16, pavuli paki kambiskanani mafumbu yanga:

• Ntchifukwa wuli muwona kuti nkhuŵavi zeru kuŵanaŵana kuti tingabisa uneneska chayiwu?

• Kumbi muwona kuti Yehova watuvwa wuli asani tasankha kukamba uneneska chinanga vingaŵa vakusuzga kuchita viyo?

5. Muchitengi vinthu mwauneneska nyengu zosi

VIDIYO: Vinthu vo Vingatiwovya Kuti Tikondwengi—Kuja ndi Njuŵi Yamampha (2:32)

Ŵerengani Aheberi 13:18, pavuli paki kambiskanani mo tingachitiya vinthu mwauneneska . . .

• mu banja.

• kuntchitu pamwenga kusukulu.

• pa vakuchitika vinyaki.

6. Kuchita vinthu mwauneneska kutitiwovya

Nyengu zinyaki tingakumana ndi masuzgu chifukwa chakuchita vinthu mwauneneska. Kweni asani pajumpha nyengu ndipu tiwona kuti mbumampha kuchita vinthu mwauneneska. Ŵerengani Salimo 34:12-16, pavuli paki kambiskanani fumbu ili:

• Kumbi kuchita vinthu mwauneneska kungakuwovyani wuli pa umoyu winu?

1. Anthulumi kweniso anthukazi akutorana wo achita vinthu mwauneneska, nthengwa yawu yija yakukho

2. Mabwana ngatiŵagomezga antchitu ŵawu wo achita vinthu mwauneneska

3. Ŵanthu wo agwira ntchitu zaboma, atiŵagomezga ŵanthu wo achita vinthu mwauneneska

KUMBI MWASAMBIRANJI?

Yehova wakhumba kuti mabwezi ngaki ngakambengi uneneska kweniso ngachitengi vinthu mwauneneska.

Kuweriyamu

• Kumbi mphavakuchitika vinyaki nivi po tingakhumbika kuchita vinthu mwauneneska?

• Ntchifukwa wuli nkhuŵavi zeru kuŵanaŵana kuti tingabisa uneneska chayiwu?

• Ntchifukwa wuli mukhumbika kuchita vinthu mwauneneska nyengu zosi?

FUFUZANI

Kumbi apapi angasambiza wuli ŵana ŵawu kuti akambengi uneneska?

Mukambengi Uneneska (1:44)

Ntchifukwa wuli tikhumbika kufiska vo talayizga?

Mufiskengi vo Mwalayizga Kuti Mutumbikiki (9:09)

Kumbi tikhumbika kupereka mbwenu msonkhu chinanga kuti ndalama zo tapereka angazigwiriskiya ntchitu mwambula kwenere?

“Kumbi Titenere Nadi Kupereka Msonkhu?” (Chigongwi cha Alinda, September 1, 2011)

Ntchinthu wuli cho chinguchitiska munthu munyaki muryarya kuti wasinthi ndi kwamba kuchita vinthu mwauneneska?

“Ndingusambira Kuti Yehova Ngwalisungu Kweniso Wagowoka” (Nkhani ya mu Chigongwi cha Alinda)

2. Kumbi Yehova wavwengi wuli ndi mabwezi ngo musankhengi?

Yehova wasankha mabwezi mwakuphwere ukongwa. Iyu “waja pa ubwezi wakukho ndi munthu wakunyoloka.” (Nthanthi 3:32) Kumbi muwona kuti Yehova wangavwa wuli asani tingasankha mabwezi ngo ngaleka kumuyanja? Iyu wangaguŵa ukongwa! (Ŵerengani Yakobe 4:4.) Kweni Yehova wangakondwa ukongwa kweniso wangaja nasi pa ubwezi asani tisankha kuja pa ubwezi ndi ŵanthu wo atimuyanja, ndipuso asani tikana kukolana ubwezi ndi ŵanthu a mijalidu yiheni.—Salimo 15:1-4.