Kusambira Bayibolu kuyanana waka ndi ulendu utali wakukhumbika ukongwa. Munthu yo wasambira Bayibolu wangakumana ndi masuzgu nganandi ngo wakhumbika kumalana nangu. Chifukwa cha venivi, mungaŵanaŵana kuti muleki waka kusambira Bayibolu. Kweni ntchifukwa wuli mukhumbika kuŵikiyapu mtima kuti mulutirizgi kusambira Bayibolu? Nanga ntchinthu wuli chingakuwovyani kuti mumalani ndi masuzgu ngo mungakumana nangu?

1. Ntchifukwa wuli mukhumbika kusambira Bayibolu?

“Mazu ngaku Chiuta ngamoyu ndipuso nganthazi.” (Aheberi 4:12) Mukhumbika kusambira Bayibolu chifukwa livumbuwa kuti Chiuta watikuŵanaŵaniyani ndipuso watikuyanjani. Lingakuwovyani kuti muziŵengi vinthu, musaniyi zeru chayizu ndipuso kuti mulindizengi vinthu vamampha vo vichitikengi kunthazi. Kweniso chakukhumbika ukongwa ntchakuti Bayibolu lingakuwovyani kuti muje pa ubwezi ndi Yehova. Asani musambira Bayibolu, ndikuti muzomereza kuti nthazi yaki yikusintheni.

2. Ntchifukwa wuli mukhumbika kuwona kuti uneneska wa mu Bayibolu ngwakuzirwa?

Uneneska wa mu Bayibolu wenge chuma chakuzirwa. Ndichu chifukwa chaki Bayibolu likamba kuti “gula uneneska ndipu ungawugulisanga cha.” (Nthanthi 23:23) Asani mukumbuka kuti uneneska wa mu Bayibolu ngwakuzirwa, mulekengi cha kusambira chinanga mungakumana ndi masuzgu wuli.—Ŵerengani Nthanthi 2:4, 5.

3. Kumbi Yehova wangakuwovyani wuli kuti mulutirizgi kusambira?

Pakuti Yehova ndiyu Mlengi winu wanthazizosi ndipuso Bwezi linu, wangakuwovyani kuti musambiri vakukwaskana ndi iyu. Iyu wangakupaskani “vosi viŵi, khumbu kweniso nthazi zakuchitiya.” (Ŵerengani Afilipi 2:13.) Mwaviyo, asani nyengu zinyaki mugongowa kusambira pamwenga kugwiriskiya ntchitu vo musambira, iyu wangakuwovyani. Iyu wangakupaskani so nthazi zapade kuti mumalani ndi masuzgu kweniso ŵanthu wo atikususkani. Nyengu zosi mupemphengi Yehova kuti wakuwovyeni kuti mulutirizgi kusambira Bayibolu.—1 Atesalonika 5:17.

SAMBIRANI VINANDI

4. Muwonengi kuti kusambira Bayibolu nkhwakukhumbika ukongwa

Nyengu zinyaki mutangwanika ukongwa ndipu muwona kuti mulivi nyengu yakusambiriya Bayibolu. Sonu kumbi mungachita wuli? Ŵerengani Afilipi 1:10, pavuli paki kambiskanani mafumbu yanga:

• Kumbi yimwi muwona kuti “vinthu vakukhumbika ukongwa” ndi nivi pa umoyu?

• Kumbi mungachita wuli kuti musaniyengi nyengu yakusambiriya Bayibolu?

1. Asani mungayamba kuŵikamu mchenga muchithini, mya yingakwanamu cha

2. Kweni asani mungayamba kuŵikamu mya, mchenga ungasere unandi ukongwa. Mwakuyanana waka, asani mungayamba dankha kuchita “vinthu vakukhumbika ukongwa,” mungaja mbwenu ndi nyengu yakuchitiya vinthu vinyaki.

Kusambira Bayibolu kutitiwovya kuti timuziŵi umampha Chiuta kweniso kuti timusopengi. Ŵerengani Mateyu 5:3, pavuli paki kambiskanani fumbu ili:

• Kumbi kupatuwa nyengu yakusambiriya Bayibolu kungatiwovya wuli?

5. Mungalekanga cha kusambira chinanga ŵanthu angakususkani

VIDIYO: Wangusaniya Mphotu Chifukwa cha Kukunthiyapu (5:22)

• Nge po tawone mu vidiyo, kumbi anyaki aku Francesco ndipuso anyina anguchita wuli wati waŵakambiya vo wasambiranga?

• Kumbi kukunthiyapu kungumuwovya wuli?

Ŵerengani 2 Timote 2:24, 25, pavuli paki kambiskanani mafumbu yanga:

• Kumbi abali ŵinu ndipuso anyinu akambanji asani atikuwonani kuti musambira Bayibolu?

• Mwakukoliyana ndi lemba lo taŵerenga, kumbi yimwi mungamumuka wuli munthu yo wakondwa cha kuti musambira Bayibolu? Ntchifukwa wuli mwamuka viyo?

6. Muthembengi Yehova

VIDIYO: Yehova Watitiwovya Kuti Tisinthi (3:56)

• Nge mo tawone mu vidiyo, kumbi ndi vinthu wuli vo Jim wanguleka kuti wakondwesengi Yehova?

• Kumbi ntchinthu wuli cho chakukondwesani ndi mo wangusinthiya vinthu pa umoyu waki?

Ŵerengani Aheberi 11:6, pavuli paki kambiskanani mafumbu yanga:

• Kumbi Yehova wachitengi nawu wuli ŵanthu “wo atimupenja ndi mtima wosi,” kung’anamuwa wo ayesesa kuti amuziŵi kweniso kuti amukondwesi?

• Kumbi venivi vilongo kuti Yehova watuvwa wuli asani wawona kuti muchita vosi vo mungafiska kuti musambiri Bayibolu?

KUMBI MWASAMBIRANJI?

Chinanga kuti kusambira Bayibolu nkhupusu cha, kweni kungakuwovyani kuti mukondwi ndi umoyu kwamuyaya. Lutirizgani kuthemba Yehova ndipu iyu wakuwovyeningi.

Kuweriyamu

• Ntchifukwa wuli muwona kuti uneneska wa mu Bayibolu ndi chuma chakuzirwa ukongwa?

• Kumbi mungachita wuli kuti muchitengi dankha “vinthu vakukhumbika ukongwa”?

• Ntchifukwa wuli mukhumbika kupempha Yehova kuti mulutirizgi kusambira Bayibolu?

FUFUZANI

Wonani vinthu vinayi vo vawovyapu ŵanthu anyaki kuti agwiriskiyengi ntchitu nyengu yawu mwazeru.

“Kumbi Mungachita Wuli Kuti Muyigwiriskiyengi Ntchitu Umampha Nyengu Yinu?” (Jani Masu!, February 2014)

Wonani mo Yehova wanguwovye munthukazi munyaki yo mulumu waki wamugongowesanga kuti waleki kuteŵete Yehova.

Yehova Watitipaska Nthazi Kuti Tinyamuwi Katundu Widu (5:05)

Wonani mo munthu munyaki wangusinthiya chifukwa cha kukunthiyapu kwa muwolu waki.

Ndakhumbanga Kuziŵa Dankha Asani Mbuneneska Nadi (6:30)

Nyengu zinyaki ŵanthu akamba kuti Akaboni aku Yehova amalisa mabanja. Kumbi venivi vauneneska nadi?

“Kumbi Akaboni aku Yehova Achitiska Kuti Mabanja nga Ŵanthu Ngamali Pamwenga Ngaje Ngakukho?” (Nkhani ya pa webusayiti)

Munthu weyosi wakhumbika kusankha vakuchita. Vinthu vinandi vo tingasankha, vingakwaska umoyu widu ndipuso ubwezi widu ndi Yehova. Mwakuyeruzgiyapu, tingakhumbika kusankha ko tingachija, ntchitu yo tingagwira kweniso nkhani yakuto pamwenga kuyirwa. Asani tisankha umampha vinthu, tingaja mwakukondwa kweniso tingakondwesa Yehova.

1. Kumbi Bayibolu lingakuwovyani wuli kuti musankhengi umampha vakuchita?

Mwechendasankhi vakuchita, mupempherengi dankha kwaku Yehova kuti wakuwovyeni. Kweniso muŵerengengi Bayibolu kuti muziŵi mo iyu watiyiwone nkhani yo. (Ŵerengani Nthanthi 2:3-6.) Yehova wapereka marangu ngachindunji pa nkhani zinyaki. Asani veviyo, vija umampha ukongwa kuvwiya dangu lenilo.

Kweni wuli asani mu Bayibolu mulivi dangu lelosi lachindunji pa nkhani yo mukhumba kusankha vakuchita? Yehova wangakulongozgani mbwenu ‘munthowa yo mutenere kwendamu.’ (Yesaya 48:17) Kumbi iyu wangakulongozgani wuli? Nyengu zinyaki pangaŵa fundu zinyaki zo zingakulongozgani. Fundu za mu Bayibolu zauneneska ndipu zititiwovya kuziŵa maŵanaŵanu ngaku Chiuta ndipuso mo wavwiya. Kuŵerenga nkhani zinyaki za mu Bayibolu, kutitiwovya kuziŵa mo Chiuta wavwiya pa nkhani zakupambanapambana. Asani taziŵa mo Yehova wavwiya, tingasankha kuchita vinthu vo vingamukondwesa.

2. Kumbi ndi vinthu wuli vo mutenere kuŵanaŵaniya mwechendasankhi vakuchita?

Bayibolu likamba kuti: “Munthu wakuchenje waŵanaŵaniya mo watende.” (Nthanthi 14:15) Ivi vilongo kuti mukhumbika kuŵanaŵaniyapu dankha mwechendasankhi vakuchita. Muchiŵanaŵaniya vinthu vo mukhumba kusankha, mujifumbengi kuti: ‘Kumbi ndi fundu nizi za mu Bayibolu zo zingagwira ntchitu pa nkhani iyi? Kumbi ndingasankha nichi pa vinthu ivi kuti ndije ndi chimangu chamumtima? Kumbi vo ndisankhengi yapa viŵakwaskengi wuli ŵanthu anyaki? Kweniso kuluska vosi, kumbi vo ndisankhengi vimukondwesengi Yehova?’—Dotoronome 32:29.

Yehova we ndi wanangwa wosi wakutikambiya cho ntchamampha ndipuso cho ntchiheni. Titamba kuja ndi njuŵi yamampha asani titingavwisa umampha marangu ngaki kweniso fundu zaki ndi kuzilondo ndi mtima wosi. Njuŵi yidu ndiyu yititiwovya kuziŵa cho ntchamampha ndipuso cho ntchiheni. (Aroma 2:14, 15) Mwaviyo, njuŵi yakusambizika umampha yingatiwovya kuti tisankhengi vinthu mwazeru.

SAMBIRANI VINANDI

3. Mugwiriskiyengi ntchitu fundu za mu Bayibolu

VIDIYO: Mugwiriskiyengi Ntchitu Fundu za mu Bayibolu Pakusankha Vakuchita (5:54)

• Kumbi wanangwa wakusankha vakuchita ung’anamuwanji?

• Ntchifukwa wuli Yehova wakutipaska wanangwa wakusankha vakuchita?

• Kumbi ndi vinthu wuli vo iyu watipaska vo vingatiwovya kuti tigwiriskiyengi ntchitu umampha wanangwa widu wakusankha vakuchita?

Kuti muwoni chakuwoniyapu cha mo tingagwiriskiya ntchitu fundu za mu Bayibolu, ŵerengani Aefeso 5:15, 16. Pavuli paki kambiskanani vo mungachita kuti ‘nyengu yinu muyigwiriskiyengi ntchitu mwakwenere’ kuti . . .

• musaniyengi mpata wakuŵerenge Bayibolu nyengu zosi.

• muje munthulumi wamampha, munthukazi wamampha, mpapi wamampha pamwenga mwana wamampha mubanja.

• musanirikengi pa maunganu nga mpingu.

4. Sambizani njuŵi yinu kuti musankhengi umampha vakuchita

VIDIYO: “Lutirizgani Kuja ndi Njuŵi Yamampha” (5:13)

• Nge mo tawone mu vidiyo, kumbi mzichi wanguchita wuli kuti wasambizi njuŵi yaki kuti wasankhi vinthu vo vingakondwesa Yehova?

Ntchifukwa wuli tikhumbika cha kupempha ŵanthu anyaki kuti ndiwu atisankhiyi vakuchita mumalu mwakusankha tija? Ŵerengani Aheberi 5:14, pavuli paki kambiskanani mafumbu yanga:

• Chinanga kuti vingawoneka vambula kusuzga kupempha ŵanthu anyaki kuti atisankhiyi vakuchita, kumbi ndi vinthu wuli vo titenere kupambanisa mbwenu?

• Kumbi ndi vinthu wuli vo vingakuwovyani kuti musambizengi njuŵi yinu ndipuso kuti musankhengi umampha vakuchita?

5. Mutumbikengi njuŵi ya anyinu

Taŵanthu tipambana vakusankha. Kweni tingalongo wuli kuti titumbika njuŵi ya anyidu? Wonani vakuyeruzgiyapu ivi:

Chakuchitika 1: Mzichi yo watanja kuphoda wasamiya ku mpingu wo azichi a kweniko akondwa navu cha.

Ŵerengani Aroma 15:1 ndipuso 1 Akorinto 10:23, 24, pavuli paki kambiskanani mafumbu yanga:

• Mwakukoliyana ndi malemba yanga, kumbi mzichi uyu wangasankha kuchitanji? Kumbi yimwi mungachita wuli asani mwe ndi munthu yo njuŵi yaki yitimukaniza kuchita vo njuŵi yinu yitikuzomerezani kuchita?

Chakuchitika 2: Mubali waziŵa kuti Bayibolu likaniza cha kumwapu moŵa, kweni wakusankha kuti wamwengi cha moŵa. Iyu wadanika kuti akachezi kumalu nganyaki ndipu kwenuku wachisaniya kuti abali atumwa moŵa.

Ŵerengani Wakutawula 7:16 ndipuso Aroma 14:1, 10, pavuli paki kambiskanani mafumbu yanga:

• Mwakukoliyana ndi malemba yanga, kumbi mubali uyu wangasankha kuchitanji? Kumbi yimwi mungachita wuli asani mwawona mubali wachita vinthu vo njuŵi yinu yitikukanizgani?

Kumbi mungachita wuli kuti musankhengi umampha vakuchita?

1. Mupemphengi Yehova kuti wakuwovyeningi kusankha vakuchita.—Yakobe 1:5.

2. Mufufuzengi mu Bayibolu ndipuso mumabuku ngo ngakonkhoska Bayibolu kuti musaniyi fundu zo zingakuwovyani. Mungafumbaku so Akhristu anyaki wo aziŵa vinandi.

3. Muŵanaŵaniyengi njuŵi yinu kweniso ya ŵanthu anyaki pa vo mungasankha.

KUMBI MWASAMBIRANJI?

Tingasankha umampha vakuchita asani tifufuza dankha mo Yehova watiyiwone nkhani yo ndipuso mo vikwaskiyengi ŵanthu anyaki.

Kuweriyamu

• Kumbi mungachita wuli kuti musankhengi vinthu vo vingakondwesa Yehova?

• Kumbi mungayisambiza wuli njuŵi yinu?

• Kumbi mungachita wuli kuti mutumbikengi njuŵi za ŵanthu anyaki?

FUFUZANI

Kumbi mungachita wuli kuti musankhengi vinthu mwazeru kuti muje pa ubwezi wakukho ndi Chiuta?

“Musankhengi Vakuchita vo Vingatumbika Chiuta” (Chigongwi cha Alinda, April 15, 2011)

Wonani mo Yehova watitipaskiya ulongozgi.

Yehova Walongozga Ŵanthu Waki (9:50)

Wonani vo vinguwovya munthu munyaki kuti wasankhi umampha vakuchita pa nkhani yakusuzga ukongwa.

Yehova Watitikolezesa Mwa Cha (5:46)

Wonani mo mungakondwese Yehova asani palivi dangu lachindunji pa nkhani yo mukhumbika kusankha chakuchita.

“Kumbi Mukhumba Kuti Pajengi Dangu la mu Bayibolu Pe Nyengu Zosi?” (Chigongwi cha Alinda, December 1, 2003)