Pambula kuswera yapa, Yehova wagwiriskiyengi ntchitu Ufumu waki kuti watuzgepu masuzgu ngosi ngo tikumana nangu. Uthenga wenuwu ngwamampha ukongwa ndipu munthu weyosi wakhumbika kuti wawuvwi. Yesu wakhumbanga kuti akusambira ŵaki apharazgiyengi munthu weyosi uthenga wenuwu. (Mateyu 28:19, 20) Kumbi Akaboni aku Yehova achita wuli kuti alondongi dangu lo Yesu wangukamba?

1. Kumbi lemba la Mateyu 24:14 lifiskika wuli mazuŵa nganu?

Yesu wangukamba kuti: “Uthenga wamampha uwu wa Ufumu, wazamupharazgika pacharu chosi chapasi.” (Mateyu 24:14) Akaboni aku Yehova akondwa kugwira ntchitu yakukhumbika ukongwa yeniyi. Tipharazga uthenga wamampha wenuwu muvineneru vakujumpha 1,000 pacharu chosi! Ntchitu iyi njikulu ndipu yikhumbika kugwirika mwaphamphu kweniso mwandondomeku. Yehova ndiyu watitiwovya pa ntchitu yeniyi.

2. Kumbi tichita wuli kuti tipharazgiyengi ŵanthu anandi?

Tipharazga kwekosi ko tingasaniya ŵanthu. Nge mo achitiyanga Akhristu a munyengu ya akutumika, nasi tipharazga “kunyumba ndi nyumba.” (Machitidu 5:42) Nthowa yeniyi njamampha ukongwa chifukwa yititiwovya kuti tipharazgiyengi ŵanthu mamiliyoni nganandi chaka chechosi. Tipharazga so mumalu mo musanirika ŵanthu anandi chifukwa chakuti ŵanthu asanirika nyengu zosi cha panyumba. Nyengu zosi tiyesesa kusaniya mpata kuti tikambiyeku anyidu vakukwaskana ndi Yehova ndipuso vo wakhumba.

3. Kumbi ndiyani yo we ndi udindu wakupharazga uthenga wamampha?

Mkhristu weyosi wauneneska wakhumbika kupharazga uthenga wamampha ku ŵanthu wosi. Ntchitu iyi titiyiwona mwakupepuka cha. Tichita vosi vo tingafiska pa ntchitu iyi chifukwa tiziŵa kuti umoyu wa ŵanthu anandi we pangozi. (Ŵerengani 1 Timote 4:16.) Tigwira ntchitu yeniyi kwambula kulipirika chifukwa Bayibolu likamba kuti: “Mukupaskika kwawezi, perekani kwawezi.” (Mateyu 10:7, 8) Ndi weyosi cha yo wavwisiya uthenga widu. Kweni tilutirizga mbwenu kupharazga chifukwa tilongo kuti tivwiya Yehova kweniso kuti tikhumba kumukondwesa.

SAMBIRANI VINANDI

4. Tiyesesa kuti tipharazgiyi ŵanthu wosi

VIDIYO: Kupharazga Mpaka “Kukumaliya kwa Charu Chapasi” (7:33)

• Ntchinthu wuli chitikukondwesani ukongwa ndi mo Akaboni aku Yehova ayesese pa ntchitu yakupharazga?

Ŵerengani Mateyu 22:39 ndipuso Aroma 10:13-15, pavuli paki kambiskanani mafumbu yanga:

• Kumbi ntchitu yidu yakupharazga yilongo wuli kuti titanja anyidu?

• Kumbi Yehova watiŵawona wuli ŵanthu wo apharazga uthenga wamampha?—Wonani vesi 15.

5. Tigwira ntchitu limoza ndi Chiuta

Pe vakuchitika vinandi vo vilongo kuti Yehova ndiyu walongozga ntchitu yidu. Mwakuyeruzgiyapu, ku New Zealand, mubali munyaki zina laki Paul wachipharazga kunyumba ndi nyumba ndi msana,wangukumana ndi munthukazi munyaki. Ndi mlenji pa zuŵa lenili, munthukazi mwenuyu wangupemphera kwaku Chiuta mwakugwiriskiya ntchitu zina laku Chiuta lakuti Yehova. Iyu wangumupempha kuti mphanyi munthu munyaki wangumuyende. Paul wangukamba kuti: “Ndingufika panyumba ya munthukazi mwenuyu pati pajumpha waka maora ngatatu kutuliya po wangupemphere.”

Ŵerengani 1 Akorinto 3:9, pavuli paki kambiskanani fumbu ili:

• Kumbi vakuchitika vinyaki nge cho chinguchitika ku New Zealand, vilongo wuli kuti Yehova ndiyu walongozga ntchitu yakupharazga?

Ŵerengani Machitidu 1:8, pavuli paki kambiskanani fumbu ili:

• Ntchifukwa wuli tikhumbika chovyu chaku Yehova kuti tifiski ntchitu yidu?

Kumbi muziŵa?

Sabata yeyosi pa maunganu ngidu nga mkati mwa sabata, tisambira mo tingapharazgiya. Asani nyengu yinyaki mungusanirikapu pa maunganu ngenanga, kumbi munguviwona wuli vo tisambira?

6. Tivwiya dangu laku Chiuta lakuti tipharazgengi

Mu nyengu ya akutumika, ŵanthu akususka ayesesanga kukaniza akusambira kuti aleki kupharazga. Kweni Akhristu akwambiriya anguvikiliya wanangwa wawu wakupharazga mwa “kujalikiska mwadangu uthenga wamampha.” (Afilipi 1:7) Akaboni aku Yehova nawu achita so viyo mazuŵa nganu.a

VIDIYO: Kujalikiska Uthenga Wamampha Mwadangu (2:28)

Ŵerengani Machitidu 5:27-42, pavuli paki kambiskanani fumbu ili:

• Ntchifukwa wuli tilekengi cha kupharazga?—Wonani vesi 29, 38, ndi 39.

KUMBI MWASAMBIRANJI?

Yesu wangukambiya akusambira ŵaki kuti apharazgengi uthenga wamampha ku ŵanthu amitundu yosi. Yehova watovya ŵanthu ŵaki kuti agwirengi ntchitu yeniyi.

Kuweriyamu

• Kumbi uthenga wamampha upharazgika wuli pacharu chosi?

• Kumbi ntchitu yidu yakupharazga yilongo wuli kuti titanja anyidu?

• Kumbi muwona kuti ntchitu yakupharazga yingatiwovya kuti tikondwengi? Ntchifukwa wuli mwamuka viyo?

FUFUZANI

Wonani mo Akaboni aku Yehova apharazgiya mumatawuni ngakulungakulu.

Ntchitu Yapade Yakupharazga Mumalu ngo Musanirika Ŵanthu Anandi ku Paris (5:11)

Kumbi Akaboni aku Yehova afiska wuli kovya ŵanthu wo athaŵa nkhondu kwawu?

Kuŵawovya Mwauzimu Ŵanthu wo Athaŵa Nkhondu (5:59)

Vwani vo munthu munyaki wangukamba kuti muziŵi chifukwa cho wakondwe kugwira ntchitu yakupharazga pa umoyu waki.

Ndikondwa Kuti Ndikusankha Ntchitu Iyi (6:29)

Wonani milandu yinyaki yo tawinapu kumakhoti yo yawovya kuti tipharazgengi uthenga wamampha mwambula kusuzga.

“Apharazgi a Ufumu Atole Nkhani Zawu Kumakhoti” (Ufumu Waku Chiuta Uwusa!, mutu 13)

Yesu wangukamba kuti Mkhristu wakhumbika kubatizika. (Ŵerengani Mateyu 28:19, 20.) Kweni kumbi ubatizu ung’anamuwanji? Nanga munthu wakhumbika kuchitanji kuti wabatiziki?

1. Kumbi ubatizu ung’anamuwanji?

Mazu ngakuti “kubatiza” ngakutuliya ku mazu nga Chigiriki ngo ngang’anamuwa “kubizga” mumaji. Pa nyengu yo Yesu wabatizikanga, wangubizgika liŵavu losi mu Msinji wa Yorodani, ndipu pavuli paki ‘wanguzuwuka mumaji.’ (Mariko 1:9, 10) Mwakuyanana waka, Akhristu auneneska nawu abizgika liŵavu losi mumaji asani abatizika.

2. Kumbi munthu walongonji asani wabatizika?

Asani munthu wabatizika, walongo pakweru kuti wakujipereka kwaku Yehova Chiuta. Kumbi munthu watijipereka wuli kwaku Chiuta? Wechendabatiziki, wapemphera dankha kwaku Yehova pakuyija ndipu watimukambiya kuti wakhumba kumuteŵete kwa umoyu waki wosi. Iyu wakambiya so Yehova kuti wasopengi Iyu pe ndipu nyengu zosi wachitengi vo Yehova wakhumba. Iyu wasankha ‘kujikana ndi kulutirizga kulondo’ vo Yesu wachitanga ndi kusambiza. (Mateyu 16:24) Kujipereka ndipuso kubatizika kwaki, kutimuwovya kuti waje pa ubwezi wakukho ndi Yehova ndipuso ŵanthu anyaki wo wasope nawu limoza.

3. Kumbi munthu wakhumbika kuchitanji kuti wabatiziki?

Munthu wechendabatiziki, wakhumbika dankha kusambira vakukwaskana ndi Yehova ndipuso kumugomezga ndi mtima wosi. (Ŵerengani Aheberi 11:6.) Asani mungalutirizga kusambira vinandi vakukwaskana ndi Yehova, chivwanu chinu chikuwengi ndipuso mumuyanjengi ukongwa. Pavuli paki mukhumbisiskengi kupharazga vakukwaskana ndi iyu ndipuso kuvwiya marangu ngaki. (2 Timote 4:2; 1 Yohane 5:3) Munthu wangasankha kujipereka kwaku Chiuta ndi kubatizika asani ‘watenda nge mo Yehova wakhumbiya, kuti wamukondwesengi ukongwa.’—Akolose 1:9, 10.a

SAMBIRANI VINANDI

4. Vo tisambirapu pa ubatizu waku Yesu

Ŵerengani Mateyu 3:13-17 kuti muziŵi vinandi vakukwaskana ndi ubatizu waku Yesu. Pavuli paki kambiskanani mafumbu yanga:

• Kumbi Yesu wangubatizika weche bonda?

• Kumbi wangubatizika wuli? Kumbi angumunthonyeze waka maji?

Yesu wati wabatizika, wangwamba kugwira ntchitu yapade yo Chiuta wangumupaska. Ŵerengani Luka 3:21-23 ndipuso Yohane 6:38, pavuli paki kambiskanani fumbu ili:

• Kumbi ndi ntchitu niyi yo Yesu wanguyiŵika panthazi ukongwa wati wabatizika?

5. Namwi mungafiska kubatizika

Kujipereka kwaku Chiuta ndipuso kubatizika kungawoneka nge nkhwakusuzga pakwamba. Kweni namwi mungasambira Bayibolu ndi kusintha vinthu pa umoyu winu mpaka kubatizika. Kuti muwoni ŵanthu anyaki wo anguchitapu venivi woneriyani VIDIYO.

VIDIYO: Vo Mungachita Kuti Muje pa Ubwezi ndi Yehova (1:11)

Ŵerengani Yohane 17:3 ndipuso Yakobe 1:5, pavuli paki kambiskanani fumbu ili:

• Kumbi ndi vinthu wuli vo munthu wangachita kuti wabatiziki?

1. Titijipereka kwaku Yehova kuziya mupempheru ndipu titimukambiya kuti timuteŵetiyengi mpaka muyaya

2. Pa ubatizu tilongo pakweru kuti tikujipereka kwaku Chiuta

6. Asani munthu wabatizika wasere mu banja lauzimu laku Yehova

Asani munthu wabatizika wasere mu banja lakukoliyana lapacharu chosi. Chinanga kuti tituliya mumalu ndipuso mumitundu yakupambanapambana, tosi tigomezga vakuyanana ndipuso tilondo marangu ngakuyanana kwekosi ko tingaŵa. Ŵerengani Salimo 25:14 ndipuso 1 Peturo 2:17, pavuli paki kambiskanani fumbu ili:

• Kumbi ubatizu utimuwovya wuli munthu kuti waje pa ubwezi ndi Yehova ndipuso anyaki wo wasope nawu limoza?

KUMBI MWASAMBIRANJI?

Yesu wangukamba kuti munthu wakhumbika kubatizika kuti waje Mkhristu. Kuti munthu wabatiziki, wakhumbika kumugomezga ukongwa Yehova, kuvwiya marangu Ngaki ndipuso watenere kujipereka kwaku iyu ndi mtima wosi.

Kuweriyamu

• Kumbi ubatizu ung’anamuwanji, nanga ntchifukwa wuli munthu wakhumbika kubatizika?

• Kumbi kujipereka kwaku Yehova ndi ubatizu vikoliyana wuli?

• Kumbi ndi vinthu wuli vo munthu wangachita kuti wabatiziki?

FUFUZANI

Wonani vo ubatizu ung’anamuwa.

“Kumbi Ubatizu Ntchinthu Wuli?” (Nkhani ya pa webusayiti)

Wonani vo munthu wangachita kuti waluti panthazi mpaka kubatizika.

“Kwanja Yehova ndi Kuwonga vo Watikuchitiyani Kungakuchitiskani kuti Mubatiziki” (Chigongwi cha Alinda, March 2020)

Ŵerengani nkhani iyi kuti muziŵi vo vinguchitiska munthu munyaki kuti wasankhi kubatizika.

“Akhumbanga Kuti Ndisimikizi Ndija vo Bayibolo Lisambiza” (Chigongwi cha Alinda, February 1, 2013)

Wonani chifukwa cho tikambiya kuti ubatizu ntchinthu chakukhumbika ukongwa kweniso vo mungachita kuti munozgeke kubatizika.

“Kumbi Ndibatiziki?” (Kwamuka kwa Mafumbu ngo Achinyamata Afumba—Buku Lachiŵi, mutu 37)