Musankhengi Umampha Mabwezi

Mabwezi ngatitiwovya kuti tikondwengi ndi umoyu, kweniso ngatitichiska asani takumana ndi masuzgu. Kweni Bayibolu litititcheŵeska kuti ndi weyosi cha yo wangaja bwezi lamampha. Sonu kumbi mungachita wuli kuti musankhengi umampha mabwezi? Ŵanaŵaniyani mafumbu yanga.

1. Kumbi mabwezi ngo musankhengi ngakuwovyeningi kuja ndi mijalidu yamampha pamwenga yiheni?

Kanandi titole mijalidu ya ŵanthu wo ticheza nawu. Tingatole mijalidu yamampha pamwenga yiheni ku ŵanthu ŵenaŵa, ndipu venivi vingachitika asani ticheza nawu masu ndi masu pamwenga pavipangizu va mazuŵa nganu. Bayibolu likamba kuti, “Munthu yo watenda ndi ŵanthu azeru wajengi wazeru, kweni yo wachitiya limoza vinthu ndi ŵanthu akupusa [pamwenga kuti wo aleka kwanja Yehova] wapwetekekengi.” (Nthanthi 13:20) Asani mwasankha mabwezi ngo ngatanja ndipuso ngasopa Yehova, ngangakuwovyani kuti muje pa ubwezi wakukho ndi iyu kweniso kuti musankhengi umampha vinthu. Kweni asani mwasankha mabwezi ngo ngaleka kwanja Yehova, ngangakuchitiskani kuti muleki kuja pa ubwezi ndi iyu. Ndichu chifukwa chaki Bayibolu lititichiska kuti tisankhengi umampha mabwezi! Asani tasankha mabwezi ngo ngatanja Chiuta, tosi tiwovyana chifukwa tilutirizga “kuchiskana ndi kuzengana.”—1 Atesalonika 5:11.

2. Kumbi Yehova wavwengi wuli ndi mabwezi ngo musankhengi?

Yehova wasankha mabwezi mwakuphwere ukongwa. Iyu “waja pa ubwezi wakukho ndi munthu wakunyoloka.” (Nthanthi 3:32) Kumbi muwona kuti Yehova wangavwa wuli asani tingasankha mabwezi ngo ngaleka kumuyanja? Iyu wangaguŵa ukongwa! (Ŵerengani Yakobe 4:4.) Kweni Yehova wangakondwa ukongwa kweniso wangaja nasi pa ubwezi asani tisankha kuja pa ubwezi ndi ŵanthu wo atimuyanja, ndipuso asani tikana kukolana ubwezi ndi ŵanthu a mijalidu yiheni.—Salimo 15:1-4.

SAMBIRANI VINANDI

3. Musankhengi mabwezi ngamampha

Mungayanjananga cha ndi ŵanthu wo aleka kwanja Chiuta kweniso fundu zaki. Woneriyani VIDIYO, pavuli paki kambiskanani fumbu lo le mumphata.

VIDIYO: Lekani Kucheza ndi Ŵanthu a Mijalidu Yiheni (6:17)

• Kumbi tingayamba wuli kucheza ndi ŵanthu a mijalidu yiheni kwambula kuziŵa?

Ŵerengani 1 Akorinto 15:33, pavuli paki kambiskanani mafumbu yanga:

• Kumbi mbanthu naŵa wo muwona kuti angaja mabwezi ngaheni? Ntchifukwa wuli muwona viyo?

Ŵerengani Salimo 119:63, pavuli paki kambiskanani fumbu ili:

• Kumbi ntchinthu wuli cho chingakuwovyani kuziŵa asani munthu yo waŵengi bwezi lamampha?

4. Ŵanthu wo tipambana nawu msinkhu kweniso vinthu vinyaki, nawu angaŵa mabwezi ngamampha

Mu Bayibolu musanirika nkhani ya Ayisirayeli ŵaŵi wo ŵenga pa ubwezi, Davidi ndi Yonatani. Yiwu apambananga msinkhu ndipuso Yonatani wenga mwana wa fumu, kweni ayanjananga ukongwa. Ŵerengani 1 Samuyeli 18:1, pavuli paki kambiskanani fumbu ili:

• Ntchifukwa wuli tikhumbika cha kuyanjana ndi ŵanthu akukhupuka pe, akavu pamwenga wo tiyanana nawu msinkhu?

Ŵerengani Aroma 1:11, 12, pavuli paki kambiskanani fumbu ili:

• Kumbi mabwezi ngo ngatanja Yehova ngangachiskana wuli?

Mu vidiyo iyi, wonani mo mubali wachinyamata wangusaniriya bwezi lo wapambananga nalu msinkhu. Woneriyani VIDIYO, pavuli paki kambiskanani mafumbu ngo nge mumphata.

VIDIYO: Weyosi Wakhoza Kuja Mubwezi Winu (5:06)

• Nge po tawone mu vidiyo, ntchifukwa wuli apapi aku Akil afipanga mtima ndi mabwezi ngaki nga kusukulu?

• Ntchifukwa wuli pakwamba iyu wawonanga kuti mabwezi ngenanga ngamampha?

• Kumbi iyu wanguchita wuli kuti wasaniyi bwezi lamampha?

5. Vo mungachita kuti muje ndi mabwezi ngamampha

VIDIYO: Kumbi Bwezi Lamampha Tingaliziŵa Wuli? (4:14)

Ŵerengani Nthanthi 18:24 ndipuso 27:17, pavuli paki kambiskanani mafumbu yanga:

• Kumbi mabwezi ngamampha ngawovyana wuli?

• Kumbi yimwi muwona kuti mwe ndi mabwezi ngamampha? Asani mulivi, kumbi mungachita wuli kuti muje ndi mabwezi ngamampha?

Ŵerengani Afilipi 2:4, pavuli paki kambiskanani fumbu ili:

• Asani mukhumba kuja ndi mabwezi ngamampha, namwi mukhumbika kuja bwezi lamampha. Kumbi mungachita wuli venivi?

KUMBI MWASAMBIRANJI?

Asani tisankha mabwezi mwazeru, tikondwesa Yehova kweniso vinthu vititiyende umampha.

Kuweriyamu

• Ntchifukwa wuli Yehova wakwaskika ndi mabwezi ngo tisankha?

• Kumbi mbanthu amtundu wuli wo tikhumbika cha kuja nawu pa ubwezi?

• Kumbi mungachita wuli kuti muje pa ubwezi wakukho ndi ŵanthu akwenere?

FUFUZANI

Wonani mo mabwezi ngamampha ngangatiwovye pa nyengu yo takumana ndi mayeseru.

“Saniyani Mabwezi Ngapamtima Umaliru Wechendazi” (Chigongwi cha Alinda, November 2019)

Wonani vo mungachita kuti musaniyi mabwezi ngamampha.

“Kumbi Ndingachita Wuli Kuti Ndisaniyi Mabwezi Ngamampha?” (Kwamuka kwa Mafumbu ngo Achinyamata Afumba, Buku Lakwamba, mutu 8)

Vo mukhumbika kuziŵa pa nkhani ya mabwezi nga pa intaneti.

Malu Ngakucheziyapu nga pa Intaneti (4:12)

Mu nkhani yakuti, “Ndakhumbisiskanga Kusaniya Ada,” wonani vo vinguchitiska munthu munyaki kuti wawoni so umampha mabwezi ngo wenga nangu.

“Bayibolu Lisintha Ŵanthu” (Chigongwi cha Alinda, April 1, 2012)

1. Kumbi ndi vinthu wuli vo tikhumbika kuŵanaŵaniya asani tisankha vakukondwesa vo tingachita?

Kumbi ndi vinthu wuli vo mutanja kuchita asani mupumuwa? Anyaki asankha kuja pamalu ngambula viwawa panyumba kuti aŵerengengi mabuku, avwisiyengi sumu, awoneriyengi mavidiyo pamwenga kufufuza vinthu pa intaneti. Penipo anyaki atanja kuchita vinthu vinyaki ndi anyawu nge kuluta kumalu nganyaki, kuchisambira kunyanja pamwenga kuchita masaza nganyaki. Kaya titanja kuchitanji, kweni tikhumbika kuwonesesa kuti tisankha vakukondwesa ‘vakuzomerezeka kwa Ambuya.’ (Aefeso 5:10) Tikhumbika kuyivwisa ukongwa fundu yeniyi chifukwa vakukondwesa vinandi vo ŵanthu atanja mazuŵa nganu, vilongo vinthu vo Yehova watinkha nge viwawa, jalidu la ureŵi ndipuso kugomezga mizimu. (Ŵerengani Salimo 11:5.) Kumbi ndi vinthu wuli vingatiwovya kuti tisankhengi vakukondwesa mwazeru?

Asani tisankha mabwezi ngo ngatanja Yehova, ngangatiwovya kuti tije ndi mijalidu yamampha kweniso kuti tisankhengi umampha vakukondwesa. Nge mo tikusambiriya mu Sambiru 48, “munthu yo watenda ndi ŵanthu azeru wajengi wazeru.” Kweni asani titanjana ndi ŵanthu wo aleka kwanja fundu zaku Chiuta, ‘tipwetekekengi.’—Nthanthi 13:20.