7. Ufumu waku Chiuta we ndi marangu ngamampha ukongwa

Maboma nga ŵanthu ngapanga marangu ngo aŵanaŵana kuti ngawovyengi kweniso ngavikiliyengi ŵanthu ŵawu. Ufumu waku Chiuta nawu we ndi marangu ngo ŵanthu ŵaki akhumbika kulondo. Ŵerengani 1 Akorinto 6:9-11, pavuli paki kambiskanani mafumbu yanga:

• Kumbi muwona kuti pacharu vinthu vazamukuŵa wuli asani ŵanthu wosi aziyamba kulondo marangu ngaku Chiuta?a

• Kumbi muwona kuti mphakuvwika kuti Yehova wakhumba kuti ŵanthu wo alamulika ndi Ufumu waki alondongi marangu ngenanga? Ntchifukwa wuli muwona viyo?

• Nanga ndi vinthu wuli vo vilongo kuti ŵanthu wo aleka kuvwiya marangu ngenanga angasintha?—Wonani vesi 11.

Ŵanthu anandi achita soni kukamba nkhani zakukwaskana ndi kugonana. Kweni asani Bayibolu likamba nkhani zenizi, likonkhoska vinthu mwakuvwika umampha ndipuso mwaulemu. Vo Bayibolu likamba pa nkhani yakugonana vakovya. Venivi vakuziziswa cha, chifukwa Bayibolu likutuliya kwaku Yehova yo ndi Mlengi widu. Iyu waziŵa vo tingachita kuti vinthu vitiyendiyengi umampha. Watitikambiya vo tingachita kuti timukondwesengi kweniso vo vingatiwovya kuti tikondwengi ndi umoyu mpaka muyaya.

1. Kumbi Yehova watiyiwona wuli nkhani yakugonana?

Kugonana ndi mphasu yakutuliya kwaku Yehova. Iyu wakhumba kuti munthulumi kweniso munthukazi wo akutorana, ndiwu akondwengi ndi mphasu yeniyi. Mphasu yeniyi yitovya ŵanthu wo akutorana kuti abalengi ŵana pe cha, kweniso kuti alongoranengi chanju munthowa yapade ndipuso kuti akondwengi. Ndichu chifukwa chaki Mazu ngaku Chiuta ngakamba kuti: “Ukondwi ndi munthukazi wa pa unyamata waku.” (Nthanthi 5:18, 19) Yehova wakhumba kuti ŵanthu wo akutorana angachitanga chigololu cha kweni ajengi akugomezgeka ku munyawu yo akutorana nayu.—Ŵerengani Aheberi 13:4.

2. Kumbi ureŵi ung’anamuwanji?

Bayibolu lititikambiya kuti “ŵanthu wosi wo achita ureŵi . . . azamuhara cha Ufumu waku Chiuta.” (1 Akorinto 6:9, 10) Pakulemba vakukwaskana ndi ureŵi, ŵanthu wo alembanga Bayibolu angugwiriskiya ntchitu mazu nga Chigiriki ngakuti por·neiʹa. Mazu yanga ngang’anamuwa vinandi kusazgapu (1) kugonanaa kwa pakati pa ŵanthu wo akutorana cha, (2) kugonana anthulumi pamwenga anthukazi pe, ndipuso (3) kugona nyama. Tikondwesa Yehova kweniso vinthu vititiyende umampha asani ‘tichita ureŵi cha.’—1 Atesalonika 4:3.

SAMBIRANI VINANDI

3. Thaŵani ureŵi

Yosefi yo wenga munthu wakugomezgeka wangukana kuchita ureŵi. Ŵerengani Genezesi 39:1-12, pavuli paki kambiskanani mafumbu yanga:

• Ntchifukwa wuli Yosefi wanguthaŵa?—Wonani vesi 9.

• Kumbi muwona kuti Yosefi wanguchita umampha? Ntchifukwa wuli muwona viyo?

VIDIYO: Thaŵani Ureŵi (5:06)

Yehova wakhumba cha kuti tichitengi ureŵi. Ŵerengani 1 Akorinto 6:18, pavuli paki kambiskanani mafumbu yanga:

• Kumbi ndi vakuchitika nivi vo vingachitiska kuti munthu wachiti ureŵi?

• Kumbi mungachita wuli kuti muthaŵi ureŵi?

4. Mungafiska kukana mayeseru

VIDIYO: Muŵerengengi Bayibolu Kuti Mumalani ndi Mayeseru (3:02)

• Nge po tawone muvidiyo, kumbi mubali wanguchita wuli wati waziŵa kuti maŵanaŵanu ndipuso vakuchita vaki, vingamuchitiska kuti waleki kuja wakugomezgeka ku muwolu waki?

Akhristu akugomezgeka nawu nyengu zinyaki aŵanaŵana vinthu viheni. Sonu kumbi mungachita wuli kuti muleki kulutirizga kuŵanaŵana vinthu viheni asani vaza mumutu? Ŵerengani Afilipi 4:8, pavuli paki kambiskanani mafumbu yanga:

• Kumbi tikhumbika kuŵanaŵana vinthu vamtundu wuli?

• Kumbi kuŵerenga Bayibolu kweniso kutangwanika ndi ntchitu yaku Yehova, kungatiwovya wuli kuti tikani mayeseru?

5. Fundu zaku Yehova zititiwovya

VIDIYO: Wambula Zeru (9:31)

• Kumbi mnyamata wangujisereza wuli mu mayeseru?—Wonani Nthanthi 7:8, 9.

• Lemba la Nthanthi 7:23, 26 lilongo kuti munthu wangakumana ndi masuzgu ngakulu asani wachita ureŵi. Kumbi tingakumana ndi masuzgu wuli asani tingachita ureŵi?

• Kumbi kuleka kuchita ureŵi kungatiwovya wuli kuti tikondwengi ndi umoyu mpaka muyaya?

Ŵanthu anyaki awona kuti vo Chiuta wakamba mu Bayibolu vakukaniza kugonana kwa anthulumi pamwenga anthukazi pe, vilongo kuti iyu walivi chanju. Kweni uneneska ngwakuti, Yehova yo ndi Chiuta wachanju wakhumba kuti weyosi wakondwi ndi umoyu mpaka muyaya. Kuti tisaniyi vitumbiku venivi, tikhumbika kulondo fundu zaki. Ŵerengani 1 Akorinto 6:9-11, pavuli paki kambiskanani fumbu ili:

• Kumbi lemba ili lilongo kuti Chiuta wakaniza kugonana kwa anthulumi pamwenga anthukazi pe?

Tosi tikhumbika kusintha vinthu pa umoyu widu kuti tikondwesengi Chiuta. Kumbi pe phindu lelosi lo tisaniya? Ŵerengani Salimo 19:8, 11, pavuli paki kambiskanani mafumbu yanga:

• Kumbi yimwi muwona kuti fundu zaku Yehova zakovya? Ntchifukwa wuli muwona viyo?

KUMBI MWASAMBIRANJI?

Kugonana ndi mphasu yakutuliya kwaku Yehova yo wakupaska munthulumi ndi munthukazi wo akutorana kuti akondwengi.

Kuweriyamu

• Kumbi ureŵi ung’anamuwanji?

• Ntchinthu wuli cho chingatiwovya kuti tileki kuchita ureŵi?

• Kumbi kulondo fundu zaku Yehova kutitiwovya wuli?

FUFUZANI

Wonani chifukwa cho Chiuta wakhumbiya kuti munthulumi ndi munthukazi wo akhumba kujaliya limoza atoranengi dankha.

“Kumbi Bayibolu Likambanji pa Nkhani Yakujaliya Limoza Kwambula Kutolana?” (Nkhani ya pa webusayiti)

Kumbi fundu ya mu Bayibolu yakuti kugonana anthulumi pamwenga anthukazi pe nkhuheni yichiska kuti tiŵatinkhengi ŵanthu wo achita venivi?

“Kumbi Kugonana kwa Anthulumi Pamwenga Anthukazi pe Nkhuheni?” (Nkhani ya pa webusayiti)

Wonani mo marangu ngaku Chiuta ngakukwaskana ndi nkhani zakugonana ngatitivikiliya.

“Kumbi Kugonana Mumulomu Kuja Nadi Kugonana Chayiku?” (Nkhani ya pa webusayiti)

Mu nkhani ya mutu wakuti “Angundilondere Umampha Ukongwa,” wonani vo vinguchitiska munthulumi yo wagonananga ndi anthulumi anyaki kuti wasinthi umoyu waki ndi kwamba kukondwesa Chiuta.

“Bayibolu Lisintha Ŵanthu” (Chigongwi cha Alinda, April 1, 2011)

Chinanga kuti mutimuyanja ukongwa Yehova ndipuso muyesesa kuchita vosi vo mungafiska kuti muleki kumuguŵiska, kweni nyengu zinyaki munganangisa vinthu vinyaki pamwenga mungabuda. Maubudi nganyaki ngakulu ukongwa kuluska nganyaki. (1 Akorinto 6:9, 10) Asani mwachita ubudi ukulu, mukumbukengi kuti Yehova waleka cha kukuyanjani, ndipu wakhumbisiska kukugowokiyani ndipuso kukuwovyani.

1. Kumbi tingachita wuli kuti Yehova watigowoke asani tachita ubudi?

Ŵanthu wo atimuyanja Yehova achita chitima ukongwa asani aziŵa kuti achita ubudi ukulu. Kweni apembuzgika ndi vo Yehova walayizga ŵanthu ŵaki kuti: “Chinanga maubudi nginu ngangaŵa ngayera, ngajengi ngatuŵa ukongwa.” (Yesaya 1:18) Yehova wangatigowoke asani talapa ndi mtima wosi. Kumbi kulapa nkhuchitanji? Munthu yo walapa watijivwiya chitima ukongwa chifukwa cha vinthu viheni vo wachita, wativileka ndipu wapempha Yehova kuti wamugowoke. Pavuli paki, wachitapu kanthu kuti waleki maŵanaŵanu pamwenga mijalidu yiheni yo yingumuchitiska kuti wachiti ubudi, ndipuso wayesesa kulondo fundu zaku Yehova za mijalidu yamampha.—Ŵerengani Yesaya 55:6, 7.

2. Kumbi Yehova watiŵagwiriskiya wuli ntchitu ŵara kuti atiwovyi asani tachita ubudi?

Yehova wakamba kuti asani munthu wachita ubudi ukulu “wajidaniyi ŵara a mpingu.” (Ŵerengani Yakobe 5:14, 15.) Ŵara ŵenaŵa atanja Yehova ndipuso mbereri zaki. Yiwu akusambizika mo angatiwovye kuti tinozgi ubwezi widu ndi Yehova.—Agalatiya 6:1.

Kumbi ŵara atitiwovya wuli asani tachita ubudi ukulu? Ŵara ŵaŵi pamwenga atatu agwiriskiya ntchitu fundu za mu Bayibolu kuti atiwovyi kuti tiziŵi vo tananga. Angatipaska so masachizgu ngakovya ndipuso ulongozgi unyaki wo ungatiwovya kuti tileki kuchita so ubudi. Asani munthu yo wachita ubudi ukulu walapa cha, ŵara angamumika dankha mumpingu kuti waleki kutimbanyizga anyaki.

SAMBIRANI VINANDI

3. Kusumuwa ubudi wo tachita kutitiwovya kuti tinozgi ubwezi widu ndi Yehova

Yehova wakondwa cha ndi ubudi wewosi wo tingachita, mwaviyo tikhumbika kumukambiya ubudi wo tachita. Ŵerengani Salimo 32:1-5, pavuli paki kambiskanani fumbu ili:

• Ntchifukwa wuli tikhumbika kumukambiya Yehova ubudi wo tachita mumalu mwakubisa?

VIDIYO: “Yehova Walanga wo Watiŵayanja” (3:01)

• Nge po tawone mu vidiyo, kumbi ŵara angumuwovya wuli Canon kuti wawere kwaku Yehova?

Tikhumbika kufwatuka ndi kuŵakambiya chechosi ŵara chifukwa yiwu mbakunozgeka kutiwovya. Ŵerengani Yakobe 5:16, pavuli paki kambiskanani fumbu ili:

• Ntchifukwa wuli vija vambula kusuzga kuti ŵara atiwovyi asani tikamba vinthu mwauneneska?

4. Yehova watiŵalongo lisungu ŵanthu wo akuchita ubudi

Asani munthu wachita ubudi ukulu ndipu wakana kulondo ulongozgi waku Yehova, wangamikika dankha mumpingu. Ndipu munthu waviyo ticheza nayu cha. Ŵerengani 1 Akorinto 5:6, 11, pavuli paki kambiskanani fumbu ili:

• Nge mo chakutupisa chitupisiya bulunga la fulawu, kumbi kucheza ndi munthu wambula kulapa yo wachita ubudi kungatimbanyizga wuli mpingu?

Kumbi mo Yehova wachitiya vinthu ndi ŵanthu wo akuchita ubudi walongo wuli kuti ngwalisungu kweniso ngwachanju?

5. Yehova watitigowoke asani talapa ndi mtima wosi

Yesu wangukonkhoska ntharika yo yingatiwovya kuziŵa mo Yehova wavwiya asani munthu walapa. Ŵerengani Luka 15:1-7, pavuli paki kambiskanani fumbu ili:

• Kumbi ntharika yeniyi yitikusambizaninji vakukwaskana ndi Yehova?

Ŵerengani Ezekiyeli 33:11, pavuli paki kambiskanani fumbu ili:

• Kumbi ntchinthu wuli chakukhumbika ukongwa cho munthu watenere kuchita kuti walongo kuti walapa nadi?.

KUMBI MWASAMBIRANJI?

Yehova wangatigowoke asani tachita ubudi ukulu ndipu talapa ndi mtima wosi kweniso asani tasimikiza kuti tiwerezengepu so cha.

Kuweriyamu

• Ntchifukwa wuli tikhumbika kumukambiya Yehova ubudi wo tachita?

• Kumbi tikhumbika kuchitanji kuti Yehova watigowoke maubudi ngidu?

• Asani tachita ubudi ukulu, ntchifukwa wuli tikhumbika kupempha ŵara kuti atiwovyi?

FUFUZANI

Wonani mo munthu munyaki wanguwone lisungu laku Yehova lo likonkhoskeka pa Yesaya 1:18.

Kukayika Cha Kuti Yehova Ngwalisungu (5:02)

Kumbi ŵara achita wuli kuti awovyi wo akuchita ubudi ukulu?

“Mo Ŵara Angamulongore Chanju Kweniso Lisungu Mkhristu yo Wabuda” (Chigongwi cha Mlinda, August 2024)

Wonani mo chanju kweniso lisungu lilongoreke ku ŵanthu wo akuchita ubudi wo aleka kulapa.

“Kumbi Ŵanthu wo Amikika Dankha mu Mpingu Angawovyeka Wuli? (Chigongwi cha Mlinda, August 2024)

Mu nkhani yakuti “Ndinguwona Kuti Ndikhumbika Kuwere Kwaku Yehova,” wonani chifukwa cho munthu munyaki yo wanguleka uneneska wanguwone kuti Yehova wangumuwovya kuti wawere so kwaku iyu.

“Bayibolu Lisintha Ŵanthu” (Chigongwi cha Mlinda, April 1, 2012)