Vo Akuŵerenga Afumba

Kumbi asilikali wo alondanga panyumba yakusopiyamu ŵenga ayani? Kumbi agwiranga ntchitu wuli?

Ntchitu zinyaki zo Alevi wo ŵenga asembi cha agwiranga, zingayanana waka ndi zo apolisi agwira. Yiwu alongozgekanga ndi kapitawu wa nyumba yakusopiyamu. Wakulemba mbiri munyaki wa Chiyuda zina laki Philo, wangukonkhoska ntchitu zinyaki zo asilikali ŵenaŵa agwiranga. Iyu wanguti: “[Alevi] anyaki ajanga pakhomu nge alonda a pageti, anyaki ajanga kumasu kwa malu ngakupaturika kuti munthu weyosi wambula kuzomerezeka waleki kuselemu, kwali mwangozi pamwenga mwakuchita kukhumba. Anyaki azunguliyanga nyumba yakusopiyamu ndipu asinthananga msana ndi usiku wewosi.”

Mphara Yikulu ya Milandu ndiyu yalamuliyanga asilikali ŵenaŵa. Ayuda ŵenaŵa pe ndiwu boma la Aroma laŵazomerezanga kuja ndi vidya vankhondu.

Kaswiri munyaki yo waziŵa vakukwaskana ndi Bayibolu, zina laki Joachim Jeremias wangukamba kuti pa nyengu yo asilikali amumanganga, Yesu wanguŵafumba chifukwa cho alekiyanga kumumanga pa nyengu yo wasambizanga munyumba yakusopiyamu. (Mate. 26:55) Fumbu ili latingi livwikengi cha asani asilikali wo anguza kuzimumanga ŵenga asilikali a panyumba yakusopimu cha. Joachim wagomezga kuti ŵenga asilikali ŵenaŵa wo angutumika kuti akako Yesu pa ulendu wakwamba. (Yoha. 7:32, 45, 46) Pavuli paki, Mphara Yikulu ya Milandu yingutuma kapitawu wa nyumba yakusopiyamu ndi asilikali anyaki kuti akako akutumika aku Yesu ndi kuza nawu kwaku yiwu. Ndipu viwoneka kuti asilikali ŵenaŵa nawu ŵengapu pa nyengu yo wakutumika Paulo angumukwekwete kubwalu kwa nyumba yakusopiyamu.​—Machi. 4:1-3; 5:17-27; 21:27-30.