“Mukhoza Kuja Mpayiniya Wamampha!”
1. Kumbi muchizi munyaki wawuwonanga wuli uteŵeti waki wa upayiniya?
1 Muchizi munyaki zina laki Kathe B. Palm, wangukamba kuti: “Pengavi so nchitu yinyaki yo ndawonanga kuti yingandipaska likondwa pamwenga vitumbiku vauzimu.” Iyu wanguchita upayiniya mwakujipereka kwa vyaka vinandi mu vigaŵa vosi va ku Chile, m’charu cha South America. Pakuŵanaŵaniya umoyu walikondwa wa ŵanthu wo ŵe mu uteŵeti wa nyengu zosi, panyaki namwi munthu munyaki wakukukambiyanipu kuti: “Mukhoza kuja mpayiniya wamampha!”
2. Konkhoskani chifukwa cho munthu yo wachita vinthu vauzimu wajaliya ndi likondwa.
2 Nchitu Yakupaska Likondwa: Yesu, chakuwoniyapu chidu, wakondwanga pakuchita khumbu la Awiski. (Yoha. 4:34) Mwaviyo, Yesu waneneskanga pakusambiza akumulondo ŵaki kuti munthu waja ndi likondwa lenechu asani wagwira nchitu zakukwaskana ndi kusopa Yehova. Tija ndi likondwa asani nyengu zosi tigwira nchitu zo Yehova wakondwa nazu. Kweniso, asani tigwiriskiya nchitu nyengu, nthazi ndi chuma chidu pakuwovya ŵanthu, likondwa lidu lisazgikiyaku.—Machi. 20:31, 35.
3. Kumbi ndi likondwa wuli lo tingasaniya asani timaliya nyengu yinandi mu uteŵeti?
3 Asani timaliya nyengu yinandi mu uteŵeti, tiŵengi ndi mwaŵi ukulu wakuja ndi likondwa chifukwa cha kwambiska ndi kuchitiska masambiru nga Bayibolo. Chinanga ndi mu vigaŵa vo ŵeneku a nyumba anandi awoneka kuti akondwa nasi cha, tikhoza kuwona kuti chigaŵa chidu nchanyata ukongwa kuphara po taŵanaŵaniyanga kali techendaziŵiriyi kupharazga. Apayiniya angagwiriskiya nchitu vosi vo angusambira ku Sukulu ya Uteŵeti wa Upayiniya, pavuli pakuchita upayiniya kwa chaka chimoza. (2 Timo. 2:15) Asani tikunthiyapu, tikhoza kupanda mbewu za uneneska zo pavuli paki zazamubala vipasu.—Waku. 11:6.
4. Kumbi ampupuka wo ŵe pafupi kumaliza sukulu atenere kuŵanaŵana kuzichitanji?
4 Ampupuka: Po mwe pafupi kumaliza sukulu, kumbi mwaŵanaŵanapu umampha za vo muchitengi kunthazi? Pasonu panu mutangwanika ukongwa ndi sukulu. Kumbi nyengu yo mumaliya pakuchita vakusukulu, mwazakuyigwiriskiya nchitu wuli asani mwamaliza sukulu? M’malu mwakuzipenjapenja nchitu yakulembeka, mukhoza kuŵanaŵaniyapu mwa rombu za kuzichita upayiniya wanyengu zosi. Mwazamuja ndi malusu yanga: Kupharazgiya ŵanthu akupambanapambana, kumalana ndi masuzgu nga paumoyu winu, kuja ndi nkharu yamampha ndipuso kuja ndi lusu pakusambiza. Malusu yanga ngazakukuwovyani paumoyu winu wosi.
5. Kumbi apapi kweniso ŵanthu wosi mu mpingu angachiska wuli ampupuka kuchita uteŵeti wa upayiniya?
5 Apapi, kumbi mutovya ŵana ŵinu kuti azichiti uteŵeti wa nyengu zosi? Vakukamba vinu kweniso vinthu vamampha vo muchita vingawovya ukongwa ŵana ŵinu kuti aŵikengi vinthu va Ufumu pakwamba. (Mate. 6:33) Wampupuka munyaki zina laki Ray, yo wangwamba upayiniya wati wamaliza waka sukulu wangukamba kuti: “Nyengu zosi ama awonanga kuti upayiniya uchitiska kuti munthu waje ndi likondwa.” Ŵanthu wosi mu mpingu angachiska ampupuka kuchita upayiniya mwa vakukamba ndi vakuchita vawu. Mnyamata munyaki wa ku Spain zina laki Jose wanguti: “Ŵanthu a mu mpingu widu awona upayiniya kuja nchitu yamampha ukongwa kwa ampupuka. Vo akambanga kweniso mazu ngakulumba uteŵeti wa upayiniya ndi chovyu chakwenere cho yiwu aperekanga, ndivu vingundiwovya kuti ndiyambi upayiniya kwambula kusuzga.”
6. Kumbi nchinthu wuli cho tingachita asani tilivi khumbu lakuchita upayiniya?
6 Kumalana ndi Masuzgu: Kweni wuli asani mukamba kuti, ‘Ndilivi khumbu lakuchita upayiniya.’ Asani ndipu mutijivwiya, rombani kwaku Yehova ndipu mukambiyeni kuti, ‘ndiziŵa cha asani ndingakwanisa kuchita upayiniya, kweni ndikhumba kuchita vo vingakukondweskani.’ (Sumu 62:8; Ntha. 23:26) Gwiriskiyani nchitu ulongozgi waki wo uperekeka kuporote m’Mazu ngaki ndi gulu laki. Apayiniya anandi anyengu zosi angwamba dankha ‘alaŵa’ upayiniya wakovya ndipu likondwa lo angusaniya linguŵachitiska kuti ayambi uteŵeti wa nyengu zosi.—Sumu 34:8.
7. Kumbi tingamalana nalu uli suzgu lakukayika kuti tingakwanisa cha maola 70 pamwezi?
7 Kumbi mungachita wuli asani mukayika kuti mungakwanisa cha maola 70 ngo ngakhumbika pamwezi? Mwalekiyanji kukambiyaku apayiniya anyaki wo angukumana ndi suzgu langati lenili? (Ntha. 15:22) Pavuli paki, lembani ndondomeku zakupambanapambana zo muwona kuti zingaja zakovya. Muwonengi kuti nkhwambula kusuzga kujiwombole nyengu yakuti muchiti uteŵeti, mwa kuleka nchitu zinyaki zambula kukhumbika ukongwa.—Ŵaefe. 5:15, 16.
8. Nchifukwa wuli nyengu ndi nyengu titenere kusanda so mo vinthu viliri paumoyu widu?
8 Sandani so Umoyu Winu: Vinthu paumoyu wa munthu weyosi visinthasintha. Mwaviyo, chingaŵa chazeru kusanda mo vinthu viliri paumoyu winu nyengu ndi nyengu. Mwakweruzgiyapu, kumbi mwe pafupi kupumuwa nchitu yakulembeka? Randy, yo wangusankha kupumuwa liŵi panchitu wanguti: “Chakusankha ichi chandiwovya kuti ndiyambi upayiniya wanyengu zosi limoza ndi muwolu wangu, ndipu chatipaska mwaŵi wakuchiteŵete kuvigaŵa vo kulivi ateŵeti anandi. Ndasaniya vitumbiku vinandi chifukwa cha chakusankha ichi, kweni thumbiku likulu ukongwa paku vosi ivi, ndi njuŵi yamampha.”
9. Kumbi nchinthu wuli cho ŵanthu akutorana atenele kuŵanaŵaniya?
9 Pavuli pakusanda so mo vinthu viliri paumoyu wawu, ŵanthu akutorana anyaki awona kuti wosi ŵaŵi atenere cha kumaliya nyengu yawu yosi pa kulima, kuchita bizinesi pamwenga kugwira nchitu yakulembeka. Mbuneneska kuti ivi vingakhumba kuti banja lisinthi vinthu vinyaki paumoyu wawu ndi kuja umoyu wambula kuliya vinandi, kweni kusintha uku nchinthu chakuzirwa ukongwa. Mubali John, yo muwolu waki waleka nchitu yakulembeka pambula kuswera yapa kuti wachiti vinandi mu uteŵeti, watiti: “Palivi so chinthu chakukondweska kuruska kuziŵa kuti muwolu wangu wachita vinthu vauzimu zuŵa lelosi.”
10. Kumbi nchinthu wuli cho chitovya Akhristu kuti ayambi uteŵeti wa upayiniya?
10 Vilongo Chanju ndi Chivwanu: Yehova wapanga nchitu yakupharazga kuja yakuzirwa yo weyosi waku isi watenere kuchita. Mugonezu wakali uwu wepafupi kubwangandulika ndipu ŵija wo adana pa zina laku Yehova ndiwu ataskikengi. (Ŵaro. 10:13) Mtima wakuzaza ndi chanju cho tenachu paku Yehova ndi kuwonga vo watichitiya, vitichitiskengi kuti tivwiyi dangu lo Mwana waki wakupereka lakuti tipharazgi mwaphambu. (Mate. 28:19, 20; 1 Yoha. 5:3) Kweniso kugomezga kuti tija nadi m’mazuŵa ngakumaliya kutichiskengi kuti tichiti vosi vo tingafiska kuchita mu uteŵeti nyengu yechendamali, kuruska kutangwanika ukongwa ndi charu.—1 Ŵako. 7:29-31.
11. Kumbi titenere kuvwa wuli asani munthu munyaki watitikambiya kuti tikhoza kuja mpayiniya wamampha?
11 Upayiniya wanyengu zosi ung’anamuwa kufiska waka maola ngakuŵikika ndi gulu cha, kweni nkhulongo kujipereka kwidu kwaku Chiuta. Mwaviyo, asani munthu munyaki wangakukambiyani kuti mukhoza kuja mpayiniya wamampha, wonani kuti watimulumbani. Ndipu ŵanaŵaniyanipu mwa rombu kuti muteŵetiyeku Chiuta mu uteŵeti wakukondweska uwu.
[Fundu yo yakonkhoskeka papeji 4]
Apapi, kumbi mutovya ŵana ŵinu kuti azichiti uteŵeti wa nyengu zosi?
[Fundu yo yakonkhoskeka papeji 5]
Yehova wapanga nchitu yakupharazga kuja yakuzirwa yo weyosi waku isi watenere kuchita.