Yesu Wanguyuska Mwana wa Choko

Wati wachizga mteŵeti wa mura wa asilikali, Yesu wangutuwa ku Kaperenao ndipu wanguluta ku tawuni ya Nayini. Tawuni yeniyi yenga pa mtunda wa makilomita 35 kutuwa kumwera chakuzambwi kwa tawuni ya Kaperenao. Pa nyengu iyi, wenga yija cha kweni wenga ndi akusambira ŵaki ndipuso gulu la ŵanthu. Ŵe pafupi kufika mutawuni ya Nayini, angukumana ndi kagulu ka Ayuda wo angunyamuwa maliru, ndipu yitenere kuti yenga nyengu ya mazulu. Mnyamata munyaki ndiyu wangutayika ndipu ŵanthu ŵenaŵa atuwanga mutawuni yeniyi kuluta kumasanu.

Anyina a mnyamata mwenuyu ndiwu ŵenga ndi chitima ukongwa pa gulu losi. Yiwu ŵenga choko ndipu mwana yumoza pe yo ŵenga nayu ndiyu wangutayika. Arumu ŵawu ŵati atayika, yiwu apembuzgikanga chifukwa cha mwana wawu. Aŵanaŵaniyani mo yiwu amuyanjiyanga, chifukwa amuthembanga kuti ndiyu wazakuŵawovya kunthazi. Kweni mnyamata uyu wati watayika, yiwu ŵengavi so munthu munyaki yo watingi wajengi nawu kweniso kuŵawovya.

Yesu wangukwaskika ukongwa wati wawona kuti munthukazi mwenuyu we ndi chitima ukongwa, kweniso mo vinthu venge pa umoyu waki. Pavuli paki, Yesu wangumuvwiya lisungu ndipu wangumuchiska. Iyu wanguti: “Lekani kuliya.” Yesu wangufika pafupi ndipu wanguko kasalasala yo angunyamuliyapu mnyamata yo wangufwa. (Luka 7:13, 14) Vo Yesu wanguchita vinguchitisa kuti gulu la ŵanthu wo aliyanga limi dankha. Panyaki afumbananga kuti: ‘Kumbi wang’anamuwanji, nanga wakhumba kuchitanji?’

Kumbi muŵanaŵana kuti ŵanthu wo ayendanga ndi Yesu, wo angumuwonapu wachichita vakuziziswa kweniso wachichizga ŵanthu aŵanaŵananganji? Yiwu ŵenga ŵechendawonepu Yesu wachiyuska munthu wakufwa. Panyaki yiwu ajifumbanga kuti, chinanga kuti kali ukongwa ŵanthu anyaki akuyuskikapu, kumbi Yesu nayu wangayuska munthu wakufwa? (1 Ŵakaronga 17:17-23; 2 Ŵakaronga 4:32-37) Pavuli paki, Yesu wangukamba kuti: “Mnyamata yiwi, ndikamba ndi yiwi, yuka!” (Luka 7:14) Nyengu yeniyo, mnyamata yo wanguyuka ndipu wangwamba kulongoro. Yesu wangupereka mnyamata mwenuyu kwa anyina. Chinanga kuti anguzizwa, kweni angukondwa ukongwa chifukwa mwana wawu wanguyuskika.

Ŵanthu ŵati awona kuti mnyamata yo wayuskika, anguthamika Yehova, Wakupereka Umoyu. Anguti: “Mchimi mura wabuka mukati mwidu.” Anyaki anguvwisa kukhumbika kwa vakuziziswa vo Yesu wanguchita ndipu angukamba kuti: “Chiuta wakumbuka ŵanthu ŵaki.” (Luka 7:16) Nkhani yeniyi yinguwanda mwaliŵi ukongwa muvigaŵa vapafupi, ndipu yitenere kuti yinguchifika kwawu kwaku Yesu ku Nazareti, tawuni yo yenga pa mtunda wa makilomita 10. Nkhani yeniyi yinguchifika so chakumwera ku Yudeya.

Pa nyengu iyi, ndipu Yohane Mubatizi weche mujeri ndipu wakhumbisiskanga kuti wavwi vakuziziswa vo Yesu wachitanga. Akusambira ŵaki ndiwu amukambiyanga vakuziziswa venivi. Kumbi Yohane wanguchita wuli wati wavwa vo Yesu wachitanga?