Ŵanthu anandi achita soni kukamba nkhani zakukwaskana ndi kugonana. Kweni asani Bayibolu likamba nkhani zenizi, likonkhoska vinthu mwakuvwika umampha ndipuso mwaulemu. Vo Bayibolu likamba pa nkhani yakugonana vakovya. Venivi vakuziziswa cha, chifukwa Bayibolu likutuliya kwaku Yehova yo ndi Mlengi widu. Iyu waziŵa vo tingachita kuti vinthu vitiyendiyengi umampha. Watitikambiya vo tingachita kuti timukondwesengi kweniso vo vingatiwovya kuti tikondwengi ndi umoyu mpaka muyaya.

1. Kumbi Yehova watiyiwona wuli nkhani yakugonana?

Kugonana ndi mphasu yakutuliya kwaku Yehova. Iyu wakhumba kuti munthulumi kweniso munthukazi wo akutorana, ndiwu akondwengi ndi mphasu yeniyi. Mphasu yeniyi yitovya ŵanthu wo akutorana kuti abalengi ŵana pe cha, kweniso kuti alongoranengi chanju munthowa yapade ndipuso kuti akondwengi. Ndichu chifukwa chaki Mazu ngaku Chiuta ngakamba kuti: “Ukondwi ndi munthukazi wa pa unyamata waku.” (Nthanthi 5:18, 19) Yehova wakhumba kuti ŵanthu wo akutorana angachitanga chigololu cha kweni ajengi akugomezgeka ku munyawu yo akutorana nayu.—Ŵerengani Aheberi 13:4.

2. Kumbi ureŵi ung’anamuwanji?

Bayibolu lititikambiya kuti “ŵanthu wosi wo achita ureŵi . . . azamuhara cha Ufumu waku Chiuta.” (1 Akorinto 6:9, 10) Pakulemba vakukwaskana ndi ureŵi, ŵanthu wo alembanga Bayibolu angugwiriskiya ntchitu mazu nga Chigiriki ngakuti por·neiʹa. Mazu yanga ngang’anamuwa vinandi kusazgapu (1) kugonanaa kwa pakati pa ŵanthu wo akutorana cha, (2) kugonana anthulumi pamwenga anthukazi pe, ndipuso (3) kugona nyama. Tikondwesa Yehova kweniso vinthu vititiyende umampha asani ‘tichita ureŵi cha.’—1 Atesalonika 4:3.

SAMBIRANI VINANDI

3. Thaŵani ureŵi

Yosefi yo wenga munthu wakugomezgeka wangukana kuchita ureŵi. Ŵerengani Genezesi 39:1-12, pavuli paki kambiskanani mafumbu yanga:

• Ntchifukwa wuli Yosefi wanguthaŵa?—Wonani vesi 9.

• Kumbi muwona kuti Yosefi wanguchita umampha? Ntchifukwa wuli muwona viyo?

VIDIYO: Thaŵani Ureŵi (5:06)

Yehova wakhumba cha kuti tichitengi ureŵi. Ŵerengani 1 Akorinto 6:18, pavuli paki kambiskanani mafumbu yanga:

• Kumbi ndi vakuchitika nivi vo vingachitiska kuti munthu wachiti ureŵi?

• Kumbi mungachita wuli kuti muthaŵi ureŵi?

4. Mungafiska kukana mayeseru

VIDIYO: Muŵerengengi Bayibolu Kuti Mumalani ndi Mayeseru (3:02)

• Nge po tawone muvidiyo, kumbi mubali wanguchita wuli wati waziŵa kuti maŵanaŵanu ndipuso vakuchita vaki, vingamuchitiska kuti waleki kuja wakugomezgeka ku muwolu waki?

Akhristu akugomezgeka nawu nyengu zinyaki aŵanaŵana vinthu viheni. Sonu kumbi mungachita wuli kuti muleki kulutirizga kuŵanaŵana vinthu viheni asani vaza mumutu? Ŵerengani Afilipi 4:8, pavuli paki kambiskanani mafumbu yanga:

• Kumbi tikhumbika kuŵanaŵana vinthu vamtundu wuli?

• Kumbi kuŵerenga Bayibolu kweniso kutangwanika ndi ntchitu yaku Yehova, kungatiwovya wuli kuti tikani mayeseru?

5. Fundu zaku Yehova zititiwovya

VIDIYO: Wambula Zeru (9:31)

• Kumbi mnyamata wangujisereza wuli mu mayeseru?—Wonani Nthanthi 7:8, 9.

• Lemba la Nthanthi 7:23, 26 lilongo kuti munthu wangakumana ndi masuzgu ngakulu asani wachita ureŵi. Kumbi tingakumana ndi masuzgu wuli asani tingachita ureŵi?

• Kumbi kuleka kuchita ureŵi kungatiwovya wuli kuti tikondwengi ndi umoyu mpaka muyaya?

Ŵanthu anyaki awona kuti vo Chiuta wakamba mu Bayibolu vakukaniza kugonana kwa anthulumi pamwenga anthukazi pe, vilongo kuti iyu walivi chanju. Kweni uneneska ngwakuti, Yehova yo ndi Chiuta wachanju wakhumba kuti weyosi wakondwi ndi umoyu mpaka muyaya. Kuti tisaniyi vitumbiku venivi, tikhumbika kulondo fundu zaki. Ŵerengani 1 Akorinto 6:9-11, pavuli paki kambiskanani fumbu ili:

• Kumbi lemba ili lilongo kuti Chiuta wakaniza kugonana kwa anthulumi pamwenga anthukazi pe?

Tosi tikhumbika kusintha vinthu pa umoyu widu kuti tikondwesengi Chiuta. Kumbi pe phindu lelosi lo tisaniya? Ŵerengani Salimo 19:8, 11, pavuli paki kambiskanani mafumbu yanga:

• Kumbi yimwi muwona kuti fundu zaku Yehova zakovya? Ntchifukwa wuli muwona viyo?

KUMBI MWASAMBIRANJI?

Kugonana ndi mphasu yakutuliya kwaku Yehova yo wakupaska munthulumi ndi munthukazi wo akutorana kuti akondwengi.

Kuweriyamu

• Kumbi ureŵi ung’anamuwanji?

• Ntchinthu wuli cho chingatiwovya kuti tileki kuchita ureŵi?

• Kumbi kulondo fundu zaku Yehova kutitiwovya wuli?

FUFUZANI

Wonani chifukwa cho Chiuta wakhumbiya kuti munthulumi ndi munthukazi wo akhumba kujaliya limoza atoranengi dankha.

“Kumbi Bayibolu Likambanji pa Nkhani Yakujaliya Limoza Kwambula Kutolana?” (Nkhani ya pa webusayiti)

Kumbi fundu ya mu Bayibolu yakuti kugonana anthulumi pamwenga anthukazi pe nkhuheni yichiska kuti tiŵatinkhengi ŵanthu wo achita venivi?

“Kumbi Kugonana kwa Anthulumi Pamwenga Anthukazi pe Nkhuheni?” (Nkhani ya pa webusayiti)

Wonani mo marangu ngaku Chiuta ngakukwaskana ndi nkhani zakugonana ngatitivikiliya.

“Kumbi Kugonana Mumulomu Kuja Nadi Kugonana Chayiku?” (Nkhani ya pa webusayiti)

Mu nkhani ya mutu wakuti “Angundilondere Umampha Ukongwa,” wonani vo vinguchitiska munthulumi yo wagonananga ndi anthulumi anyaki kuti wasinthi umoyu waki ndi kwamba kukondwesa Chiuta.

“Bayibolu Lisintha Ŵanthu” (Chigongwi cha Alinda, April 1, 2011)

Muvigaŵa vinyaki, ŵanthu agomezga kuti munthu wakondwa pijapija asani wato pamwenga wayirwa. Kweni mbanthu wosi cha akutorana wo akondwa, ndipuso mbanthu wosi cha wo akuleka kuto pamwenga kuyirwa wo aleka kukondwa. Uneneska ngwakuti Bayibolu likamba kuti kuto, kuleka kuto, kuyirwa ndipuso kuleka kuyirwa, vosi ndi mphasu yakutuliya kwaku Yehova.

1. Kumbi kuleka kuto pamwenga kuyirwa nkhwamampha munthowa nizi?

Bayibolu likamba kuti: “Yo wato pamwenga kuyirwa wachita umampha kweni yo waleka kuto pamwenga kuyirwa wachita umampha ukongwa.” (Ŵerengani 1 Akorinto 7:32, 33, 38.) Ntchifukwa wuli Bayibolu likamba kuti munthu yo wasankha kuleka kuto pamwenga kuyirwa “wachita umampha ukongwa”? Munthu wambula kuto pamwenga kuyirwa waŵavi udindu wakuphwere vo munyaki wakhumba. Mwaviyo, tingakamba kuti waja ndi mpata ukulu wakuchitiya vinandi. Mwakuyeruzgiyapu, anyaki asankha kuchita vinandi pakuteŵete Yehova ndipu aluta kuvigaŵa vakutali kuti akapharazgengi uthenga wamampha. Kweniso yiwu atuŵa ndi nyengu yinandi yakusambiriya, ndipu venivi vitiŵawovya kuti aje pa ubwezi wakukho ndi Yehova.

2. Kumbi kutorana mwakulondo dangu nkhwamampha munthowa nizi?

Mwakuyanana ndi wo asankha kuleka kuto pamwenga kuyirwa, ŵanthu wo atorana asaniya so vitumbiku. Bayibolu likamba kuti “ŵaŵi aluska yumoza.” (Wakutawula 4:9) Venivi ndivu nadi vichitikiya Akhristu wo agwiriskiya ntchitu fundu za mu Bayibolu mu nthengwa yawu. Ŵanthu wo atorana mwakulondo dangu alayizgana kuti ayanjanengi, atumbikanengi kweniso aphweriyanengi kwamuyaya. Venivi vichitiska kuti ajivwengi kuti mbakuvikilirika kuluska ŵanthu wo akusomphorana waka pamwenga wo ajaliya waka limoza. Ndipu ŵana ŵawu nawu atijivwa kuti mbakuvikilirika.

3. Kumbi Yehova watiyiwona wuli nthengwa?

Yehova wachikwatisa nthengwa ya ŵanthu akwamba wangukamba kuti: “Munthulumi wazamuleka awisi ndi anyina ndipu wazakujibatika ku muwolu waki.” (Genezesi 2:24) Yehova wakhumba kuti munthulumi ndi muwolu waki ayanjanengi kweniso kuti angalekananga cha kwa umoyu wawu wosi. Iyu wazomereza kuti nthengwa yingamala pijapija asani yumoza wachita chigololu. Asani venivi vachitika, Yehova wazomereza kuti yo ngwambula kunanga wangasankha kumalisa nthengwa pamwenga cha.a (Mateyu 19:9) Yehova wazomereza cha kuti Akhristu atongi muta.—1 Timote 3:2.

SAMBIRANI VINANDI

4. Yigwiriskiyeni ntchitu umampha mphasu yinu yakuleka kuto pamwenga kuyirwa

Yesu wawonanga kuti kuleka kuto pamwenga kuyirwa ndi mphasu. (Mateyu 19:11, 12) Ŵerengani Mateyu 4:23, pavuli paki kambiskanani fumbu ili:

• Kumbi Yesu wanguyigwiriskiya wuli ntchitu mphasu yaki yakuleka kuto pakuteŵete Awisi ndipuso ŵanthu?

Akhristu ambula kuto pamwenga kuyirwa nawu angakondwa asani agwiriskiya ntchitu umampha nyengu yawu nge mo Yesu wanguchitiya. Woneriyani VIDIYO, pavuli paki kambiskanani fumbu lo le mumphata.

VIDIYO: Akhristu Akugomezgeka wo Mbambula Kuto Pamwenga Kuyirwa (3:11)

• Kumbi Akhristu ambula kuto pamwenga kuyirwa angayigwiriskiya wuli ntchitu nyengu yawu?

Kumbi muziŵa?

Bayibolu likamba cha vyaka vo munthu wangatore pamwenga kuyirwiya. Kweni lichiska kuti munthu wakhumbika dankha kujumpha “pa unamana.” Ivi ving’anamuwa nyengu yo wachinyamata watuŵa ndi chilakulaku chikulu chakugonana cho chingachitiska kuti watondeki kuchita vinthu mwazeru.—1 Akorinto 7:36.

5. Sankhani mwazeru munthu wakutorana nayu

Kusankha munthu wakutorana nayu, ntchimoza mwa vinthu vakukhumbika ukongwa pa umoyu winu. Ŵerengani Mateyu 19:4-6, 9, pavuli paki kambiskanani fumbu ili:

• Ntchifukwa wuli Mkhristu wakhumbika cha kuchita vinthu mwakuthaŵiriya asani wakhumba kuto pamwenga kuyirwa?

Bayibolu lingakuwovyani kuziŵa mijalidu yo mukhumbika kuŵanaŵaniya asani musankha munthu wakutorana nayu. Chakukhumbika ukongwa ntchakuti mukhumbika kusankha munthu yo watanja Yehova.b Ŵerengani 1 Akorinto 7:39 ndipuso 2 Akorinto 6:14. Pavuli paki kambiskanani mafumbu yanga:

• Ntchifukwa wuli tikhumbika kutorana ndi Mkhristu munyidu pe?

• Kumbi muwona kuti Yehova wangavwa wuli asani tingatorana ndi munthu yo watanja Yehova cha?

6. Muwonengi nthengwa nge mo Yehova watiyiwone

Kali ku Isirayeli, anthulumi amalisanga nthengwa pa vifukwa vambula kuvwika. Ŵerengani Malaki 2:13, 14, 16, pavuli paki kambiskanani fumbu ili:

• Ntchifukwa wuli Yehova watinkha kumalisa nthengwa pa vifukwa vambula kuvwika?

Woneriyani VIDIYO, pavuli paki kambiskanani fumbu lo le mumphata.

VIDIYO: Nthengwa Yikhumbika Cha Kumala (4:30)

• Asani mukutorana ndi Kaboni cha, kumbi mungachita wuli kuti vinthu viyendengi umampha mu nthengwa yinu?

7. Mugwiriskiyengi ntchitu fundu zaku Yehova pa nkhani ya nthengwa

VIDIYO: Mungafiska Kulondo Fundu Zaku Yehova pa Nkhani ya Nthengwa (4:14)

Ŵerengani Aheberi 13:4, pavuli paki kambiskanani mafumbu yanga:

• Kumbi muwona kuti fundu zaku Yehova pa nkhani ya nthengwa zakovya? Ntchifukwa wuli muwona viyo?

Yehova wakhumba kuti Akhristu akalembesengi ku boma asani atorana kweniso asani amalisa nthengwa yawu, ndipu lenili ndilu dangu lo le muvyaru vinandi. Ŵerengani Tito 3:1, pavuli paki kambiskanani fumbu ili:

• Asani mukuto pamwenga kuyirwa, kumbi musimikiza kuti nthengwa yinu mukulembesa ku boma?

KUMBI MWASAMBIRANJI?

Kaya munthu we pa nthengwa pamwenga cha, vosi ndi mphasu yakutuliya kwaku Yehova. Weyosi wangakondwa mbwenu asani wachita vinthu mwakukoliyana ndi vo Yehova wakhumba.

Kuweriyamu

• Kumbi munthu wangachita wuli kuti wayigwiriskiyengi ntchitu umampha nyengu yaki asani ngwambula kuto pamwenga kuyirwa?

• Ntchifukwa wuli Bayibolu likamba kuti tikhumbika kutorana ndi Mkhristu munyidu pe?

• Kumbi Malemba ngazomereza kuti ŵanthu akutorana angamalisa nthengwa pa chifukwa chimoza nichi?

FUFUZANI

Kumbi kuto pamwenga kuyirwa “mwa Ambuya pe” kung’anamuwanji?

“Vo Akuŵerenga Afumba” (Chigongwi cha Alinda, July 1, 2004)

Woneriyani mavidiyo ngaŵi ngo ngangakuwovyani kusankha mwakwenere pa nkhani ya nthengwa kweniso munthu wakutorana nayu.

Kunozgeke Nthengwa (11:53)

Woneriyani vidiyo iyi kuti muziŵi chifukwa cho mubali munyaki wawone kuti vo Yehova wakumupaska viluska vo wakuvileka

Ndaŵanaŵananga Kuti Panyaki Wasambirengi Uneneska (1:56)

Wonani fundu zinyaki zo munthu wakhumbika kuŵanaŵaniya wechendasankhi kumalisa nthengwa pamwenga kupatukana.

“Mutumbikengi ‘Cho Chiuta Wamanga Pamoza’” (Chigongwi cha Alinda, December 2018)