3. Kumbi tingalongo wuli kuti tiwonga?

Yeruzgiyani kuti mubira mumaji ndipu munthu munyaki wakutaskani. Kumbi mungamulereska waka munthu yo wakutaskani ndi kutuwapu? Pamwenga mungasaniya nthowa zakuti mumuwonge pa vo wakuchitiyani?

Tazamusaniya umoyu wamuyaya chifukwa cha lisungu lo Yehova wakutilongo. Ŵerengani 1 Yohane 4:8-10, pavuli paki kambiskanani mafumbu yanga:

• Kumbi sembi yaku Yesu ndi mphasu yapade munthowa wuli?

• Kumbi mutuvwa wuli chifukwa cha vo Yehova ndi Yesu akukuchitiyani?

Kumbi tingalongo wuli kuti tiwonga vo Yehova ndi Yesu akutichitiya? Ŵerengani 2 Akorinto 5:15 ndipuso 1 Yohane 4:11; 5:3. Asani mwaŵerenga lemba lelosi pakulija, kambiskanani fumbu ili:

• Mwakukoliyana ndi lemba ili, kumbi tingachita wuli kuti tilongo kuti tiwonga?

1. Ntchifukwa wuli munthu wakhumbika kujipereka kwaku Yehova?

Titijipereka kwaku Yehova chifukwa chakuti titimuyanja. (1 Yohane 4:10, 19) Bayibolu likamba kuti: “Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi, ndi nthazi zaku zosi.” (Mariko 12:30) Tilongo kuti titanja Chiuta kuziya mu vo tikamba kweniso kuziya mu vo tichita. Nge mo vijaliya kuti ŵanthu wo atanjana ukongwa atorana, nasi titijipereka kwaku Yehova ndi kubatizika chifukwa chakuti titimuyanja ukongwa.