2. Kumbi Bayibolu lititikambiyanji vakukwaskana ndi Yehova?

Bayibolu lititikambiya kuti pa achiuta wosi wo ŵanthu atiŵasopa, Yehova pe ndiyu Chiuta wauneneska. Chifukwa wuli? Pe vifukwa vinandi. Yehova ndiyu we ndi mazaza ngosi ndipu iyu ndiyu “Wapachanya Limu pacharu chosi chapasi.” (Ŵerengani Salimo 83:18.) Yehova ndi Chiuta “Wanthazizosi.” Venivi ving’anamuwa kuti iyu we ndi nthazi ukongwa ndipu wangachita chechosi cho wakhumba. Iyu ‘wakulenga vinthu vosi’ va muchilengedu kusazgapu vamoyu vo ve pacharu chapasi. (Chivumbuzi 4:8, 11) Mwakupambana ndi weyosi, Yehova wengaku kwamba kali ndipu waŵengeku mpaka muyaya.—Salimo 90:2.

Pakuti Yehova ndi Mlengi widu, tikhumbika kujipereka kwaku iyu pe. (Chivumbuzi 4:11) Ivi ving’anamuwa kuti tikhumbika kwanja kweniso kusopa iyu pe mbwenu. Ndipuso pakumusopa, tikhumbika cha kugwiriskiya ntchitu angoza pamwenga vikozgu.—Ŵerengani Yesaya 42:8.

Kusopa kwidu kukhumbika kuja ‘kwakupaturika kweniso kwakuzomerezeka’ ndi Yehova. (Aroma 12:1) Ivi ving’anamuwa kuti tikhumbika kuvwiya marangu ngaki. Mwakuyeruzgiyapu, wo atanja Yehova, alondo marangu ngo iyu wakupereka pa nkhani ya nthengwa. Kweniso achitaku cha vinthu viheni nge kukweŵa foja, kugwiriskiya ntchitu munkhwala wakutimbanyizga wongu pamwenga kuloŵe.a